Kuwa kama watoto.

¹Saa ile wanafunzi wakamjia Yesu, wakamwuliza wakisema: Aliye mkuu katika ufalme wa mbingu ni nani?

²Akaita kitoto, akamsimamisha katikati yao,

³akasema: Kweli nawaambiani: Msipogeuka, mkawa kama vitoto, hamtaingia kamwe katika ufalme wa mbingu.[#Mat. 19:14; Yoh. 3:3,5.]

⁴Mtu atakayejinyenyekeza mwenyewe, awe kama kitoto huyu, huyo ndiye aliye mkuu katika ufalme wa mbingu.

⁵Naye atakayepokea kitoto mmoja kama huyu kwa jina langu hunipokea mimi.[#Mat. 10:40; Yoh. 13:20.]

⁶Lakini mtu atakayekwaza mmoja tu aliye mwenzao hawa wadogo wanaonitegemea inamfaa kutungikwa shingoni pake jiwe kubwa la kusagia, kisha atoswe kilindini mwa bahari.[#Luk. 17:1-2.]

⁷Yako yatakayoupata ulimwengu kwa ajili ya makwazo. Kweli makwazo sharti yaje, lakini mtu yule anayelileta kwazo atapatwa na mambo.[#Mat. 16:23.]

⁸Nawe, mkono wako ukikukwaza, au mguu wako ukikukwaza, uukate uutupe mbali! Kuingia penye uzima mwenye kilema au kiwete kutakufaa kuliko hapo, ukiwa mwenye mikono miwili au miguu miwili, ukatupwa katika moto usiozimika kale na kale.[#Mat. 5:29-30.]

⁹Nalo jicho lako likikukwaza, basi ling'oe ulitupe mbali! Kuingia penye uzima mwenye chongo kutakufaa kuliko hapo, ukiwa mwenye macho mawili, ukatupwa shimoni mwa moto.

¹⁰Tazameni, msiwabeze wadogo hawa hata mwenzao mmoja! Kwani nawaambiani: Malaika zao mbinguni huutazama siku zote uso wa Baba yangu alioko mbinguni.[#Ebr. 1:14.]

¹¹Kwani Mwana wa mtu amekuja kukiokoa kilichoangamia.[#Mat. 9:13; Luk. 19:10.]

¹²Mwaonaje? Mtu akiwa na kondoo mia, tena mmoja wao akipotea, hatawaacha wale tisini na tisa milimani, aende kumtafuta yule aliyepotea?

¹³Naye akipata kumwona, kweli nawaambiani: Atamfurahia kuliko wale tisini na tisa wasiopotea.

¹⁴Vivyo hivyo Baba yenu alioko mbinguni hataki, hawa walio wadogo hata mmoja wao apotee.

Kufunga na kufungua.

¹⁵Ndugu yako akikukosea, nenda kamwonye, wewe na yeye mko peke yenu! Akikusikia, umempata tena ndugu yako.[#3 Mose 19:17; Luk. 17:3-4; Gal. 6:1.]

¹⁶Lakini asipokusikia, chukua pamoja na wewe tena mmoja au wawili! Maana kila shauri limalizike kwa kusemewa na mashahidi wawili au watatu.[#5 Mose 19:15.]

¹⁷Naye akikataa kuwasikia hao, waambie wateule wenziwe shauri hilo! Lakini atakapokataa kuwasikia nao wateule, awe kwako kama mtu wa kimizimu au mtoza kodi![#1 Kor. 5:13; 2 Tes. 3:6; 1 Tim. 6:4-5; Tit. 3:10.]

¹⁸Kweli nawaambiani: Lo lote, mtakalolifunga nchini, litakuwa limefungwa hata mbinguni; nalo lo lote, mtakalolifungua nchini, litakuwa limefungwa hata mbinguni; nalo lo lote, mtakalolifungua nchini, litakuwa limefunguliwa hata mbinguni.[#Mat. 16:19; Yoh. 20:23; Tume. 15:28-30; 1 Kor. 5:4-5.]

¹⁹Tena nawaambiani: Kila jambo, wenzenu wawili nchini watakalopatana kuliomba, watapewa na Baba yangu alioko mbinguni.[#Mar. 11:24.]

²⁰Kwani watu wawili au watatu wanapolikusanyikia Jina langu, nami nipo hapo katikati yao.[#Mat. 28:20; Yoh. 14:23.]

Mtumwa mwovu.

²¹*Ndipo, Petero alipomjia, akamwambia: Bwana, ndugu yangu anikosee mara ngapi, nikimwondolea? Yatosha mara saba?

²²Yesu akamwambia: Sikuambii: Mwondolee mara saba, ila mwondolee mara sabini mara saba![#Luk. 17:4; Ef. 4:32.]

²³Kwa sababu hiyo ufalme wa mbingu umefanana na mfalme aliyetaka kufanya hesabu na watumwa wake.

²⁴Alipoanza kuhesabu akaletewa mmoja mwenye madeni ya mizigo 10000 ya fedha.

²⁵Naye alipokosa vya kumlipa, bwana akaagiza, wauzwe yeye na mkewe na watoto wake navyo vyote, alivyokuwa navyo, deni lipate kulipika.

²⁶Mtumwa akamwangukia, akamlalamikia akisema: Nivumilie, nitakulipa yote!

²⁷Bwana akamwonea uchungu yule mtumwa, akamfungua, akamwachilia hata deni lake.

²⁸Lakini yule mtumwa alipotoka akamwona mtumwa mwenziwe mmoja aliyekuwa mdeni wake wa shilingi 100. Akamkamata, akamshika koo, akasema: Lipa deni lako!

²⁹Mtumwa mwenziwe akaanguka miguuni pake, akambembeleza akisema: Nivumilie, nitakulipa!

³⁰Lakini yule hakutaka, akaenda, akamtia kifungoni, mpaka atakapolilipa lile deni.

³¹Basi, watumwa wenziwe walipoyaona yaliyokuwa wakasikitika sana. Wakaja, wakamweleza bwana wao hayo yote yaliyokuwa.

³²Ndipo, bwana wake alipomwita, akamwambia: Wee mtumwa mbaya, lile deni lote nalikuachilia, uliponibembeleza.

³³Wewe nawe haikukupasa kumhurumia mtumwa mwenzio, kama nilivyokuhurumia mimi?

³⁴Bwana wake akakasirika, akamtoa, afungwe, mpaka atakapolilipa deni lake lote.[#Mat. 5:26; Yak. 2:13.]

³⁵Ndivyo, naye Baba yangu wa mbinguni atakavyowatendea ninyi, msipoondoleana mioyoni mwenu kila mtu na ndugu yake.*[#Mat. 6:14-15.]