Anwani.

¹Mimi Paulo niliyefungwa kwa ajili yake Kristo Yesu na ndugu yetu Timoteo tunakusalimu wewe, Filemoni, uliye mpendwa wetu na mwenzetu wa kazi.[#Ef. 3:1.]

²Tunakusalimu na wewe, Apia, uliye dada yetu, na wewe, Arkipo, uliye mwenzetu wa kupiga vita. Tunawasalimu nao wateule wote waliomo nyumbani mwako.[#Kol. 4:17.]

³Upole uwakalie na utengemano unaotoka kwa Mungu Baba yetu na kwa Bwana wetu Yesu Kristo![#Rom. 1:7.]

Upendo wake Filemoni.

⁴Namtolea Mungu wangu shukrani siku zote nikikukumbuka katika kuomba kwangu.

⁵Kwani nimesikia, unavyompenda Bwana Yesu na kumtegemea, hata unavyowapenda watakatifu wote.

⁶Nakuombea, hivyo, tulivyo mmoja kwa kumtegemea Mungu, vikupe nguvu ya kutambua kwamba: Mema yote, mlio nayo, sharti mmrudishie Kristo![#Fil. 1:9.]

⁷Kwani twalifurahi sana, mioyo yetu ikatulia kwa ajili ya upendo wako, maana roho za watakatifu umezipatia kituo wewe, ndugu yangu.[#2 Kor. 7:4.]

Paulo anamwombea Onesimo.

⁸Kwa hiyo, ijapo Kristo anipe moyo mkuu wa kukuagiza likupasalo,

⁹kwa ajili ya ule upendo wako nataka kukubembeleza tu. Tazama mimi Paulo nilivyo! Ni mzee, tena hata sasa mfungwa wake Kristo Yesu.

¹⁰Nakubembeleza kwa ajili ya mtoto wangu, niliyemzaa humu kifungoni mwangu; ndiye Onesimo[#1 Kor. 4:15; Gal. 4:19; Kol. 4:9.]

¹¹asiyekufalia kale, lakini sasa anatufalia sana, wewe hata mimi.

¹²Nikimrudisha kwako, ni kama nitautuma moyo wangu mwenyewe, ukufikie.

¹³Nami nalitaka kumshika, akae kwangu, akufanyizie kazi hii ya kunitumikia humu kifungoni, nilimotiwa kwa ajili ya kuutangaza Utume mwema.[#Fil. 2:30.]

¹⁴Lakini kwa kuwa hujaweza kuitikia, sikutaka kufanya kitu, kusudi wema wako usiwe wa kushurutishwa, ila uwe wa kupendezwa mwenyewe.[#2 Kor. 9:7.]

¹⁵Kwani labda kwa sababu hii ametengwa nawe siku chache, upate kuwa naye kale na kale.

¹⁶Tena sasa siye kama mtumwa tu, ila apita mtumwa kwa kuwa hata ndugu mpendwa; kweli mimi nampenda, nawe utanipita kwa kumpenda, maana ni wako kwanza kimtu, tena ni wako Kikristo.[#1 Tim. 6:2.]

¹⁷Basi, kama waniwazia kuwa mwenzio, mpokee yeye kama mimi!

¹⁸Lakini kama kiko chako, alichokipotoa, au kama yuko na deni kwako, hayo nibandikie mimi!

¹⁹Mimi Paulo nimeviandika hivi kwa mkono wangu mwenyewe, mimi nitayalipa. Sitakuambia: U mdeni wangu mimi, deni lako ni moyo wako.

²⁰Kweli, ndugu yangu, nataka kuona upato kwako, maana u wake Bwana. Upatie moyo wangu kituo kwake Kristo![#File. 7.]

Salamu.

²¹Nimekuandikia, kwa sababu nimejipa moyo wa kwamba: Utatii, tena najua, ya kuwa utafanya kuyapita yale, niliyoyasema.

²²Kisha nitengenezee chumba cha kufikia! Kwani kingojeo hiki ninacho cha kwamba: Mtanipata tena kwa ajili ya kuomba kwenu.[#Fil. 1:25; 2:24.]

²³Wanakusalimu akina Epafura aliyefungwa pamoja nami kwa ajili ya Kristo Yesu[#Kol. 1:7; 4:12.]

²⁴na Marko na Aristarko na Dema na Luka walio wenzangu wa kazi.[#Kol. 4:10,14.]

²⁵Upole wa Bwana Yesu Kristo uzikalie roho zenu! Amin.