Yesu anageuzwa sura.

¹Baada ya siku sita Yesu akamchukua Petero na Yakobo na Yohana nduguye, akapanda pamoja nao peke yao juu ya mlima mrefu.

²Huko akageuzwa sura yake machoni pao. Uso wake ukamulika kama jua, nazo nguo zake zikamerimeta kama mwanga.[#2 Petr. 1:16-18.]

³Walipotazama, wametokewa na Mose na Elia, wanaongea na Yesu.

⁴Petero akasema akimwambia Yesu: Bwana, hapa ni pazuri kuwapo sisi. Ukitaka, nitajenga hapa vibanda vitatu; kimoja chako, na kimoja cha Mose, na kimoja cha Elia.

⁵Angali akisema, mara wingu jeupe likawatia kivuli, sauti ikatoka winguni, ikisema: Huyu ndiye mwanangu mpendwa, ambaye nimependezwa naye. Msikilizeni yeye![#Mat. 3:17; 2 Petr. 1:16-18.]

⁶Wanafunzi walipoyasikia wakaanguka kifudifudi, wakaingiwa na woga sana.

⁷Yesu akawaendea, akasema akiwagusa: Inukeni, msiogope!

⁸Walipoyainua macho yao, hakuna waliyemwona, asipokuwa Yesu peke yake.

Kuja kwa Elia.

⁹Walipokuwa wakishuka mlimani, Yesu akawaagiza akisema: Msimwambie mtu ye yote mliyoyaona, mpaka Mwana wa mtu atakapofufuliwa katika wafu!*[#Mat. 16:20.]

¹⁰Nao wanafunzi wakamwuliza wakisema: Basi, waandishi husemaje: Sharti kwanza Elia aje?[#Mat. 11:14; Mal. 4:5.]

¹¹Naye akajibu akisema: Kweli Elia anakuja, vyote avigeuze kuwa vipya.[#Luk. 1:17.]

¹²Lakini nawaambiani: Elia amekwisha kuja, nao hawakumtambua, wakamtendea yote, waliyoyataka. Hivyo hata Mwana wa mtu atateswa nao.[#Mat. 14:9-10.]

¹³Hapo ndipo wanafunzi walipojua, ya kuwa amewaambia mambo ya Yohana Mbatizaji.[#Luk. 1:17.]

Kijana mwenye pepo.

¹⁴Walipofika penye kundi la watu, mtu akamjia, akampigia magoti, akasema:

¹⁵Bwana, umhurumie mwanangu! Kwani ni mwenye kifafa, aumia vibaya. Kwani mara nyingi huanguka motoni, tena mara nyingi huanguka majini.

¹⁶Nikampeleka kwa wanafunzi wako, lakini hawakuweza kumponya.

¹⁷Yesu akajibu akisema: Enyi wa kizazi kisichomtegemea Mungu kwa kupotoka! Nitakuwapo nanyi mpaka lini? Nitawavumilia mpaka lini? Mleteni hapa, nilipo![#5 Mose 32:5; Yoh. 14:9.]

¹⁸Yesu alipomkaripia, pepo akamtoka; naye mtoto akapona tangu saa ileile.

¹⁹Kisha wanafunzi wakamjia Yesu, alipokuwa peke yake, wakasema: Mbona sisi hatukuweza kumfukuza huyo?[#Mat. 10:1.]

²⁰Naye akawaambia: Ni kwa ajili hammtegemei Mungu vema. Maana nawaambia la kweli: Cheo chenu cha kumtegemea Mungu kikiwa kidogo kama kipunje cha mbegu, mtauambia mlima huu: Ondoka hapa, ulipo, uende pale! nao utaondoka. Hivyo halitakuwako neno lisilowezekana nanyi.[#Mat. 21:21; Luk. 17:6; 1 Kor. 13:2.]

²¹Lakini kabila hili la pepo halitoki isipokuwa kwa nguvu ya kuomba na ya kufunga.

Ufunuo wa pili wa mateso.

²²Walipokuwa wakizunguka huko Galilea, Yesu akawaambia: Mwana wa mtu atatiwa mikononi mwa watu,

²³nao watamwua, kisha siku ya tatu atafufuliwa. Wakasikitika sana.

Kodi ya Nyumba ya Mungu.

²⁴Walipofika Kapernaumu, watoza kodi wakamjia Petero, wakasema: Mfunzi wenu halipo kodi?[#2 Mose 30:13.]

²⁵Akasema: Hulipa. Naye alipokuja nyumbani, Yesu akaanza kumwuliza akisema: Waonaje, Simoni, wafalme wa nchi huwatoza watu gani chango au kodi? Wana wao wenyewe au wageni?

²⁶Alipojibu: Huwatoza wageni, Yesu akamwambia: Basi, wana wenyewe hawatozwi.

²⁷Lakini tusiwakwaze! Nenda pwani, uloe kwa ndoana! Kisha samaki wa kwanza atakayezuka umshike, ufumbue kinywa chake! Mle utaona fedha, itwae, ukawape kwa ajili yetu, mimi na wewe!