Werevu wa kweli na uvumilivu hufaa.

¹Jina zuri ni jema kuliko mafuta mazuri, nayo siku ya kufa ni njema kuliko siku ya kuzaliwa.[#Fano. 22:1.]

²Kuingia nyumbani mwenye matanga ni kwema kuliko kuingia nyumbani mwenye watu wanywao, kwa kuwa mle huelekea mwisho wa watu wote, naye mwenye uzima huyaweka moyoni.

³Masikitiko ni mema kuliko macheko, kwani uso ukiwa mbaya, moyo huwa mwema.

⁴Mioyo ya werevu wa kweli huwa nyumbani mwenye matanga, lakini mioyo ya wajinga huwa nyumbani mwenye furaha.

⁵Kuyasikiliza makemeo ya mwerevu wa kweli ni kwema, kuliko mtu akizisikiliza nyimbo za wajinga.

⁶Kwani kama moto wa miiba unavyovuma chini ya chungu, ndivyo, macheko ya mjinga yalivyo; hayo nayo ni ya bure.

⁷Kweli ukorofi humpumbaza mwerevu wa kweli, nayo mapenyezo huzipoteza akili.

⁸Mwisho wa jambo ni mwema kuliko mwanzo wake; mwenye uvumilivu ni mwema kuliko mwenye majivuno.

⁹Usiwe mwepesi wa kukasirika rohoni mwako; kwani makasiriko hutua kufuani mwa mjinga.[#Yak. 1:19.]

¹⁰Usiulize kwamba: Inakuwaje, siku za kale zikiwa njema kuliko hizi za sasa? Kwani huulizi hivyo kwa kuwa mwenye werevu wa kweli.

¹¹Werevu wa kweli ni mwema kama fungu uliloachiwa, tena ni pato kwao walionao jua.

¹²Kivulini kwa werevu wa kweli ni kuzuri kama kivulini kwa fedha, lakini ujuzi hushinda, kwa kuwa werevu wa kweli huwapatia wenyewe uzima.[#Fano. 3:2.]

¹³Yatazame matendo yake Mungu! Kwani yuko nani awezaye kuyanyosha aliyoyapotoa?[#Mbiu. 1:15.]

¹⁴Siku ikiwa njema, nawe furahiwa! Lakini siku ikiwa mbaya, jiangalie! Kwani hii nayo Mungu ameifanya, kama alivyoifanya ile, kwa kwamba: Mtu asione cho chote kitakachokuwako nyuma yake.

¹⁵Haya yote mawili niliyaona katika siku zangu zilizo za bure nazo: wako waongofu wanaoangamia, ijapo wawe wenye wongofu, tena wako wasiomcha Mungu wanaokaa siku nyingi, ijapo wawe wenye ubaya.[#Mbiu. 8:14; Sh. 73:12-13.]

¹⁶Usiuzidishe wongofu, wala usijipatie werevu wa kweli kushinda wengine! Kwa nini unataka kujiangamiza?

¹⁷Tena usizidishe uovu, wala usiwe mjinga! Kwa nini unataka kufa, siku zako zikiwa hazijatimia bado?

¹⁸Ni vema, ushike upande huu! Lakini napo penye upande mwingine usiuondoe mkono wako! Kwani amchaye Mungu huyapona yote mawili.

¹⁹Werevu wa kweli humtia mwerevu wa kweli nguvu zaidi kuliko wakuu kumi watawalao mjini.

²⁰Kwani huku nchini hakuna mtu mwongofu afanyaye mema tu pasipo kukosa.[#Sh. 14:3.]

²¹Tena usiyaangalie maneno yote, watu wanayoyasema, usije kumsikia mtumishi wako, akikutukana!

²²Kwani moyo wako unajua, ya kuwa nawe mara nyingi ulitukana wengine.

²³Hayo yote niliyajaribu kwa werevu wa kweli, nikasema: Na nierevuke kweli! Lakini werevu wa kweli hunikalia mbali.

²⁴Iliyokuwa sababu yao ya kuwa hivyo iko mbali, tena imefichika sanasana, atakayeivumbua yuko nani?

²⁵Nikazunguka, moyo wangu upate ujuzi na uchunguzi kwa kuutafuta werevu wa kweli na utambuzi, ujue, ya kuwa kumwacha Mungu ni ujinga, nao ujinga ndio upumbavu.

²⁶Ndipo, nilipoona yaliyo yenye uchungu kuliko kufa, ndio mwanamke, moyo wake ukigeuka kuwa tanzi na wavu, nayo mikono yake ikiwa pingu. Mtu aliye mwema machoni pake Mungu huponyoka kwake, lakini mkosaji hunaswa naye.[#Fano. 2:16-22.]

²⁷Mpiga mbiu akasema: Yatazame, niliyoyaona kwa kuunganisha moja kwa moja, nipate kuyatambua yaliyo kweli!

²⁸Liko moja, roho yangu ililolitafuta pasipo kuliona: Mwanamume nimemwona mmoja katika elfu, lakini mwanamke, niliyemtafuta, sikumwona katika wao wote.

²⁹Lakini hili moja, nililoliona, litazame nalo: Mungu alimwumba mtu kuwa mwongofu, lakini wao hutafuta mizungu mingi![#Fano. 2:7.]