Sifa njema.

¹Sifa njema ina kima kuliko mali nyingi,

upendeleo nao hufaa kuliko fedha na dhahabu.

²Mkwasi na maskini hukutana,

aliyewaumba wote wawili ni Bwana.

³Mwerevu akiona mabaya hujificha,

lakini wajinga hupita tu, wakapatwa nayo.

⁴Mapato ya unyenyekevu na ya kumcha Bwana

ni mali na macheo na uzima.

⁵Miiba na matanzi yamo katika njia ya mpotovu,

ajiangaliaye hujiepusha hapo.

⁶Mfundishe mtoto, apate kuijua njia yake,

asiiache, hata atakapokuwa mzee.

⁷Mkwasi huwatawala maskini,

naye akopaye ni mtumishi wake amkopeshaye.

⁸Apandaye uovu huvuna mapotovu,

nayo fimbo iliyomtia ukali itakomeshwa.

⁹Atazamaye wengine kwa jicho lenye utu hubarikiwa,

kwani humgawia mnyonge chakula chake.

¹⁰Mfukuze mfyozaji! Ndipo, ugomvi nao utakapotoka,

ndipo, mteto nayo matusi yatakapokoma.

¹¹Apendaye, moyo utakate, naye mwenye midomo ipendezayo

huwa rafiki yake mfalme.

¹²Macho ya Bwana humlinda mwenye ujuzi,

lakini maneno yake avunjaye agano huyapindua.

¹³Mvivu husema: Simba yuko nje,

nitauawa peupe barabarani.

¹⁴Vinywa vya wanawake wa wengine ni mashimo marefu,

Bwana anayemchukia, utumbukia humo.

¹⁵Ujinga umefungiwa moyoni mwa mtoto,

lakini fimbo ya kumchapa itautoa mwake.

¹⁶Amkorofishaye mnyonge humpatia mali nyingi,

amgawiaye mwenye mali humpunguzia mali zake.

¹⁷Litege sikio lako, uyasikilize maneno ya werevu wa kweli!

Nao moyo wako uuelekezee ujuzi wangu!

¹⁸Kwani ni mazuri ya kuyaangalia mwako ndani,

yote pamoja yawe tayari kutumiwa na midomo yako.

¹⁹Kwa kwamba: Bwana na awe kimbilio lako,

kwa hiyo ninakufundisha leo wewe mwenyewe.

²⁰Je? Sikukuandikia mambo makuu,

yakupe mashauri mema ya kukujulisha maana?

²¹Ndiyo yatakayokujulisha maongozi ya kweli na maneno ya kweli,

upate kuwajibu maneno ya kweli wao waliokutuma.

²²Usimnyang'anye mnyonge! Kwani ni mnyonge,

wala mwenye mateso usimkanyage mlangoni!

²³Kwani Bwana huwagombea, wakigombezwa na watu,

nao wanaowapokonya huwapokonya roho zao.

²⁴Usifanye bia na mtu mwenye moyo mdogo,

wala usitembee na mtu mwenye makali kama ya moto,

²⁵kusudi usijizoeze mwenendo wake,

ukajipatia tanzi la roho yako.

²⁶Usiwe nao wanaopeana mikono

wakijitoa kuwa dhamana za wengine kwa ajili ya madeni yao!

²⁷Usipoweza kulipa halafu,

mbona wakichukue kitanda chako, unachokilalia?

²⁸Usisogeze mawe ya mipaka ya kale,

baba zako walioyayaweka!

²⁹Ukiona mtu ajihimizaye kazi zake, atakwenda kutumikia wafalme,

asitumikie watu walio watuwatu tu.