Maonyo juu ya kumwamini na kumheshimu Mungu

¹Mwanangu, usiisahau sheria yangu,[#Kum 30:16]

Bali moyo wako uzishike amri zangu.

²Maana zitakuongezea wingi wa siku.

Na miaka ya uzima, na amani.

³Rehema na kweli zisiachane nawe;[#Kum 6:8; Yer 17:1; 2 Kor 3:3]

Zifunge shingoni mwako;

Ziandike juu ya kibao cha moyo wako.

⁴Ndivyo utakavyopata kibali na akili nzuri,[#Lk 2:52; 1 Sam 2:26; Mdo 2:47]

Mbele za Mungu na mbele ya mwanadamu.

⁵Mtumaini BWANA kwa moyo wako wote,[#Yer 9:23]

Wala usizitegemee akili zako mwenyewe;

⁶Katika njia zako zote mkiri yeye,[#1 Nya 28:9; Yer 10:23]

Naye atayanyosha mapito yako.

⁷Usiwe na hekima machoni pako;[#Rum 12:16]

Mche BWANA, ukajiepushe na uovu.

⁸Itakuwa afya mwilini pako,[#3:8 Au, kitovuni pako.]

Na mafuta mifupani mwako.

⁹Mheshimu BWANA kwa mali yako,[#Kut 23:19]

Na kwa malimbuko ya mazao yako yote.

¹⁰Ndipo ghala zako zitakapojazwa kwa wingi,[#Kum 28:8]

Na vyombo vyako vitafurika divai mpya.

¹¹Mwanangu, usidharau kuadhibiwa na BWANA,[#Ayu 5:17; Ebr 12:5]

Wala usione ni taabu kurudiwa naye.

¹²Kwa kuwa BWANA ampendaye humrudi,[#Ufu 3:19; Kum 8:5]

Kama vile baba mwanawe ampendezaye.

Utajiri wa kweli

¹³Heri mtu yule aonaye hekima,

Na mtu yule apataye ufahamu.

¹⁴Maana biashara yake ni bora kuliko biashara ya fedha,[#Ayu 28:13; Mit 2:4; 8:11,19]

Na faida yake ni nyingi kuliko dhahabu safi.

¹⁵Yeye ana thamani kuliko marijani,[#Mt 13:44]

Wala vyote uvitamanivyo havilingani naye.

¹⁶Ana wingi wa siku katika mkono wake wa kulia,[#1 Tim 4:8]

Utajiri na heshima katika mkono wake wa kushoto.

¹⁷Njia zake ni njia za kupendeza sana,[#Mt 11:29]

Na mapito yake yote ni amani.

¹⁸Yeye ni mti wa uzima kwao wamshikao sana;[#Mwa 2:9]

Ana heri kila mtu anayeshikamana naye.

Hekima ya Mungu katika uumbaji

¹⁹Kwa hekima BWANA aliiweka misingi ya nchi;[#Mit 8:27; Yn 1:3; Ebr 1:2]

Kwa akili zake akazifanya mbingu imara;

²⁰Kwa maarifa yake vilindi viligawanyika;[#Kum 33:28; Ayu 36:28]

Na mawingu yadondoza umande.

Usalama wa kweli

²¹Mwanangu, yasiondoke haya machoni pako,

Shika hekima kamili na busara.

²²Basi yatakuwa uzima kwa nafsi yako,

Na neema shingoni mwako.

²³Ndipo utakapokwenda katika njia yako salama,

Wala mguu wako hautakwaa.

²⁴Ulalapo hutaona hofu;[#Law 26:6]

Naam, utalala na usingizi wako utakuwa mtamu.

²⁵Usiogope hofu ya ghafla,

Wala uharibifu wa waovu utakapofika.

²⁶Kwa kuwa BWANA atakuwa tumaini lako,

Naye atakulinda mguu wako usinaswe.

²⁷Usiwanyime watu mema yaliyo haki yao,[#Rum 13:7; Gal 6:10]

Ikiwa katika uwezo wa mkono wako kuyatenda.

²⁸Usimwambie jirani yako,[#Law 19:13; Kum 24:15]

Nenda, urudi halafu, na kesho nitakupa;

Nawe unacho kitu kile karibu nawe.

²⁹Usiwaze mabaya juu ya jirani yako,

Ambaye anakaa karibu nawe na kujiona salama.

³⁰Usishindane na mtu bila sababu,[#Rum 12:18]

Ikiwa hakukudhuru kwa lolote.

³¹Usimhusudu mtu mwenye ujeuri,

Wala usiichague mojawapo ya njia zake.

³²Maana mtu mjeuri ni chukizo kwa BWANA,

Bali siri yake ni pamoja na wanyofu.

³³Laana ya BWANA i katika nyumba ya waovu,[#Zek 5:4; Mal 2:2; Zab 1:3]

Bali huibariki maskani ya mwenye haki.

³⁴Hakika yake huwadharau wenye dharau,[#Yak 4:6; 1 Pet 5:5; Zab 138:6; Mt 23:12]

Bali huwapa wanyenyekevu neema.

³⁵Wenye hekima wataurithi utukufu,[#Dan 12:2]

Bali kukuzwa kwa wapumbavu ni fedheha.