Nia ya Kikristo.

¹Hivyo mlivyo naye Kristo, nawabembeleza kwamba: Ikiwa mwatulizana mioyo kwa kupendana, ikiwa m wenye roho moja, au ikiwa m wenye mioyo ya kuoneana uchungu na huruma,

²ikiwa hivyo, itimilizeni furaha yangu, mawazo yenu yakiwa yayo hayo ya kupendana kila mtu na mwenziwe, mioyo ikiwa mmoja tu wa kulitaka neno lili hili la kwamba:

³Pasifanyike jambo lolote kwa kuchokozana wala kwa kujitakia majivuno ya bure, ila mnyenyekeane kila mtu akimwazia mwenziwe kuwa mkubwa kuliko yeye![#Rom. 12:10; Gal. 5:26.]

⁴Kila mtu asiyaangalie yaliyo yake tu, ila na ayaangalie nayo yaliyo yake mwenziwe!*[#1 Kor. 10:24,33.]

⁵*Mioyoni mwenu myawaze yaleyale, Kristo Yesu aliyoyawaza![#Mat. 11:29.]

⁶Yeye alikuwa mwenye sura yake Mungu, tena kule kufanana naye Mungu hakushikamana nako kama ni kitu, alichokiponyoka.[#1 Mose 3:5; Yoh. 1:1-2; 17:5.]

⁷Ila alijivua mwenyewe sura ya Kimungu, akajivika sura ya kitumwa, akawa amefanana na watu; walipomtazama, akaonekana, kuwa kama mtu mwenyewe.[#Yes. 53:3; 2 Kor. 8:9; Ebr. 2:14,17.]

⁸Akajinyenyekeza mwenyewe, akawa mwenye kutii mpaka kufa, kweli mpaka kufa msalabani.[#Ebr. 12:2; 5:8.]

⁹Kwa hiyo naye Mungu alimkweza mbinguni, akampatia Jina lililo kuu kuliko majina yote,[#Tume. 2:33; Ef. 1:21; Ebr. 1:3-4.]

¹⁰maana katika Jina lake Yesu wote wapige magoti, wao walioko mbinguni nao waliopo nchini nao walioko kuzimuni,[#Yes. 45:23; Yoh. 5:23; Ufu. 5:13.]

¹¹kila ulimi uungame kwamba: BWANA ni YESU KRISTO; hivyo ndivyo, naye Mungu Baba atakavyotukuzwa.*

Uchumeni wokovu!

¹²Wapenzi wangu, kama mlivonitii siku zote, ikiwa niko kwenu, hata ikiwa siko kama siku hizi za sasa: Usumbukieni wokovu wenu wenyewe mkitetemeka kwa kuogopa![#Sh. 2:11; 1 Petr. 1:17.]

¹³Kwani Mungu ndiye aliyewapa kwanza mioyo ya kutaka, kisha ndiye atakaye wapa nako kuyamaliza yampendezayo.[#Yoh. 15:5; 2 Kor. 3:5.]

¹⁴Yote yafanyeni pasipo kunung'unika na pasipo kuwaza mengi,[#1 Petr. 4:9.]

¹⁵mtu asione la kuwaonya, mkiwa wenye hilo Neno moja tu! Hivyo mtakuwa wana wa Mungu wakaao pasipo kilema katikati yao wa ukoo huu wenye uangamizi na upotovu. Katikati yao ndiko, mnakoangaza, kama mianga inavyoangaza ulimwenguni,[#Fil. 1:10; Mat. 5:14; 10:16; Ef. 5:8.]

¹⁶mkilishika Neno la uzima; hivyo nami nitapata majivuno siku ya Kristo kwamba: Sikupiga mbio bure, wala sikusumbuka bure.[#Yes. 49:4; Gal. 2:2; 1 Tes. 2:19.]

¹⁷Lakini hata nikiuawa kama ng'ombe ya tambiko, ikiwa ya kuwatumikia tu, nafurahi na kuwafurahisha nanyi nyote.[#Kol. 1:24; 2 Tim. 4:6.]

¹⁸Vivi hivi hata ninyi furahini na kunifurahisha nami![#Fil. 3:1; 4:4.]

Timoteo na Epafurodito.

¹⁹Namngojea Bwana Yesu, aitikie, nimtume Timoteo upesi kwenu, moyo wangu upate kutulia ukitambua, mambo yenu yalivyo.

²⁰Kwani sinaye mtu mwingine, tuliyepatana naye mioyo kama huyu; naye huyasumbukia kweli mambo yenu.[#1 Kor. 16:10.]

²¹Kwani wote huyafuata yaliyo yao; hawayafuati yaliyo yake Kristo Yesu.[#2 Tim. 4:10,16.]

²²Lakini yeye mmemtambua, ya kuwa ni mwelekevu, kwani kama mtoto anavyomtumikia baba yake, vivyo hivyo ameitumikia kazi ya kuutangaza Utume mwema pamoja nami.

²³Nangojea, nipate kumtuma yeye; itakuwa papo hapo, nitakapoona, mambo yangu yatakavyotimilika.[#Fil. 1:12.]

²⁴Hili nalo nalishika moyoni kwamba: Bwana atanipa nami kuja upesi kwenu.[#Fil. 1:25.]

²⁵Lakini nalishurutishwa moyoni kumtuma Epafurodito kwenu; yeye ni ndugu na mwenzangu wa kazi na wa vita; kisha ni mtume wenu anayenipatia yenye kunitunza.[#Fil. 4:18.]

²⁶Akawa akiwatunukia ninyi nyote, akasikitika sana, kwa sababu mlikuwa mmesikia, ya kuwa aliugua.

²⁷Naye alikuwa mgonjwa kweli, kufa kukamfikia. Lakini Mungu akamhurumia, tena siye yeye tu, ila mimi nami, masikitiko yasifuatane kwangu mimi.

²⁸Kwa hiyo nimemtuma upesiupesi, mpate kuonana naye na kufurahi tena, nami masikitiko yanipungukie.

²⁹Kwa hiyo mpokeeni katika Bwana kwa furaha yote! Nao walio hivyo wapeni macheo![#1 Kor. 16:16.]

³⁰Kwani kwa ajili ya kazi ya Kristo alijifikisha kufani, asijitunzie mwenyewe, akitaka kunifanyizia kazi zote za utumishi, ambazo hamkuweza kunifanyizia.