Mataifa yaliyosalia katika nchi ya Kaanani.

¹Haya ndiyo mataifa, Bwana aliyoyaacha, wakae, awatumie kuwajaribu Waisiraeli wote wasioyajua mapigano yote ya Kanaani.[#Amu. 2:22.]

²Huko ni kwamba tu: vizazi vingine vya wana wa Isiraeli wayajue, wapate kujifundisha mapigano, ni wale tu wasioyajua mapigano ya kale.

³Nayo mataifa ni haya: watawalaji watano wa Wafilisti na Wakanaani wote na Wasidoni na Wahiwi waliokaa milimani kwa Libanoni kutoka kwenye mlima wa Baali-Hermoni mpaka kufika Hamati.[#Yos. 13:3.]

⁴Hao ndio, aliowataka wa kuwajaribu Waisiraeli, ajue, kama watayasikia maagizo ya Bwana, aliyowaagiza baba zao kinywani mwa Mose.

⁵Ndivyo, wana wa Isiraeli walivyokaa katikati kwao Wakanaani na kwa Wahiti na kwa Waamori na kwa Waperizi na kwa Wahiwi na kwa Wayebusi.

⁶Wakawachukua wana wao wa kike, wawe wake zao, nao wana wao wa kike wakawapa wana wao wa kiume, nayo miungu yao wakaitumikia.[#5 Mose 7:3.]

Mwamuzi wa kwanza Otinieli.

⁷Wana wa Isiraeli walipoyafanya yaliyo mabaya machoni pake Bwana, wakimsahau Bwana Mungu wao, watumikie vinyago vya Baali na vya Ashera,

⁸makali ya Bwana yakawawakia Waisiraeli, akawauza na kuwatia mkononi mwa Kusani-Risataimu, mfalme wa Mesopotamia; nao wana wa Isiraeli wakamtumikia Kusani-Risataimu miaka 8.

⁹Wana wa Isiraeli walipomlilia Bwana, Bwana akawainulia wana wa Isiraeli mwokozi, awaokoe, ndiye Otinieli, mwana wa Kenazi, mdogo wake Kalebu.[#Amu. 1:13.]

¹⁰Roho ya Bwana ilipomjia, akawa mwamuzi wa Waisiraeli, akatoka kwenda vitani, naye Bwana akamtia Kusani-Risataimu, mfalme wa Mesopotamia, mkononi mwake, kwa kuwa mkono wake yeye ulikuwa wenye nguvu kuliko ule wa Kusani-Risataimu.[#Amu. 6:34.]

¹¹Ndipo, nchi ilipopata kutulia miaka 40, kisha Otinieli, mwana wa Kenazi, akafa.

Mwamuzi Ehudu.

¹²Wana wa Isiraeli walipoendelea kuyafanya yaliyo mabaya machoni pake Bwana, Bwana akamtia Egloni, mfalme wa Moabu, nguvu, awashinde Waisiraeli, kwa kuwa waliyafanya yaliyo mabaya machoni pake Bwana.

¹³Ndipo, alipokusanya kwake wana wa Amoni na Waamaleki, kisha akaenda, akawapiga Waisiraeli, nao Mji wa Mitende wakauchukua.[#Amu. 1:16.]

¹⁴Kisha Waisiraeli wakamtumikia Egloni, mfalme wa Moabu, miaka 18.

¹⁵Wana wa Isiraeli walipomlilia Bwana, Bwana akawainulia mwokozi, ndiye Ehudu, mwana wa Gera wa Benyamini, ni mtu mwenye shoto. Huyu wana wa Isiraeli wakamtuma kumpelekea Egloni, mflame wa Moabu, mahongo.

¹⁶Ehudu akajipatia upanga wenye ukali pande zote mbili, nao urefu wake kama mkono; akaufunga chini ya nguo yake penye paja lake la kuume.

¹⁷Akampelekea Egloni, mfalme wa Moabu, hayo mahongo, naye Egloni alikuwa mtu mnene sana.

¹⁸Alipokwisha kumpelekea hayo mahongo, akawapa wale watu waliochukua mahongo ruhusa kwenda zao.

¹⁹Lakini mwenyewe akarudia Gilgali, hapo palipokuwa na vinyago, akasema: Nina neno la njama na wewe mfalme; naye akasema: Nyamaza kwanza! Wote waliosimama kwake walipokwisha kutoka,

²⁰Ehudu akaingia mwake; naye alikuwa amekaa katika chumba cha juu chenye baridi yeye peke yake tu. Ehudu aliposema: Ninalo neno la Mungu la kukuambia, akainuka katika kiti chake cha kifalme.

²¹Ndipo, Ehudu alipoupeleka mkono wake wa kushoto, akauchomoa upanga penye paja lake la kuume, akamchoma tumboni;

²²hata kipini kikaingia ndani pamoja na chuma cha upanga, nayo mafuta yakapafungia palipoingia upanga, kwani hakuutoa upanga tumboni, nao ulitokea nyuma.

²³Kisha Ehudu akatoka, akaja barazani, akaifunga milango ya kile chumba cha juu nyuma yake kwa komeo.

²⁴Alipokwisha kutoka, watumishi wake Egloni wakaja; lakini walipoona, ya kuwa milango ya chumba cha juu imefungwa kwa makomeo, wakasema; Labda amejifunika miguu yake katika chumba cha baridi.

²⁵Wakangoja kwa kuona soni, lakini walipoona ya kuwa hakuna anayeifungua milango ya chumba, wakachukua ufunguo, wakaifungua, mara wakamwona bwana wao, akilala chini, maana amekufa.

²⁶Naye Ehudu alikuwa ameponyoka, wale walipokawilia, naye akapapita penye vinyago, akapona kweli alipofika Seira.

²⁷Alipoingia humo akapiga baragumu milimani kwa Efuraimu; ndipo, wana wa Isiraeli waliposhuka pamoja naye kutoka milimani, naye akawaongoza.

²⁸Akawaambia: Nifuateni upesi! Kwani Bwana amewatia adui zenu, hawa Wamoabu, mikononi mwenu. Ndipo, waliposhuka na kumfuata, wakavivuka vivuko vya Yordani penye njia za kwenda Moabu, kisha hawakumpa mtu ruhusa kuvuka.

²⁹Wakati huo wakaua Wamoabu kama watu 10000, wote waliokuwa wanene nao wenye nguvu wote, hakuwako aliyepona.

³⁰Siku hiyo Wamoabu wakanyenyekezwa kuwa chini ya mikono ya Waisiraeli; ndipo, nchi ilipopata kutulia miaka 80.

Mwamuzi Samugari.

³¹Aliyemfuata ni Samugari, mwana wa Anati; akaua Wafilisti watu 600 kwa fimbo tu la kuchungia ng'ombe; hivyo yeye naye aliwaokoa Waisiraeli.