¹Katika uhuru huo Kristo alituweka huru; kwa hiyo simameni, wala msinaswe tena chini ya kongwa la utumwa.[#Gal 4:5,31; Mdo 15:10]

Asili ya uhuru wa Mkristo

²Tazama, mimi Paulo nawaambia ninyi ya kwamba, mkitahiriwa, Kristo hatawafaidi neno.[#2 Kor 10:1]

³Tena namshuhudia kila mtu atahiriwaye, kwamba ni wajibu wake kuitimiza torati yote.

⁴Mmetengwa na Kristo, ninyi mtakao kuhesabiwa haki kwa sheria; mmeanguka na kutoka katika hali ya neema.

⁵Maana sisi kwa Roho tunalitazamia tumaini la haki kwa njia ya imani.

⁶Maana katika Kristo Yesu kutahiriwa hakufai neno, wala kutotahiriwa, bali imani itendayo kazi kwa upendo.[#Gal 6:15; 1 Kor 7:19]

⁷Mlikuwa mkipiga mbio vizuri; ni nani aliyewazuia msiitii kweli?

⁸Kushawishi huku hakukutoka kwake yeye anayewaita ninyi.[#Gal 1:6]

⁹Chachu kidogo huchachua donge zima.[#1 Kor 5:6]

¹⁰Nina matumaini kwenu katika Bwana, ya kwamba hamtakuwa na nia ya namna nyingine. Lakini yeye anayewasumbua atachukua hukumu yake, awaye yote.[#Gal 1:7; 2 Kor 11:15]

¹¹Nami, ndugu zangu ikiwa ninahubiri habari ya kutahiriwa, kwa nini ningali ninaudhiwa? Kwa kufanya hivyo kikwazo cha msalaba kimeondolewa![#1 Kor 1:23]

¹²Laiti hao wanaowatia mashaka wangejikata nafsi zao![#Zab 12:3]

¹³Maana ninyi, ndugu, mliitwa mpate uhuru; lakini uhuru wenu usiwe sababu ya kuufuata mwili, bali tumikianeni kwa upendo.[#1 Pet 2:16]

¹⁴Maana torati yote imetimilika katika neno moja, nalo ni hili, Umpende jirani yako kama nafsi yako.[#Law 19:18]

¹⁵Lakini mkiumana na kulana, angalieni msije mkaangamizana.

Kazi za kimwili

¹⁶Basi nasema, Nendeni kwa Roho, wala hamtazitimiza kamwe tamaa za mwili.

¹⁷Kwa sababu mwili hutamani ukishindana na Roho, na Roho kushindana na mwili; kwa maana hizi zimepingana, hata hamwezi kufanya mnayotaka.[#Rum 7:15-23; Yak 4:5; 1 Pet 2:11]

¹⁸Lakini mkiongozwa na Roho, hampo chini ya sheria.[#Rum 8:14]

¹⁹Basi matendo ya mwili ni dhahiri, ndiyo haya, uasherati, uchafu, ufisadi,[#1 Kor 6:9,10]

²⁰ibada ya sanamu, uchawi, uadui, ugomvi, wivu, hasira, fitina, mafarakano, uzushi,

²¹husuda, ulevi, ulafi, na mambo yanayofanana na hayo, katika hayo nawaambia mapema, kama nilivyokwisha kuwaambia, ya kwamba watu watendao mambo ya jinsi hiyo hawataurithi ufalme wa Mungu.[#Efe 5:5; Ufu 22:15]

Tunda la Roho

²²Lakini tunda la Roho ni upendo, furaha, amani, uvumilivu, utu wema, fadhili, uaminifu,[#Efe 5:9]

²³upole, kiasi; juu ya mambo kama hayo hakuna sheria.[#1 Tim 1:9]

²⁴Na hao walio wa Kristo Yesu wameusulubisha mwili pamoja na mawazo yake mabaya na tamaa zake.[#Rum 6:6; Kol 3:5; 1 Pet 2:11]

²⁵Tukiishi kwa Roho, na tuenende kwa Roho.[#Rum 8:4]

²⁶Tusijisifu bure, tukichokozana na kuhusudiana.[#Flp 2:3]