Kufufuka kwa Yesu

¹Na sabato ilipokwisha, ikipambazuka siku ya kwanza ya juma, Mariamu Magdalene, na Mariamu yule wa pili, walikwenda kulitazama kaburi.[#Mk 16:1-10; Lk 24:1-10; Yn 20:1-18]

²Na tazama, palikuwa na tetemeko kubwa la ardhi; kwa sababu malaika wa Bwana alishuka kutoka mbinguni, akaja akalivingirisha lile jiwe akalikalia.

³Na sura yake ilikuwa kama umeme, na mavazi yake meupe kama theluji.[#Mt 17:2; Mdo 1:10]

⁴Na kwa kumwogopa, wale walinzi wakatetemeka, wakawa kama wafu.

⁵Malaika akajibu, akawaambia wale wanawake, Msiogope ninyi; kwa maana najua ya kuwa mnamtafuta Yesu aliyesulubiwa.

⁶Hayupo hapa; maana amefufuka kama alivyosema. Njooni, mpatazame mahali alipolazwa.[#Mt 12:40; 16:21; 17:23; 20:19; Mdo 2:36]

⁷Nanyi nendeni upesi, mkawaambie wanafunzi wake, Amefufuka katika wafu. Tazama, awatangulia kwenda Galilaya; ndiko mtakakomwona. Haya, nimekwisha waambia.[#Mt 26:32]

⁸Wakaondoka upesi kutoka kaburini, kwa hofu na furaha nyingi, wakaenda mbio kuwapasha wanafunzi wake habari.

⁹Na tazama, Yesu akakutana nao, akisema, Salamu! Wakakaribia wakamshika miguu, wakamsujudia.

¹⁰Kisha Yesu akawaambia, Msiogope; nendeni, mkawaambie ndugu zangu waende Galilaya, ndiko watakakoniona.[#Ebr 2:11; Mwa 45:4; 50:19]

Ripoti ya walinzi

¹¹Nao wale walipokuwa wakienda, tazama, baadhi ya walinzi waliingia mjini, wakawaambia wakuu wa makuhani juu ya mambo yote yaliyotendeka.

¹²Wakakusanyika pamoja na wazee, wakafanya shauri, wakawapa askari fedha nyingi,

¹³wakisema, Semeni, ya kwamba wanafunzi wake walikuja usiku, wakamwiba, sisi tulipokuwa tumelala.[#Mt 27:64]

¹⁴Na jambo hili likisikika kwa mtawala, sisi tutasema naye, nanyi hamtapata shida.

¹⁵Basi wakazitwaa zile fedha, wakafanya kama walivyofundishwa. Na neno hilo likaenea kati ya Wayahudi hata leo.

Kutumwa kwa wanafunzi

¹⁶Na wale wanafunzi kumi na mmoja wakaenda Galilaya hadi katika mlima ule aliowaagiza Yesu.[#Mt 26:32; Mk 14:28; Mt 28:7]

¹⁷Nao walipomwona, walimsujudia; lakini baadhi yao walikuwa na mashaka.

¹⁸Yesu akaja kwao, akasema nao, akawaambia, Nimepewa mamlaka yote mbinguni na duniani.[#Mt 11:27; Efe 1:20-22; Dan 7:14]

¹⁹Basi, nendeni, mkawafanye mataifa yote kuwa wanafunzi, mkiwabatiza kwa jina la Baba, na Mwana, na Roho Mtakatifu;[#Mdo 1:8; Mk 16:15,16]

²⁰na kuwafundisha kuyashika yote niliyowaamuru ninyi; na tazama, mimi nipo pamoja nanyi siku zote, hata ukamilifu wa dahari.[#Mt 18:20; Yn 14:23]