Mahubiri ya Yohana Mbatizaji

¹Mwanzo wa Injili ya Yesu Kristo, Mwana wa Mungu.

²Kama ilivyoandikwa katika nabii Isaya,[#Mal 3:1; Mt 11:10; Yn 3:28]

Tazama, namtuma mjumbe wangu

Mbele ya uso wako,

Atakayeitengeneza njia yako.

³Sauti ya mtu aliaye nyikani,[#Isa 40:3]

Itengenezeni njia ya Bwana,

Yanyosheni mapito yake.

⁴Yohana alitokea, akibatiza nyikani, na kuuhubiri ubatizo wa toba liletalo ondoleo la dhambi.

⁵Wakamwendea nchi yote ya Yudea, nao wa Yerusalemu wote, wakabatizwa katika mto wa Yordani, wakiziungama dhambi zao.

⁶Na Yohana alikuwa amevaa singa za ngamia na mshipi wa ngozi kiunoni mwake, akala nzige na asali ya mwituni.[#2 Fal 1:8; Zek 13:4]

⁷Akahubiri akisema, Yuaja nyuma yangu aliye na nguvu kuliko mimi, ambaye mimi sistahili kuinama na kuilegeza gidamu ya viatu vyake.[#Mdo 13:25]

⁸Mimi niliwabatiza kwa maji; bali yeye atawabatiza kwa Roho Mtakatifu.

Kubatizwa kwa Yesu

⁹Ikawa siku zile, Yesu alikuja kutoka Nazareti ya Galilaya, akabatizwa na Yohana katika Yordani.[#Lk 2:51; #Mt 3:13-17; Lk 3:21-22; Yn 1:31-34]

¹⁰Mara alipopanda kutoka majini, akaona mbingu zinapasuka, na Roho, kama hua, akishuka juu yake;

¹¹na sauti ikatoka mbinguni, Wewe ndiwe Mwanangu, mpendwa wangu; nimependezwa nawe.[#Mwa 22:2; Zab 2:7; Isa 42:1; Mt 3:17; 12:18; Mk 9:7; Lk 3:22]

Kujaribiwa kwa Yesu

¹²Mara Roho akamtoa aende nyikani.[#Mt 4:1-11; Lk 4:1-13]

¹³Akawako huko jangwani siku arubaini, hali akijaribiwa na Shetani; naye alikuwa pamoja na wanyama wa mwituni, na malaika walikuwa wakimhudumia.[#Zab 91:13; Yn 1:51]

Mwanzo wa huduma katika Galilaya

¹⁴Hata baada ya Yohana kutiwa gerezani, Yesu akaenda Galilaya, akiihubiri Habari Njema ya Mungu,[#Mt 4:12-17; Lk 4:14,15]

¹⁵akisema, Wakati umetimia, na ufalme wa Mungu umekaribia; tubuni, na kuiamini Injili.[#Mt 3:2; Gal 4:4]

Yesu awaita wanafunzi wa kwanza

¹⁶Naye alipokuwa akipita kando ya bahari ya Galilaya, akamwona Simoni na Andrea nduguye, wakitupa jarife baharini; kwa maana walikuwa wavuvi.[#Mt 4:18-22; Lk 5:1-11]

¹⁷Yesu akawaambia, Njooni mnifuate, nami nitawafanya kuwa wavuvi wa watu.[#Mt 13:47]

¹⁸Mara wakaziacha nyavu zao, wakamfuata.

¹⁹Akaendelea mbele kidogo, akamwona Yakobo wa Zebedayo, na Yohana nduguye, nao pia walikuwa katika mashua, wakizitengeneza nyavu zao.

²⁰Mara akawaita, wakamwacha baba yao Zebedayo ndani ya mashua pamoja na wafanya kazi wakaenda, wakamfuata.

Mtu mwenye pepo mchafu

²¹Wakashika njia mpaka Kapernaumu, na mara siku ya sabato akaingia katika sinagogi, akafundisha.[#Lk 4:31-37; #Mt 4:13]

²²Wakashangaa mno kwa mafundisho yake; kwa maana alikuwa akiwafundisha kama mtu mwenye mamlaka, wala si kama waandishi.[#Mt 7:28,29]

²³Na mara palikuwapo ndani ya sinagogi lao mtu mwenye pepo mchafu; akapaza sauti,

²⁴akisema, Tuna nini nawe, Yesu wa Nazareti? Je! Umekuja kutuangamiza?[#Mk 5:7; Zab 16:10]

²⁵Nakutambua u nani, Mtakatifu wa Mungu. Yesu akamkemea, akisema, Fumba kinywa, umtoke.

²⁶Yule pepo mchafu akamtia kifafa, akalia kwa sauti kuu, akamtoka.[#Mk 9:26]

²⁷Wakashangaa wote, hata wakaulizana, wakisema, Nini hii? Ni elimu mpya! Maana kwa uweza awaamuru hata pepo wachafu, nao wamtii!

²⁸Habari zake zikaenea haraka kote katika nchi zote kandokando ya Galilaya.

Yesu awaponya wengi katika nyumba ya Simoni

²⁹Na mara walipotoka katika sinagogi, walifika nyumbani kwa Simoni na Andrea, pamoja na Yakobo na Yohana.[#Mt 8:14-16; Lk 4:38-41]

³⁰Naye mkwewe Simoni, mamaye mkewe, alikuwa kitandani, akiugua homa; na mara wakamwambia habari zake.

³¹Akamkaribia, akamwinua kwa kumshika mkono, homa ikamwacha, akaanza kuwatumikia.

³²Hata kulipokuwa jioni, na jua limekwisha kuchwa, walikuwa wakimletea wote waliokuwa wagonjwa, na wenye pepo.

³³Na mji wote ulikuwa umekusanyika mlangoni.

³⁴Akaponya wengi waliokuwa na maradhi mbalimbali, akatoa pepo wengi, wala hakuwaacha pepo kunena, kwa sababu walimjua.[#Lk 4:41; Mdo 16:17,18]

Yesu ahubiri katika Galilaya

³⁵Hata alfajiri na mapema sana akaondoka, akatoka akaenda zake mahali pasipokuwa na watu, akaomba huko.[#Lk 4:42-44]

³⁶Simoni na wenziwe wakamfuata;

³⁷nao walipomwona wakamwambia, Watu wote wanakutafuta.

³⁸Akawaambia, Twendeni mahali pengine, katika vijiji vilivyo karibu, nipate kuhubiri huko nako; maana nilikuja kwa ajili ya hilo.

³⁹Akaenda akihubiri katika masinagogi yao, katika nchi yote ya Galilaya, na kutoa pepo.[#Mt 4:23; 9:35]

Yesu amtakasa mtu mwenye ukoma

⁴⁰Akaja kwake mtu mwenye ukoma, akamsihi na kumpigia magoti, na kumwambia, Ukitaka, waweza kunitakasa.[#Mt 8:2-4; Lk 5:12-16]

⁴¹Naye akamhurumia, akanyosha mkono wake, akamgusa, akamwambia, Nataka, takasika.

⁴²Na mara ukoma wake ukamtoka, akatakasika.

⁴³Akamkataza kwa nguvu, akamwondoa mara,[#Mk 3:12; 7:36]

⁴⁴akamwambia, Angalia, usimwambie mtu neno lolote, ila nenda zako ukajioneshe kwa kuhani, ukatoe alivyoamuru Musa kwa ajili ya kutakasika kwako, iwe ushuhuda kwao.[#Law 14:1-32; Law 13:49]

⁴⁵Lakini akatoka, akaanza kuhubiri maneno mengi, na kulitangaza lile neno, hata Yesu asiweze tena kuingia mjini waziwazi; bali alikaa nje mahali pasipokuwa na watu, wakamwendea kutoka kila upande.