Njama ya kumkamata Yesu.

¹Ikawa, Yesu alipoyamaliza maneno hayo yote, akawaambia wanafunzi wake:[#Mat. 20:18; 2 Mose 12:1-20.]

²Mmejua, baada ya siku mbili itakuwa Pasaka; naye Mwana wa mtu atatolewa, awambwe msalabani.

³Hapo watambikaji wakuu na wazee wa huko kwao wakakusanyika nyumbani mwa mtambikaji mkuu, jina lake Kayafa,

⁴wakala njama ya kumkamata Yesu kwa werevu wapate kumwua.

⁵Lakini walisema: Kwanza sikukuu ipite, watu wasije, wakafanya fujo!

Yesu anamiminiwa mafuta.

⁶Yesu alipokuwa Betania nyumbani mwa Simoni Mkoma,

⁷akamjia mwanamke mwenye kichupa cheupe cha jiwe kilichojaa mafuta ya maua yaliyo yenye bei kubwa. Akammiminia kichwani pake, alipokaa akila.

⁸Lakini wanafunzi walipoviona wakachukiwa, wakasema: Upotevu huu ni wa nini?

⁹Kwani mafuta haya yangaliwezekana kuuzwa kwa fedha nyingi, wakapewa maskini.

¹⁰Lakini Yesu alipovitambua, akawaambia: Mbona mnamsikitisha mwanamke huyu? Maana amenitendea tendo zuri.

¹¹Kwani maskini mnao kwenu siku zote, lakini mimi hamwi nami siku zote.[#5 Mose 15:11.]

¹²Kwani alipoyamimina mafuta haya, aupake mwili wangu, ameutengenezea kuzikwa.

¹³Kweli nawaambiani: Po pote katika ulimwengu wote, patakapotangazwa Utume huu mwema, patasemwa nacho hiki, alichokitenda yeye, naye akumbukwe.

Yuda Iskariota.

¹⁴Hapo wale kumi na wawili mwenzao mmoja aliyeitwa Yuda Iskariota akaenda kwa watambikaji wakuu,

¹⁵akasema: Mwataka kunipa nini, nitakapomtia mikononi mwenu? Wakaagana kumpa fedha 30.[#Zak. 11:12; Yoh. 11:57.]

¹⁶Toka hapohapo alitafuta njia iliyofaa amtoe.[#1 Tim. 6:9-10.]

Kondoo ya Pasaka.

¹⁷Siku ya kwanza ya kula mikate isiyotiwa chachu wanafunzi wakamjia Yesu wakisema: Unataka, tukuandalie wapi, uile kondoo ya Pasaka?[#Mat. 26:2; 2 Mose 12:18-20.]

¹⁸Naye akasema: Nendeni mjini kwa fulani, mmwambie: Mfunzi anasema: Siku zangu zinatimia! Kwako nitaila kondoo ya Pasaka pamoja na wanafunzi wangu.[#Mat. 21:3.]

¹⁹Wanafunzi wakafanya, kama Yesu alivyowaagiza, wakaiandaa kondoo ya Pasaka.

²⁰Ilipokuwa jioni, akakaa chakulani pamoja na wanafunzi wake kumi na wawili.

²¹Walipokuwa wakila, akasema: Kweli nawaambiani: Mwenzenu mmoja atanichongea.

²²Wakasikitika sana, wakaanza kumwuliza kila mmoja: Bwana, ni mimi?

²³Naye akajibu akisema: Aliyetowelea pamoja nami bakulini ndiye atakayenichongea.

²⁴Mwana wa mtu anakwenda njia yake, kama alivyoandikiwa; lakini yule mtu, ambaye Mwana wa mtu atachongewa naye, atapatwa na mambo. Ingalimfalia yule mtu, kama asingalizaliwa.

²⁵Ndipo, Yuda aliyemchongea alipomwuliza akisema: Mfunzi mkuu, ni mimi? Akamjibu: Ndio umesema.

Chakula cha Bwana. p

²⁶Walipokuwa wakila, Yesu akatwaa mkate, akauombea, akaumega, akawapa wanafunzi akisema: Twaeni, mle! Huu ndio mwili wangu.[#Mat. 14:19; 1 Kor. 11:23-26.]

²⁷Kisha akatwaa kinyweo, akashukuru, akawapa akisema: Nyweni nyote humu!

²⁸Maana hii ndiyo damu yangu ya Agano Jipya inayomwagwa kwa ajili ya wengi, wapate kuondolewa makosa.[#2 Mose 24:8; Yer. 31:31-34; Zak. 9:11.]

²⁹Lakini nawaambiani: Tangu sasa sitayanywa tena mazao ya mizabibu mpaka siku ile, nitakapoyanywa mapya pamoja nanyi katika ufalme wa Baba yangu.

³⁰Walipokwisha kuimba wakatoka kwenda mlimani pa michekele.[#Sh. 115—118; Luk. 22:39; Yoh. 18:1.]

³¹Hapo Yesu akawaambia: Usiku huu wa leo ninyi nyote mtajikwaa kwangu kwani imeandikwa:

³²Nitampiga mchungaji, kondoo wa kundi lake watawanyike; lakini nitakapokwisha kufufuliwa nitawatangulia kwenda Galilea.[#Mat. 28:7.]

³³Ndipo, Petero alipojibu akimwambia: Ijapo wote wajikwae kwako, lakini mimi sitajikwaa kamwe.

³⁴Yesu akamwambia: Kweli nakuambia: Usiku huu wa leo jogoo atakapokuwa hajawika, utakuwa umenikana mara tatu.[#Yoh. 13:38.]

³⁵Petero akamwambia: Hata ijaponipasa kufa pamoja nawe, sitakukana kabisa. Nao wanafunzi wote wakasema vivyo hivyo.[#Mat. 26:56.]

Getisemane.

³⁶Kisha Yesu akaenda pamoja nao mahali panapoitwa Getisemane. Akawaambia wanafunzi: Kaeni hapa, niende kule, niombe!

³⁷Akamchukua Petero na wale wana wawili na Zebedeo, akaanza kusikitika na kuhangaika,[#Ebr. 5:7.]

³⁸akawaambia: Roho yangu inaumizwa sana na masikitiko, imesalia kufa tu. Kaeni papa hapa, mkeshe pamoja nami![#Sh. 43:5; Yoh. 12:27.]

³⁹Akaendelea mbele kidogo, akaanguka kifudifudi, akaomba akisema: Baba, ikiwezekana kinyweo hiki kinipite, nisikinyuwe! Lakini yasifanyike, kama nitakavyo mimi, ila yafanyike kama utakavyo wewe![#Yoh. 10:17-18; 18:11; Ebr. 5:8.]

⁴⁰Alipowajia wanafunzi, akawakuta, wamelala usingizi, akamwambia Petero: Hamkuweza kukesha pamoja nami saa moja tu?

⁴¹Kesheni na kuomba, msije kuingia majaribuni! Roho inataka kuitikia, lakini mwili ni mnyonge.[#Ebr. 2:14; 4:15.]

⁴²Akaenda tena mara ya pili, akaomba akisema: Baba, isipowezekana, hiki kinipite, nisikinywe, basi, uyatakayo wewe na yafanyike![#Mat. 6:10.]

⁴³Alipokuja tena, akawakuta, wamelala usingizi, kwani macho yao yalikuwa mazito.

⁴⁴Akawaacha, akaenda tena, akaomba mara ya tatu akisema tena maneno yale yale.[#2 Kor. 12:8.]

⁴⁵Kisha akawajia wanafunzi, akawaambia: Mwafuliza kulala usingizi, uchovu uwatoke? Tazameni, saa iko karibu, Mwana wa mtu atiwe mikononi mwa wakosaji![#2 Sam. 24:14.]

⁴⁶Inukeni, twende! Tazameni, mwenye kunichongea yuko karibu![#Yoh. 14:31.]

Kukamatwa kwa Yesu.

⁴⁷Angali akisema, mara akaja Yuda, mmoja wao wale kumi na wawili, pamoja na watu wengi sana wenye panga na rungu waliotoka kwa watambikaji wakuu na kwa wazee wa huko kwao.

⁴⁸Lakini mwenye kumchongea alikuwa amewapa kielekezo akisema: Nitakayemnonea ndiye, mkamateni!

⁴⁹Mara akamjia Yesu, akasema: Salamu, mfunzi mkuu! Akamnonea.

⁵⁰Yesu akamwambia: Mwenangu, umejia nini? Ndipo, walipokuja, wakamkamata Yesu kwa mikono yao, wakamfunga.

⁵¹Papo hapo wale waliokuwako pamoja na Yesu mmoja wao akanyosha mkono, akauchomoa upanga wake, akampiga mtumwa wa mtambikaji mkuu, akamkata sikio.

⁵²Ndipo, Yesu alipomwambia: Urudishe upanga wako mahali pake! kwani wote wenye kushika panga wataangamizwa kwa upanga.[#1 Mose 9:6; Ufu. 13:10.]

⁵³Au unadhani: Siwezi kumbembeleza Baba yangu, naye akaniletea sasa hivi malaika wengi kupita elfu kumi na mbili?

⁵⁴Lakini Maandiko yangetimizwaje yale ya kwamba, sharti yawe vivyo hivyo?

⁵⁵Saa ile Yesu akawaambia yale makundi ya watu: Mmetoka wenye panga na rungu, mnikamate mimi, kama watu wanavyomwendea mnyang'anyi. Kila siku nilikaa hapa Patakatifu nikifundisha, lakini hamkunikamata.

⁵⁶Lakini haya yote yamekuwapo, Maandiko ya Wafumbuaji yatimizwe. Papo hapo wanafunzi wote wakamwacha, wakakimbia.[#Mat. 26:31.]

⁵⁷Lakini wale waliomkamata Yesu wakampeleka kwa mtambikaji mkuu Kayafa; ndiko, walikokusanyika waandishi na wazee.

⁵⁸Lakini Petero akamfuata mbalimbali, mpaka akafika uani kwa mtambikaji mkuu, akaingia ndani akakaa pamoja na watumishi, uone mwisho.

Yesu mbele ya Kayafa.

⁵⁹Lakini watambikaji wakuu na baraza ya wakuu wote wakamtafutia Yesu ushuhuda wa uwongo, wapate kumwua.

⁶⁰Lakini hawakuupata, ingawa walikuja mashahidi wa uwongo wengi, lakini hawakumshinda.

⁶¹Halafu wakaja wawili, wakasema: Huyu amesema: Nina nguvu ya kulivunja Jumba la Mungu na kulijenga tena muda wa siku tatu.[#Yoh. 2:19-21.]

⁶²Ndipo, mtambikaji mkuu alipoinuka, akamwambia: Hujibu neno, hawa wanayokusimangia?

⁶³Lakini Yesu akanyamaza kinya. Mtambiakaji mkuu akamwambia: Ninakuapisha na kumtaja Mungu Mwenye uzima, utuambie, kama wewe ndiwe Kristo, Mwana wa Mungu![#Mat. 27:12.]

⁶⁴Yesu akamwambia: Wewe ulivyosema, ndivyo. Tena nawaambiani: Tangu sasa mtamwona Mwana wa mtu, anavyokaa kuumeni kwa nguvu, tena atakavyokuja juu ya mawingu ya mbinguni.[#Mat. 16:27; 24:30; Luk. 21:27; Sh. 110:1; 68:35; Dan. 7:13.]

⁶⁵Ndipo, mtambikaji mkuu alipozirarua nguo zake, akasema: Amekwisha kumbeza Mungu. Mashahidi tunawatakia nini tena? Tazameni, sasa hivi mmesikia, anavyombeza Mungu.[#Mat. 9:3; Yoh. 10:30,33.]

⁶⁶Mwaonaje? Nao wakajibu, wakasema: Amepaswa na kufa.[#3 Mose 24:16; Yoh. 19:7.]

⁶⁷Kisha wakamtemea mate usoni, wakampiga makonde; wengine wakampiga makofi[#Yes. 50:6.]

⁶⁸wakisema: Tufumbulie, Kristo: ni nani aliyekupiga?

Kukana kwa Petero.

⁶⁹Naye Petero alikuwa nje, amekaa uani. Kijakazi mmoja akamjia, akasema: Hata wewe ulikuwa pamoja na Yesu wa Galilea.

⁷⁰Akakana mbele yao wote akisema: Sijui unayoyasema.

⁷¹Alipotoka uani na kufika mlangoni, mwingine akamwona, akawaambia wale waliokuwako: Huyu alikuwa pamoja na Yesu na Nasareti.

⁷²Akakana tena na kuapa akisema: Simjui mtu huyo.

⁷³Punde kidogo wakamjia Petero waliosimama pale, wakamwambia: Kweli, na wewe u mwenzao, kwa maana matamko yako yanakutambulisha.

⁷⁴Ndipo, alipoanza kujiapiza na kuapa akisema: Simjui mtu huyo! Mara hiyo jogoo akawika.

⁷⁵Hapo Petero akalikumbuka lile neno la Yesu, aliposema: Jogoo atakapokuwa hajawika, utakuwa umenikana mara tatu. Akatoka nje, akalia sana kwa uchungu.[#Mat. 26:34.]