Wimbo wa Shukrani wa Daudi

¹Basi Daudi akamwambia BWANA maneno ya wimbo huu, siku ile BWANA alipomwokoa mikononi mwa adui zake wote, na mkononi mwa Sauli;[#Kut 15:1]

²akasema,[#Mwa 15:1; Kum 32:4; 1 Sam 2:2; Zab 18:2; 91:2; Mit 18:10; Mt 18:11]

BWANA ndiye jabali langu, na ngome yangu, na mwokozi wangu,

³Mungu wa mwamba wangu, nitamwamini yeye;[#Ebr 2:13; Mwa 15:1; Zab 3:3; Mit 30:5; Lk 1:69; Mit 18:10; Zab 9:9; 18:2; Isa 32:2; Isa 32:2; Yer 16:19]

Ngao yangu, na pembe ya wokovu wangu, mnara wangu, na

kimbilio langu;

Mwokozi wangu, waniokoa na jeuri.

⁴Nitamwita BWANA astahiliye kusifiwa;

Hivyo nitaokoka na adui zangu.

⁵Maana mawimbi ya mauti yalinizunguka,

Mafuriko ya uovu yakanitia hofu.

⁶Kamba za kuzimu zilinizunguka;

Mitego ya mauti ikanikabili.

⁷Katika shida yangu nilimwita BWANA,[#Zab 116:4; Yon 2:2; Kut 3:7]

Naam, nikamlalamikia Mungu wangu;

Naye akaisikia sauti yangu hekaluni mwake,

Kilio changu kikaingia masikioni mwake.

⁸Ndipo nchi ilipotikisika na kutetemeka,[#Amu 5:4; Ayu 26:11; Zab 18:7; 77:18]

Misingi ya mbinguni ikasukasuka

Na kutikisika, kwa sababu alikuwa na ghadhabu.

⁹Kukapanda moshi kutoka puani mwake,[#Zab 97:3; Hab 3:5; Ebr 12:29]

Moto ukatoka kinywani mwake ukala;

Makaa yakawashwa nao.

¹⁰Aliziinamisha mbingu akashuka;[#Isa 64:1]

Kukawa na giza kuu chini ya miguu yake.

¹¹Akapanda juu ya kerubi akaruka;[#Zab 104:3]

Naam, alionekana juu ya mabawa ya upepo.

¹²Akafanya giza hema zake za kumzunguka,

Makusanyiko ya maji, mawingu makuu ya mbinguni.

¹³Toka mwangaza uliokuwa mbele zake

Makaa ya moto yakawashwa.

¹⁴BWANA alipiga radi toka mbinguni,[#Isa 30:30]

Naye Aliye Juu akaitoa sauti yake.

¹⁵Akapiga mishale, akawatawanya;[#Kum 32:23; Zab 7:13; 77:17; Hab 3:11]

Umeme, naye akawatimua.

¹⁶Ndipo ilipoonekana mikondo ya bahari,

Misingi ya ulimwengu ikafichuliwa,

Kwa kukemea kwake BWANA,

Kwa mvumo wa pumzi ya puani mwake.

¹⁷Alipeleka kutoka juu, akanishika;

Akanitoa katika maji mengi;

¹⁸Akaniokoa na adui yangu mwenye nguvu,

Na wale walionichukia;

Maana walikuwa na nguvu kuliko mimi.

¹⁹Walinikabili siku ya msiba wangu;

Lakini BWANA alikuwa tegemeo langu.

²⁰Akanitoa akanipeleka panapo nafasi;[#Zab 31:8; 2 Sam 15:26]

Aliniponya kwa kuwa alipendezwa nami.

²¹BWANA alinitendea kulingana na haki yangu;

Kulingana na usafi wa mikono yangu akanilipa.

²²Maana nimezishika njia za BWANA,

Wala sikumwasi Mungu wangu.

²³Maana hukumu zake zote zilikuwa mbele yangu;[#Kum 7:12]

Na kuhusu amri zake, sikuziacha.

²⁴Nami nilikuwa mkamilifu kwake,[#Mwa 6:9; Ayu 1:1; Yn 1:47]

Nikajilinda na uovu wangu.

²⁵Basi BWANA amenilipa kulingana na haki yangu;

Kulingana na usafi wa mikono yangu mbele zake.

²⁶Kwa mtu mwenye fadhili utakuwa mwenye fadhili[#Mt 5:7]

Kwa mkamilifu utajionesha kuwa mkamilifu;

²⁷Kwake ajitakasaye utajionesha kuwa mtakatifu;[#Law 26:23]

Na kwa mpotovu utajionesha kuwa mkaidi.

²⁸Na watu wanaoonewa wewe utawaokoa;[#Kut 3:7; Zab 12:5; Mt 5:3]

Ila macho yako huwapinga wenye kiburi, uwadhili.

²⁹Kwa kuwa wewe u taa yangu, Ee BWANA;

Na BWANA ataniangazia giza langu.

³⁰Maana kwa msaada wako nafuatia jeshi;

Kwa msaada wa Mungu wangu ninaruka ukuta.

³¹Mungu njia yake ni kamilifu;[#Kum 32:4; Dan 4:37; Ufu 15:3; Zab 12:6; Mit 30:5]

Ahadi ya BWANA imehakikishwa;

Yeye ndiye ngao yao

Wote wanaomkimbilia.

³²Maana ni nani aliye Mungu, ila BWANA?[#Kum 32:31; 1 Sam 2:2; Isa 45:5,6]

Ni nani aliye mwamba, ila Mungu wetu?

³³Mungu ndiye ngome yangu yenye nguvu;[#Zab 27:1; Kum 18:13]

Naye huwaongoza wakamilifu katika njia yake.

³⁴Huifanya miguu yangu kuwa kama ya kulungu;[#Hab 3:19]

Na kunisimamisha mahali pangu pa juu.

³⁵Ananifundisha mikono yangu vita;

Hata mikono yangu inaupanda upinde wa shaba.

³⁶Nawe umenipa ngao ya wokovu wako;

Na unyenyekevu wako umenikuza.

³⁷Umezifanyia nafasi hatua zangu,

Wala miguu yangu haikuteleza.

³⁸Nimewafuatia adui zangu, na kuwaangamiza;

Wala sikurudi nyuma hadi walipokomeshwa.

³⁹Nami nimewakomesha na kuwapiga wasiweze kusimama;

Naam, wameanguka chini ya miguu yangu.

⁴⁰Maana umenijaza nguvu ya kupigana vita;

Ukawafanya adui zangu wafifie chini yangu.

⁴¹Naam, adui zangu umewafanya wanipe visogo,

Ili niwakatilie mbali wanaonichukia.

⁴²Walitazama, lakini hapakuwa na wa kuwaokoa;[#1 Sam 28:6; Ayu 27:9; Mit 1:28]

Walimwita BWANA, lakini hakuwajibu.

⁴³Ndipo nikawaponda kama mavumbi ya nchi,

Nikawakanyaga kama matope ya njiani, nikawatawanya.

⁴⁴Nawe umeniokoa na mashindano ya watu wangu;[#Kum 28:13; Isa 55:5]

Umenihifadhi niwe kichwa cha mataifa;

Watu nisiowajua watanitumikia.

⁴⁵Wageni walinijia wakinyenyekea;

Mara tu waliposikia habari zangu,

Walinitii.

⁴⁶Wageni nao waliishiwa nguvu,[#Mik 7:17]

Wakatoka katika ngome zao wakitetemeka.

⁴⁷BWANA yu hai;[#Zab 89:26]

Na ahimidiwe mwamba wangu;

Na atukuzwe Mungu wangu, mwamba wa wokovu wangu;

⁴⁸Naam, Mungu anilipiziaye kisasi,[#Zab 144:2]

Na kuwatweza watu chini yangu,

⁴⁹Na kuniokoa kutoka kwa adui zangu;

Naam, waniinua juu yao walioniinukia;

Ukaniokoa kutoka kwa watu wajeuri.

⁵⁰Basi, BWANA, nitakushukuru kati ya mataifa,[#Rum 15:9]

Nami nitaliimbia jina lako.

⁵¹Yeye ni mnara wa wokovu kwa mfalme wake;[#22:51 Au wokovu mkuu.]

Amfanyia fadhili masihi wake,

Kwa Daudi na wazawa wake, hata milele.