Mungu awasihi Waisraeli watubu

¹Neno la BWANA likanijia, kusema,

²Nenda ukalie masikioni mwa Yerusalemu, ukisema, BWANA asema hivi,[#Eze 16:8; Hos 2:15]

Nakukumbuka, hisani ya ujana wako,

upendo wa wakati wa kuposwa kwako;

Jinsi ulivyonifuata huko jangwani,

katika nchi isiyopandwa mbegu.

³Israeli walikuwa utakatifu kwa BWANA;[#Yak 1:18; Ufu 14:4]

malimbuko ya uzao wake;

Wote watakaomla watakuwa na hatia;

uovu utawajia; asema BWANA.

⁴Lisikieni neno la BWANA, ninyi nyumba ya Yakobo, na ninyi, jamaa zote za nyumba ya Israeli.

⁵BWANA asema hivi, Baba zenu waliona dhuluma gani kwangu, hata wakafarakana nami, wakafuata ubatili, nao wakawa ubatili?[#Isa 5:4; Mik 6:3; Isa 44:9; Rum 1:21]

⁶Wala hawakusema, Yuko wapi BWANA, aliyetutoa katika nchi ya Misri; akatuongoza jangwani, katika nchi ya ukame na mashimo, katika nchi ya kiu na ya kivuli cha mauti, katika nchi ambayo ndani yake hapiti mtu, wala haikukaliwa na watu?

⁷Nami nikawatia katika nchi ya shibe, mpate kula matunda yake na mema yake; lakini ninyi mlipoingia katika nchi ile, mliitia unajisi nchi yangu, na urithi wangu mliufanya kuwa chukizo.

⁸Makuhani hawakusema, Yuko wapi BWANA? Wala wanasheria hawakunijua; wachungaji nao waliniasi, nao manabii walitoa unabii kwa Baali, wakafuata mambo yasiyofaidia kitu.[#Mal 2:6; Rum 2:20]

⁹Basi, kwa ajili ya hayo nitateta nanyi, asema BWANA, nami nitateta na watoto wa watoto wenu.[#Isa 3:13; Hos 2:2; Mik 6:2]

¹⁰Maana, vukeni mpaka visiwa vya Kitimu, mkaone; tumeni watu waende Kedari, mkafikiri sana; mkaone kwamba jambo kama hili limekuwa wakati wowote.

¹¹Je! Taifa wamebadili miungu yao, ingawa siyo miungu? Lakini watu wangu wameubadili utukufu wao kwa ajili ya kitu kisichofaidia.[#Mik 4:5; Zab 106:20; Rum 1:23]

¹²Enyi mbingu, staajabuni kwa ajili ya jambo hili, mkaogope sana, na kuwa ukiwa sana, asema BWANA.

¹³Kwa maana watu wangu hawa wametenda maovu mawili; wameniacha mimi, niliye chemchemi ya maji ya uzima, wamejichimbia visima, visima vyenye nyufa visivyoweza kuweka maji.[#Zab 36:9; Yer 17:13; Ufu 21:6]

¹⁴Je! Israeli ni mtumwa? Je! Ni mzalia?

Mbona amekuwa mateka?

¹⁵Wanasimba wamenguruma juu yake,

wametoa sana sauti zao;

Nao wameifanya nchi yake kuwa ukiwa;

miji yake imeteketea, haina watu.

¹⁶Tena wana wa Nofu na Tapanesi wamevunja utosi wa kichwa chako.

¹⁷Je! Hukujipatia mambo haya mwenyewe, kwa kuwa umemwacha BWANA, Mungu wako, alipokuongoza njiani?

¹⁸Na sasa una nini utakayofaidi katika njia iendayo Misri, kunywa maji ya Shihori? Au una nini utakayofaidi katika njia iendayo Ashuru, kunywa maji ya ule Mto?[#Isa 30:1,2; Eze 17:15]

¹⁹Uovu wako mwenyewe utakurudi, maasi yako yatakukaripia; ujue, basi, ukaone, ya kuwa ni jambo baya sana na uchungu, kuwa umemwacha BWANA, Mungu wako, na ya kuwa moyoni mwako hamna kunihofu, asema Bwana, BWANA wa majeshi.[#Isa 3:9; Hos 5:5; Kut 19:8]

²⁰Kwa maana tangu zamani wewe umeivunja nira yako, na kuvipasua vifungo vyako; ukasema, Mimi sitatumika; kwa maana juu ya kila kilima kirefu, na chini ya kila mti wenye majani mabichi, umejiinamisha, ukafanya mambo ya ukahaba.

²¹Nami nilikuwa nimekupanda, mzabibu mwema sana, mbegu nzuri kabisa; umegeukaje, basi, kuwa mche usiofaa wa mzabibumwitu machoni pangu?[#Zab 80:8; Mt 21:33; Mk 12:1]

²²Maana ujapojiosha kwa magadi, na kujipatia sabuni nyingi, lakini uovu wako umeandikwa mbele zangu, asema Bwana MUNGU.[#Kum 32:34; Zab 90:8; Hos 13:12]

²³Wawezaje kusema, Sikutiwa unajisi, sikuwafuata Mabaali? Itazame njia yako bondeni, ujue uliyoyatenda; wewe u ngamia mwepesi, apitaye katika njia zake;[#Mwa 3:12,13; Mit 30:12; Rum 3:19; Yer 7:31]

²⁴punda wa mwitu aliyeizoelea nyika, avutaye pumzi za upepo katika tamaa yake; katika wakati wake ni nani awezaye kumgeuza? Wote wamtafutao hawatajichosha nafsi zao; katika mwezi wake watamwona.

²⁵Zuia mguu wako usikose kiatu, na koo yako isiwe na kiu; lakini wewe ulisema, Hakuna matumaini kabisa; la, maana nimewapenda wageni, nami nitawafuata.

²⁶Kama mwizi aonavyo haya akamatwapo, ndivyo waonavyo haya nyumba ya Israeli; wao, na wafalme wao, na wakuu wao, na makuhani wao, na manabii wao;

²⁷waliambiao gogo la mti, Wewe u baba yangu; na kuliambia jiwe, Ndiwe uliyenizaa; kwa maana wamenipa mimi visogo, wala hawakunielekezea nyuso zao; lakini wakati wa taabu watasema, Simama ukatuokoe.[#Amu 10:10]

²⁸Lakini wako wapi miungu yako ulioifanya? Na wasimame hao, kama wakiweza kukuokoa wakati wa taabu yako; kwa maana hesabu ya miungu yako ni sawa na hesabu ya miji yako, Ee Yuda.[#Kum 32:37; Isa 45:20]

²⁹Mbona mnataka kuteta nami? Ninyi nyote mmeniasi, asema BWANA.

³⁰Nimewapiga watoto wako bure; hawakukubali kurudiwa; upanga wenu wenyewe umewala manabii wako, kama simba aharibuye.[#2 Nya 36:16; Mt 23:29; Lk 13:33,34; Mdo 7:52; 1 The 2:15]

³¹Ee kizazi litazameni neno la BWANA. Je! Nimekuwa jangwa kwa Israeli? Au nchi yenye giza kuu? Mbona watu wangu wanasema, Sisi tumetoroka, hatutaki kuja kwako tena?

³²Je! Mwanamwali aweza kusahau mapambo yake, au bibi arusi mavazi yake? Lakini watu wangu wamenisahau mimi kwa muda wa siku zisizo na hesabu.[#Zab 106:21; Yer 13:25; Hos 8:14]

³³Jinsi ulivyoitengeneza njia yako ili kutafuta mapenzi! Kwa sababu hiyo hata wanawake wabaya umewafundisha njia zako.

³⁴Tena katika pindo za nguo zako imeonekana damu ya roho zao maskini wasio na hatia; sikuiona penye mahali palipobomoka, lakini niliiona juu ya hawa wote.[#Zab 106:38; Yer 19:4]

³⁵Lakini ulisema, Sina hatia mimi; bila shaka hasira yake imegeuka na kuniacha. Tazama, nitaingia hukumuni pamoja nawe, kwa sababu unasema, Sikutenda dhambi mimi.[#Mit 28:13]

³⁶Mbona unatangatanga hivi upate kugeuza mwendo wako? Utaona haya kwa ajili ya Misri pia, kama ulivyoona haya kwa ajili ya Ashuru.[#Yer 31:22; 37:7; Hos 5:13; Isa 30:3; 2 Nya 28:16,21]

³⁷Hata kwake pia utatoka, na mikono yako juu ya kichwa chako; kwa maana BWANA amewakataa uliowakimbilia, wala hutafanikiwa katika hao.[#2 Sam 13:19]