Uhasama wa Kora, Dathani na Abiramu

¹Basi Kora, mwana wa Ishari, mwana wa Kohathi, mwana wa Lawi, akatwaa watu, pamoja na Dathani na Abiramu, wana wa Eliabu, na Oni, mwana wa Pelethi, waliokuwa wana wa Reubeni;[#Yud 1:11]

²nao, pamoja na watu kadhaa wa wana wa Israeli, watu mia mbili na hamsini, Wakuu wa mkutano, waliokuwa wateule wa mkutano, watu wenye sifa, wakainuka mbele ya Musa;[#Hes 26:9]

³nao wakakusanyika kinyume cha Musa na Haruni, na kuwaambia, Ninyi inawatosha, kwa kuwa mkutano wote ni mtakatifu, kila mmoja miongoni mwao, BWANA naye yuko kati yao; ya nini basi kujitukuza juu ya mkutano wa BWANA?[#Zab 106:16; Kut 19:6; 29:45]

⁴Musa aliposikia maneno haya, akaanguka kifudifudi;[#Hes 20:6]

⁵kisha akanena na Kora na mkutano wake wote, akawaambia, Asubuhi BWANA ataonesha ni kina nani walio wake, kisha ni nani aliye mtakatifu, tena ni nani atakayemkaribisha kwake; maana, yeye atakayemchagua ndiye atakayemsongeza kwake.[#2 Tim 2:19; Law 21:6-12; Kut 28:1; 1 Sam 2:28; Zab 105:26; Law 10:3; Eze 40:46]

⁶Fanyeni neno hili; twaeni vyetezo, ninyi Kora na mkutano wake wote;

⁷vitieni na moto, mkaweke na uvumba juu yake mbele za BWANA kesho; kisha itakuwa ya kwamba mtu atakayechaguliwa na BWANA, yeye atakuwa mtakatifu; inawatosha ninyi, enyi wana wa Lawi.

⁸Musa akamwambia Kora, Sikilizeni basi, enyi Wana wa Lawi;

⁹Je! Mwaona kuwa ni jambo dogo kwenu, kuwa Mungu wa Israeli amewatenga ninyi na mkutano wa Israeli, ili apate kuwakaribisha kwake; ili mhudumu katika maskani ya BWANA, na kusimama mbele ya mkutano ili kuwatumikia;[#1 Sam 18:23; Isa 7:13; Kum 10:8]

¹⁰tena ya kuwa amekuleta uwe karibu, na ndugu zako wote wana wa Lawi pamoja nawe? Nanyi, je! Mwataka na ukuhani pia?

¹¹Kwa sababu hii wewe na mkutano wako wote mmekusanyika kinyume cha BWANA; na Haruni, je! Yeye ni nani hata mkamnung'unikia?[#Kut 16:8; 1 Kor 3:5]

¹²Kisha Musa akatuma ujumbe wa kuwaita Dathani na Abiramu wana wa Eliabu; nao wakasema, “Hatuji sisi”;

¹³je! Ni jambo dogo, wewe kutuleta kutoka nchi iliyobubujika na maziwa na asali, ili kutuua jangwani, lakini pamoja na haya wajikuza mwenyewe uwe mkuu juu yetu kabisa?[#Kut 2:14; Mdo 7:27,35]

¹⁴Kisha, hukutuleta katika nchi iliyojawa na maziwa na asali, wala hukutupa urithi wa mashamba, na mashamba ya mizabibu; je! Unataka kuwatoboa macho watu hawa? Hatuji.[#Kut 3:8; Law 20:24]

¹⁵Musa akakasirika sana, akamwambia BWANA. Usiikubali sadaka yao; mimi sikutwaa hata punda mmoja kwao, wala sikumwumiza hata mtu mmoja miongoni mwao.[#Mwa 4:4,5; 1 Sam 12:3; Mdo 20:33; 2 Kor 7:2]

¹⁶Kisha Musa akamwambia Kora, Wewe na mkutano wako wote kuweni hapa mbele ya BWANA kesho, wewe, na wao, na Haruni;

¹⁷mkatwae kila mtu chetezo chake, na kutia uvumba juu yake, mkavilete mbele za BWANA, vyetezo mia mbili na hamsini; wewe pia, na Haruni, kila mtu na awe na chetezo chake.

¹⁸Basi wakavitwaa kila mtu chetezo chake, wakatia na moto ndani yake, wakatia na uvumba juu ya moto, na kusimama pale mlangoni pa hema ya kukutania, pamoja na Musa na Haruni.

¹⁹Kisha Kora akakutanisha mkutano wote kinyume chao mlangoni pa hema ya kukutania; na utukufu wa BWANA ukatokea mbele ya mkutano wote.[#Kut 16:7,10; Law 9:6,23]

²⁰Kisha BWANA akanena na Musa na Haruni, na kuwaambia,

²¹Jitengeni ninyi mkaondoke kati ya mkutano huu, ili nipate kuwaangamiza mara moja.[#Mwa 19:17; Yer 51:6; Mdo 2:40; Ufu 18:4; Kut 32:10; 33:5; Zab 73:19; Isa 37:36]

²²Nao wakaanguka kifudifudi, wakasema, Ee Mungu, Mungu wa roho za wenye mwili wote, je! Mtu mmoja atafanya dhambi, nawe utaukasirikia mkutano wote?[#Ayu 12:10; Mhu 12:7; Isa 57:16; Zek 12:1; Ebr 12:9; 2 Sam 24:17; 1 Nya 21:17; Eze 18:20]

²³BWANA akasema na Musa, na kumwambia,

²⁴Nena na mkutano, na kuwaambia, Ondokeni ninyi hapo karibu na maskani ya Kora, na Dathani, na Abiramu.

²⁵Basi Musa akainuka na kuwaendea Dathani na Abiramu; na wazee wa Israeli wakafuatana naye.

²⁶Akasema na mkutano, na kuwaambia, Nawasihi, ondokeni penye hema za hawa watu waovu, wala msiguse kitu chao chochote, msiangamizwe katika dhambi zao zote.[#Mwa 19:12; Isa 52:11; Mdo 2:40; 2 Kor 6:17; Ufu 18:4]

²⁷Basi wakaondoka hapo karibu na maskani ya Kora, na Dathani na Abiramu, pande zote; nao kina Dathani na Abiramu wakatoka nje wakasimama mlangoni mwa hema zao, pamoja na wake zao, na wana wao na watoto wao wadogo.[#Ayu 9:4; Mit 16:18]

²⁸Musa akasema, Kwa jambo hili mtajua ya kwamba BWANA amenituma, ili nifanye kazi hizi zote; kwa kuwa mimi sikuzifanya kwa akili zangu mwenyewe.[#Kut 3:12; Kum 18:22; Zek 2:9; Yer 23:16; Eze 13:17; Yn 5:30]

²⁹Kama watu hawa wakifa kifo cha kawaida, kama watu wote wafavyo, au kama wataadhibiwa kwa adhabu ya watu wote; hapo basi BWANA hakunituma mimi.[#Kut 20:5; 32:34; Ayu 35:15; Isa 10:3; Yer 5:9; Omb 4:22]

³⁰Lakini BWANA akiumba kitu kipya, na hiyo nchi ikifunua kinywa chake na kuwameza, pamoja na wote walio nao, nao wakashuka shimoni wakiwa hai; ndipo mtatambua ya kwamba watu hawa wamemdharau BWANA[#Ayu 31:3; Isa 28:21; Zab 55:15; Ufu 9:2]

³¹Basi ilikuwa, hapo alipokwisha kusema maneno haya yote, nchi iliyokuwa chini yao ikapasuka;[#Hes 26:10; 27:3; Kum 11:6; Zab 106:17]

³²nchi ikafunua kinywa chake, na kuwameza, na watu wa nyumba zao na wote walioshikamana na Kora, na vyombo vyao vyote.[#1 Nya 6:22]

³³Basi wao, na wote waliokuwa nao, wakashukia shimoni wakiwa hai; nayo nchi ikawafunika wakaangamia kutoka mle mkutanoni.

³⁴Nao Israeli wote waliokuwa kandokando yao wakakimbia kwa ajili ya kilio chao; kwa kuwa walisema, Nchi isije kutumeza na sisi.

³⁵Kisha moto ukatoka kwa BWANA, ukawateketeza hao watu mia mbili hamsini waliofukiza uvumba.[#Hes 11:1; Law 10:2; Zab 106:18]

³⁶Kisha BWANA akanena na Musa, na kumwambia,

³⁷Mwambie Eleazari mwana wa Haruni kuhani, avitoe vile vyetezo hapo penye moto ukaumwage huo moto kule; kwani ni vitakatifu;

³⁸vile vyetezo vya hao waliofanya dhambi na kuziumiza nafsi zao wenyewe, na vifanywe mbao za kufuliwa kuwa kifuniko cha madhabahu; kwa kuwa walivisongeza mbele za BWANA, navyo ni vitakatifu; vitakuwa ishara kwa wana wa Israeli.[#Mit 20:2; Hab 2:10; Hes 17:10; 26:10; Eze 14:8; 1 Kor 10:11; 2 Pet 2:6]

³⁹Basi Eleazari kuhani akavitwaa vile vyetezo vya shaba, vilivyosongezwa na hao walioteketezwa; nao wakavifua viwe kifuniko cha madhabahu;

⁴⁰viwe ukumbusho kwa wana wa Israeli, ili mgeni yeyote asiye wa kizazi cha Haruni, asikaribie kufukiza uvumba mbele za BWANA; asiwe mfano wa Kora, na mkutano wake; kama BWANA alivyonena naye, kwa kupitia kwa Musa.[#Hes 3:38; 18:4-7; 1 Fal 13:1]

⁴¹Lakini siku ya pili yake mkutano wote wa wana wa Israeli wakamnung'unikia Musa, na Haruni, wakasema, Ninyi mmewaua watu wa BWANA.[#Hes 14:2; Zab 106:13,26; Mt 5:11; Mdo 21:28; 2 Kor 6:8]

⁴²Basi ilikuwa, hapo huo mkutano ulipokuwa umekutanika kinyume cha Musa, na kinyume cha Haruni, wakaangalia upande wa hema ya kukutania; na tazama, hilo wingu likaifunika hema, na utukufu wa BWANA ukaonekana.[#Kut 16:7,10; 24:16; 40:34; Law 9:23; Hes 14:10]

⁴³Na Musa na Haruni wakaenda hapo mbele ya hema ya kukutania.

⁴⁴Naye BWANA akanena na Musa, na kumwambia,

⁴⁵Ondokeni kati ya mkutano, ili niwaangamize mara moja. Wao wakaanguka kifudifudi.[#Hes 20:6; 1 Nya 21:16; Mt 26:39]

⁴⁶Musa akamwambia Haruni, Haya, shika chetezo chako, ukatie moto ndani yake, moto wa madhabahuni, kisha utie na uvumba juu ya moto, ukakichukue haraka, uende nacho katika huo mkutano, ukawafanyie upatanisho; kwa kuwa ghadhabu imetoka kwa BWANA; hiyo tauni imeanza.[#Law 10:6; Hes 1:53; 11:33; 18:5; Yos 7:1; 22:18; 1 Sam 6:19; 2 Sam 24:1; Zab 106:29; 1 Nya 27:24]

⁴⁷Basi Haruni akakishika chetezo kama Musa alivyonena, akapiga mbio akaenda katikati ya mkutano; na tazama, tauni ilikuwa imeanza kati ya watu; akatia uvumba juu ya moto na kufanya upatanisho kwa ajili ya hao watu.

⁴⁸Akasimama kati ya hao waliokufa na hao waliokuwa wangali hai; tauni ikazuiwa.[#2 Sam 24:16,17,25; Ayu 33:24; Zab 106:30; Mt 20:28; 1 The 1:10; Ebr 7:24; Yak 5:16]

⁴⁹Basi waliokufa kwa tauni walikuwa elfu kumi na nne na mia saba, zaidi ya hao waliokufa katika jambo la Kora.

⁵⁰Haruni akamrudia Musa pale mlangoni pa hema ya kukutania; hiyo tauni ikazuiwa.