Kuwahukumu wengine

¹Msihukumu, msije mkahukumiwa ninyi.[#Rum 2:1; 1 Kor 4:5]

²Kwa kuwa hukumu ile mhukumuyo, ndiyo mtakayohukumiwa; na kipimo kile mpimiacho, ndicho mtakachopimiwa.[#Mk 4:24]

³Basi, mbona wakitazama kibanzi kilicho ndani ya jicho la ndugu yako, na boriti iliyo ndani ya jicho lako mwenyewe huioni?

⁴Au utamwambiaje nduguyo, Niache nikitoe kibanzi katika jicho lako; na kumbe! Mna boriti ndani ya jicho lako mwenyewe?

⁵Mnafiki wewe, itoe kwanza ile boriti katika jicho lako mwenyewe; ndipo utakapoona vema kukitoa kile kibanzi katika jicho la ndugu yako.

Kutweza kitakatifu

⁶Msiwape mbwa kilicho kitakatifu, wala msitupe lulu zenu mbele ya nguruwe, wasije wakazikanyaga chini ya miguu yao, wakageuka na kuwararua.[#Mt 10:11]

Omba, tafuta, bisha

⁷Ombeni, nanyi mtapewa; tafuteni, nanyi mtaona; bisheni, nanyi mtafunguliwa;[#Mk 11:24; Lk 11:9-13; Yer 29:13,14; Yn 14:13; 16:23]

⁸kwa maana kila aombaye hupokea; naye atafutaye huona; naye abishaye atafunguliwa.

⁹Au kuna mtu yupi kwenu, ambaye, mwanawe akimwomba mkate, atampa jiwe?

¹⁰Au akiomba samaki, atampa nyoka?

¹¹Basi ikiwa ninyi, mlio waovu, mnajua kuwapa watoto wenu zawadi njema, je! Si Baba yenu aliye mbinguni atawapa mema zaidi wao wamwombao?[#Yak 1:17]

Amri kuu

¹²Basi yoyote myatakayo mtendewe na watu, nanyi watendeeni vivyo hivyo; maana hiyo ndiyo Torati na Manabii.[#Lk 6:31; Mt 22:39,40; Rum 13:8-10]

Mlango mwembamba

¹³Ingieni kwa kupitia mlango ulio mwembamba; maana mlango ni mpana, na njia ni pana iendayo upotevuni, nao ni wengi waingiao kwa mlango huo.[#Lk 13:24; Yn 10:7,9]

¹⁴Bali mlango ni mwembamba, na njia imebana iendayo uzimani, nao waionao ni wachache.[#Mt 19:24; Mdo 14:22]

Mti na matunda yake

¹⁵Jihadharini na manabii wa uongo, watu wanaowajia wakiwa wamevaa mavazi ya kondoo, lakini kwa ndani ni mbwamwitu wakali.[#Mt 24:4,5,24; Mdo 20:29]

¹⁶Mtawatambua kwa matunda yao. Je! Watu huchuma zabibu katika miiba, au tini katika mibaruti?[#Gal 5:19-22; Yak 3:12]

¹⁷Vivyo hivyo kila mti mwema huzaa matunda mazuri; na mti mwovu huzaa matunda mabaya.[#Mt 12:33]

¹⁸Mti mwema hauwezi kuzaa matunda mabaya, wala mti mwovu kuzaa matunda mazuri.

¹⁹Kila mti usiozaa tunda zuri hukatwa ukatupwa motoni.[#Mt 3:10; Lk 3:9; Yn 15:2,6]

²⁰Ndiposa kwa matunda yao mtawatambua.[#Mt 12:33]

Kuhusu wanaojihadaa

²¹Si kila mtu aniambiaye, Bwana, Bwana, atakayeingia katika ufalme wa mbinguni; bali ni yeye afanyaye mapenzi ya Baba yangu aliye mbinguni.[#Mt 21:29; Rum 2:13; Yak 1:22,25; 2:14; 1 Kor 12:3]

²²Wengi wataniambia siku ile, Bwana, Bwana, hatukufanya unabii kwa jina lako, na kwa jina lako kutoa pepo, na kwa jina lako kufanya miujiza mingi?[#Yer 14:14; 27:15; Lk 13:25-27; 1 Kor 13:1,2]

²³Ndipo nitawaambia dhahiri, Sikuwajua ninyi kamwe; ondokeni kwangu, ninyi mtendao maovu.[#Zab 6:9; Mt 13:41; 25:41; 2 Tim 2:19]

Wasikiao na watendao

²⁴Basi kila asikiaye hayo maneno yangu, na kuyafanya, atafananishwa na mtu mwenye akili, aliyejenga nyumba yake juu ya mwamba;[#Mt 7:21]

²⁵mvua ikanyesha, mafuriko yakaja, pepo zikavuma, zikaipiga nyumba ile, isianguke; kwa maana misingi yake imewekwa juu ya mwamba.

²⁶Na kila asikiaye hayo maneno yangu asiyafanye, atafananishwa na mtu mpumbavu, aliyejenga nyumba yake juu ya mchanga;

²⁷mvua ikanyesha, mafuriko yakaja, pepo zikavuma, zikaipiga nyumba ile, ikaanguka; nalo anguko lake likawa kubwa.[#Eze 13:10,11]

²⁸Ikawa, Yesu alipoyamaliza maneno hayo, makutano walishangaa mno kwa mafundisho yake;[#Mk 1:22; Lk 4:32; Mt 11:1; 13:53; 19:1; 26:1]

²⁹kwa maana alikuwa akiwafundisha kama mtu mwenye mamlaka, wala si kama waandishi wao.[#Yn 7:46]