Kujaribiwa kwa Yesu

¹Na Yesu, akiwa amejaa Roho Mtakatifu, alirudi kutoka Yordani, akaongozwa na Roho kwa muda wa siku arubaini nyikani,[#Mt 4:1-11; Mk 1:12,13]

²akijaribiwa na Ibilisi. Na siku hizo alikuwa hali kitu; na zilipotimia, aliona njaa.

³Ibilisi akamwambia, Ukiwa ndiwe Mwana wa Mungu, liambie jiwe hili liwe mkate.

⁴Yesu akamjibu, Imeandikwa ya kwamba mtu hataishi kwa mkate tu.[#Kum 8:3]

⁵Akampandisha juu, akamwonesha milki zote za ulimwengu kwa dakika moja.

⁶Ibilisi akamwambia, Nitakupa wewe enzi hii yote, na fahari yake, kwa kuwa imo mikononi mwangu, nami humpa yeyote kama nipendavyo.

⁷Basi, wewe ukisujudu mbele yangu yote yatakuwa yako.

⁸Yesu akajibu akamwambia, Imeandikwa, Msujudie Bwana Mungu wako, umwabudu yeye peke yake.[#Kum 6:13,14]

⁹Akamwongoza mpaka Yerusalemu, akamweka juu ya kinara cha hekalu, akamwambia, Ukiwa ndiwe Mwana wa Mungu, jitupe chini;

¹⁰kwa maana imeandikwa,[#Zab 91:11,12]

Atakuagizia malaika zake wakulinde;

¹¹na ya kwamba,[#Zab 91:12]

Mikononi mwao watakuchukua,

Usije ukajikwaa mguu wako katika jiwe.

¹²Yesu akajibu akamwambia, Imenenwa, Usimjaribu Bwana Mungu wako.[#Kum 6:16]

¹³Basi alipomaliza kila jaribu, Ibilisi akamwacha akaenda zake kwa muda.[#Ebr 4:15]

Kuanza kwa huduma ya Galilaya

¹⁴Yesu akarudi kwa nguvu za Roho, akaendea Galilaya; habari zake zikaenea katika nchi zote za kandokando.[#Mt 4:12-17; Mk 1:14,15]

¹⁵Naye alikuwa akifundisha katika masinagogi yao, akitukuzwa na watu wote.

Kukataliwa kwa Yesu huko Nazareti

¹⁶Akaenda Nazareti, hapo alipolelewa; na siku ya sabato akaingia katika sinagogi kama ilivyokuwa desturi yake, akasimama ili asome.[#Mt 13:53-58; Mk 6:1-6]

¹⁷Akapewa kitabu cha nabii Isaya, akakifungua kitabu, akapata mahali palipoandikwa,[#Isa 61:1,2; 58:6]

¹⁸Roho wa Bwana yu juu yangu,[#Isa 61:1-2]

Kwa maana amenitia mafuta kuwahubiria maskini Habari Njema.

Amenituma kuwatangazia wafungwa kufunguliwa kwao,

Na vipofu kupata kuona tena,

Kuwaacha huru waliosetwa,

¹⁹Na kutangaza mwaka wa Bwana uliokubaliwa.[#Law 25:10]

²⁰Akakifunga kitabu, akamrudishia mtumishi, akaketi; na watu wote waliokuwamo katika sinagogi wakamkazia macho.

²¹Akaanza kuwaambia, Leo maandiko haya yametimia masikioni mwenu.

²²Wakamshuhudia wote, wakiyastaajabia maneno ya neema yaliyotoka kinywani mwake, wakasema, Huyu siye mwana wa Yusufu?[#Yn 6:42]

²³Akawaambia, Bila shaka mtaniambia mithali hii, Tabibu, jiponye nafsi yako; mambo yote tuliyosikia kwamba yametendeka Kapernaumu, yatende na hapa pia katika nchi yako mwenyewe.[#Mt 4:13]

²⁴Akasema, Amin, nawaambia ya kwamba, Hakuna nabii anayekubaliwa katika nchi yake mwenyewe.[#Yn 4:44]

²⁵Lakini, kwa hakika nawaambia, Palikuwa na wajane wengi katika nchi ya Israeli zamani za Eliya, wakati mbingu zilipofungwa miaka mitatu na miezi sita, njaa kuu ikaingia katika nchi nzima;[#1 Fal 17:1,9; 18:1; Yak 5:17]

²⁶wala Eliya hakutumwa kwa mmojawapo, ila kwa mjane mmoja wa Sarepta katika nchi ya Sidoni.[#1 Fal 17:8-16]

²⁷Tena, palikuwa na wenye ukoma wengi katika Israeli zamani za nabii Elisha, wala hapana aliyetakaswa ila Naamani, mtu wa Shamu.[#2 Fal 5:1-14]

²⁸Wakajaa ghadhabu wote waliokuwa katika sinagogi walipoyasikia hayo.

²⁹Wakaondoka wakamtoa nje ya mji, wakampeleka mpaka ukingo wa kilima ambacho mji wao umejengwa juu yake, wapate kumtupa chini;

³⁰lakini yeye alipita katikati yao, akaenda zake.

Mtu aliyekuwa na pepo mchafu

³¹Akashuka mpaka Kapernaumu, mji wa Galilaya, akawa akiwafundisha siku ya sabato;[#Mk 1:21-28; #Mt 4:13; Yn 2:12]

³²wakashangaa mno kwa mafundisho yake, kwa kuwa neno lake lilikuwa na uwezo.[#Mt 7:28-29; Yn 7:46]

³³Na ndani ya sinagogi mlikuwa na mtu mwenye roho ya pepo mchafu, akalia kwa sauti kuu,

³⁴akisema, Acha! Tuna nini nawe, Yesu wa Nazareti? Umekuja kutuangamiza? Nakujua u nani, Mtakatifu wa Mungu.

³⁵Yesu akamkemea, akisema, Fumba kinywa, mtoke. Ndipo yule pepo akamwangusha katikati, akamtoka pasipo kumdhuru.

³⁶Mshangao ukawashika wote, wakasemezana wakisema, Ni neno gani hili, maana awaamuru pepo wachafu kwa uwezo na nguvu, nao hutoka.

³⁷Habari zake zikaenea kila mahali katika nchi ile.

Uponyaji nyumbani mwa Simoni

³⁸Akatoka katika sinagogi, akaingia katika nyumba ya Simoni. Naye mkwewe Simoni, mamaye mkewe, alikuwa ameshikwa na homa kali, wakamwomba kwa ajili yake.[#Mt 8:14-17; Mk 1:29-39]

³⁹Akasimama karibu naye, akaikemea ile homa, ikamwacha; mara hiyo akainuka, akawatumikia.

⁴⁰Na jua lilipokuwa likichwa, wote waliokuwa na wagonjwa wenye maradhi mbalimbali waliwaleta kwake, akaweka mikono yake juu ya kila mmoja akawaponya.

⁴¹Pepo nao waliwatoka watu wengi, wakipiga kelele na kusema, Wewe u Mwana wa Mungu. Akawakemea, asiwaache kunena, kwa sababu walimjua kuwa ndiye Kristo.[#Mt 8:29; Mk 3:11,12]

Yesu ahubiri katika masinagogi

⁴²Hata kulipokucha alitoka akaenda mahali pasipokuwa na watu; makutano wakawa wakimtafutatafuta, na walipomfikia, wakataka kumzuia asiondoke kwao.

⁴³Akawaambia, Imenipasa kuihubiri Habari Njema ya ufalme wa Mungu katika miji mingine pia; maana nilitumwa kwa sababu hiyo.[#Lk 8:1]

⁴⁴Basi, alikuwa akihubiri katika masinagogi ya Galilaya.[#Mt 4:23]