Utukufu wa sheria ya Mungu

¹Heri walio kamili njia zao,[#Zab 128:1]

Waendao katika sheria ya BWANA.

²Heri wazitiio shuhuda zake,[#Kum 4:29]

Wamtafutao kwa moyo wote.

³Naam, hawakutenda ubatili,[#Rum 7:16,17; 1 Yoh 3:9]

Wamekwenda katika njia zake.

⁴Wewe umetuamuru mausia yako,

Ili sisi tuyatii sana.

⁵Ningependa njia zangu ziwe thabiti,[#Yer 31:33; Rum 7:22,23; 2 Kor 3:5]

Nizitii amri zako.

⁶Ndipo mimi sitaaibika,[#Ayu 22:26; 1 Yoh 2:28]

Nikiyaangalia maagizo yako yote.

⁷Nitakushukuru kwa unyofu wa moyo,

Nikiisha kujifunza hukumu za haki yako.

⁸Nitazitii amri zako,

Usiniache kabisa.

* * *

⁹Jinsi gani kijana aisafishe njia yake?[#Mit 1:4,10]

Kwa kutii, akilifuata neno lako.

¹⁰Kwa moyo wangu wote nimekutafuta,[#2 Nya 15:15]

Usiniache nipotee mbali na maagizo yako.

¹¹Moyoni mwangu nimeliweka neno lako,[#Lk 2:19]

Nisije nikakutenda dhambi.

¹²Ee BWANA, umehimidiwa,

Unifundishe amri zako.

¹³Kwa midomo yangu nimezisimulia

Hukumu zote za kinywa chako.

¹⁴Nimeifurahia njia ya shuhuda zako

Kana kwamba ni mali mengi.

¹⁵Nitayatafakari maagizo yako,[#Zab 1:2]

Na kuziangalia njia zako.

¹⁶Nitajifurahisha sana kwa amri zako,

Sitalisahau neno lako.

* * *

¹⁷Umtendee mtumishi wako ukarimu,

Nipate kuishi, nami nitalitii neno lako.

¹⁸Unifumbue macho yangu niyatazame

Maajabu yatokayo katika sheria yako.

¹⁹Mimi ni mgeni katika nchi,[#Mwa 47:9; Ebr 11:13]

Usinifiche maagizo yako.

²⁰Roho yangu imepondeka kwa kutamani

Hukumu zako kila wakati.

²¹Umewakemea wenye kiburi,

Wamelaaniwa waendao mbali na maagizo yako.

²²Uniondolee laumu na dharau,

Kwa maana nimezishika shuhuda zako.

²³Wakuu nao waliketi wakaninena,

Lakini mtumishi wako atazitafakari amri zako.

²⁴Shuhuda zako nazo ndizo furaha yangu,

Na washauri wangu.

* * *

²⁵Nafsi yangu imegandamia mavumbini,[#Zab 143:11]

Unihuishe sawasawa na neno lako.

²⁶Nilizisimulia njia zangu ukanijibu,[#1 Fal 8:36; Zab 27:11]

Unifundishe amri zako.

²⁷Unifahamishe njia ya maagizo yako,

Nami nitayatafakari maajabu yako.

²⁸Nafsi yangu imeyeyuka kwa huzuni,

Unitie nguvu sawasawa na neno lako.

²⁹Uniondolee njia ya uongo,[#Mit 30:8; Ebr 8:10]

Unineemeshe kwa sheria yako.

³⁰Nimeichagua njia ya uaminifu,

Na kuziweka hukumu zako mbele yangu.

³¹Nimeambatana na shuhuda zako,

Ee BWANA, usiniaibishe.

³²Nitakwenda mbio katika njia ya maagizo yako,[#1 Fal 4:29; Isa 60:5; 2 Kor 6:11]

Utakaponipanulia ufahamu wangu.

* * *

³³Ee BWANA, unifundishe njia ya amri zako,[#Mt 10:22; Ufu 2:26]

Nami nitaishika hadi mwisho.

³⁴Unifahamishe nami nitaishika sheria yako,[#Mit 2:6; Yak 1:5]

Naam, nitaitii kwa moyo wangu wote.

³⁵Uniendeshe katika mapito ya amri zako,

Kwa maana nimependezwa nayo.

³⁶Unielekeze moyo wangu katika shuhuda zako,[#Eze 33:31; Mk 7:21; Lk 12:15; 1 Tim 6:10; Ebr 13:5]

Wala usiielekee tamaa.

³⁷Unigeuze macho yangu nisitazame visivyofaa,[#Ayu 31:1]

Unihuishe katika njia yako.

³⁸Umthibitishie mtumishi wako ahadi yako,[#2 Sam 7:25]

Iliyo ya wanaokucha.

³⁹Uniondolee laumu niiogopayo,

Maana hukumu zako ni njema.

⁴⁰Tazama, nimeyatamani mausia yako,

Unihuishe kwa haki yako.

* * *

⁴¹Ee BWANA, fadhili zako zinifikie na mimi,

Naam, wokovu wako kulingana na ahadi yako.

⁴²Nami nitamjibu neno anilaumuye,

Kwa maana nilitumainia neno lako.

⁴³Usiliondoe neno la kweli kinywani mwangu kamwe,

Maana nimezingojea hukumu zako.

⁴⁴Nami nitaitii sheria yako daima,

Naam, milele na milele.

⁴⁵Nami nitakwenda kwa uhuru,[#Yn 8:32,36; Rum 8:2]

Kwa kuwa nimejifunza mausia yako.

⁴⁶Nitazinena shuhuda zako mbele ya wafalme,[#Mt 10:18; Mdo 26:1,2]

Wala sitaona aibu.

⁴⁷Nami nitajifurahisha sana kwa maagizo yako,

Ambayo nimeyapenda.

⁴⁸Na mikono yangu nitayainulia maagizo yako niliyoyapenda,

Nami nitazitafakari amri zako.

* * *

⁴⁹Likumbuke neno ulilomwambia mtumishi wako,

Ambalo kwalo umenipa tumaini.

⁵⁰Hii ndiyo faraja yangu katika taabu yangu,[#Zab 27:13; Yer 15:16; Rum 5:3-5; Ebr 6:17-19]

Ya kwamba ahadi yako imenipa moyo.

⁵¹Wenye kiburi wamenidharau mno,[#Yer 20:7; Ayu 23:11]

Lakini sikiuki sheria zako.

⁵²Ninapozikumbuka hukumu zako za tangu kale,

Ee BWANA, ninafarijika.

⁵³Ghadhabu kuu imenishika kwa sababu ya wasio haki,[#Ezr 9:3]

Waiachao sheria yako.

⁵⁴Amri zako zimekuwa nyimbo zangu,

Katika nyumba yangu ya ugenini.

⁵⁵Wakati wa usiku nimelikumbuka jina lako,[#Zab 63:6]

Ee BWANA, nikaitii sheria yako.

⁵⁶Hayo ndiyo niliyokuwa nayo,

Kwa sababu nimeyashika mausia yako.

* * *

⁵⁷BWANA ndiye aliye fungu langu,[#Zab 16:5; Yer 10:16; Omb 3:24]

Ninaahidi kuyatii maneno yake.

⁵⁸Nimekuomba radhi kwa moyo wangu wote,

Unifadhili kulingana na ahadi yako.

⁵⁹Ninapozitafakari njia zako,[#Omb 3:40; Yoe 2:13; Lk 15:17]

Naielekeza miguu yangu kwa shuhuda zako.

⁶⁰Nilifanya haraka wala sikukawia,

Kuyatii maagizo yako.

⁶¹Japo kamba za wasio haki zimenifunga,

Siisahau sheria yako.

⁶²Usiku wa manane nitaamka nikushukuru,[#Mdo 16:25]

Kwa sababu ya hukumu zako za haki.

⁶³Mimi ni mwenzi wa watu wote wakuchao,

Na wale wayatiio mausia yako.

⁶⁴BWANA, dunia imejaa fadhili zako,[#Zab 33:5]

Unifundishe amri zako.

* * *

⁶⁵Umemtendea mtumishi wako mema,

Ee BWANA, sawasawa na neno lako.

⁶⁶Unifundishe akili na maarifa,

Maana nimeyaamini maagizo yako.

⁶⁷Kabla sijateswa mimi nilipotea,[#Kum 32:15; Yer 31:18; Hos 5:15; Ebr 12:11; Ufu 3:19]

Lakini sasa nimelitii neno lako.

⁶⁸Wewe U mwema na mtenda mema,[#Kut 34:6; Zab 107:1; Mt 19:7]

Unifundishe amri zako.

⁶⁹Wenye kiburi wamenizulia uongo,[#Ayu 13:4]

Lakini kwa moyo wangu wote nitayashika mausia yako.

⁷⁰Mioyo yao imenenepa kama shahamu,[#Mdo 28:27]

Lakini mimi nimeifurahia sheria yako.

⁷¹Ilikuwa vema kwangu kuwa niliteswa,[#Ebr 12:10; Mit 8:10]

Nipate kujifunza amri zako.

⁷²Sheria ya kinywa chako ni njema kwangu,

Kuliko maelfu ya dhahabu na fedha.

* * *

⁷³Mikono yako iliniumba na kunidhibiti,[#Ayu 10:8; Zab 100:3]

Unifahamishe nikajifunze amri zako.

⁷⁴Wakuchao na wanione na kufurahi,[#Zab 34:2]

Kwa sababu nimelitumainia neno lako.

⁷⁵Najua ya kuwa hukumu zako ni za haki,[#Zab 89:30-33; Ebr 12:10]

Ee BWANA, na kwa uaminifu umenitesa.

⁷⁶Nakuomba, fadhili zako ziwe faraja kwangu,

Kulingana na ahadi yako kwa mtumishi wako.

⁷⁷Rehema zako zinijie nipate kuishi,

Maana sheria yako ni furaha yangu.

⁷⁸Wenye kiburi waaibike, maana wamenidhulumu kwa uongo,[#Zab 25:3]

Mimi nitayatafakari mausia yako.

⁷⁹Wakuchao na wanirudie,

Nao watazijua shuhuda zako.

⁸⁰Moyo wangu na uwe mkamilifu katika amri zako,[#2 Nya 15:7; Mit 4:23; Yn 1:47]

Nisije mimi nikaaibika.

* * *

⁸¹Nafsi yangu imefifia kwa kuutamani wokovu wako,[#Zab 42:1,2; 73:26]

Nimelitumainia neno lako.

⁸²Macho yangu yamefifia kwa kuitazamia ahadi yako,[#Zab 69:3]

Nikisema, Lini utakaponifariji?

⁸³Maana nimekuwa kama kiriba katika moshi,[#Ayu 30:30]

Sikuzisahau amri zako.

⁸⁴Siku za mtumishi wako ni ngapi,[#Zab 39:4; 7:6; Ufu 6:10]

Lini utakapowahukumu wale wanaonifuatia?

⁸⁵Wenye kiburi wamenichimbia mashimo,[#Zab 35:7]

Ambao hawaifuati sheria yako.

⁸⁶Amri zako zote ni za kudumu,[#Zab 7:1-5; 35:19]

Ninateswa bila sababu, nisaidie!

⁸⁷Walikuwa karibu na kunikomesha katika nchi,

Lakini sikuyaacha mausia yako.

⁸⁸Uniponye kwa fadhili zako,

Nami nitazishika shuhuda za kinywa chako.

* * *

⁸⁹Ee BWANA, neno lako lasimama[#Mt 5:18; 1 Pet 1:25]

Imara mbinguni hata milele.

⁹⁰Uaminifu wako upo kizazi baada ya kizazi,

Umeiweka nchi, nayo imethibitika.

⁹¹Kwa hukumu zako vimesimama imara hata leo,[#Mwa 8:22; Zab 148:6; Yer 33:25]

Maana vitu vyote ni watumishi wako.

⁹²Kama sheria yako isingalikuwa furaha yangu,[#Rum 15:4]

Hapo ningalipotea katika mateso yangu.

⁹³Hata milele sitayasahau maagizo yako,

Maana kwa hayo umenihuisha.

⁹⁴Mimi ni wako, uniokoe,[#Hos 2:7,16]

Kwa maana nimejifunza mausia yako.

⁹⁵Wasio haki wameniotea ili kunipoteza,

Nitazitafakari shuhuda zako.

⁹⁶Nimeona ukamilifu wote kuwa na mwisho,[#Isa 40:8; Mt 5:18]

Bali amri yako haina kikomo.

* * *

⁹⁷Sheria yako naipenda mno ajabu,[#Zab 1:2]

Ndiyo kutafakari kwangu mchana kutwa.

⁹⁸Maagizo yako hunitia hekima kuliko adui zangu,[#Kum 4:6,8; Isa 48:17]

Kwa maana ninayo sikuzote.

⁹⁹Ninazo akili kuliko waalimu wangu wote,[#2 Tim 3:15]

Maana shuhuda zako ndizo nizifikirizo.

¹⁰⁰Ninao ufahamu kuliko wazee,[#Ayu 12:12; 32:7]

Kwa kuwa nimeyashika mausia yako.

¹⁰¹Nimeiepusha miguu yangu na kila njia mbaya,[#2 Kor 7:1; Mit 1:15]

Ili nilitii neno lako.

¹⁰²Sikuziacha hukumu zako,

Maana Wewe mwenyewe umenifundisha.

¹⁰³Mausia yako ni matamu sana kwangu,[#Zab 19:10; Mit 8:11]

Kupita asali kinywani mwangu.

¹⁰⁴Kwa mausia yako najipatia ufahamu,

Ndiyo maana naichukia kila njia ya uongo.

* * *

¹⁰⁵Neno lako ni taa ya miguu yangu,

Na mwanga wa njia yangu.

¹⁰⁶Nimeapa nami nikathibitisha,[#Neh 10:29]

Kuzishika hukumu zako za haki.

¹⁰⁷Nimeteswa mno;

Ee BWANA, unihuishe sawasawa na neno lako.

¹⁰⁸Ee BWANA, uziridhie sadaka za kinywa changu,[#Hos 14:2; Ebr 13:15]

Na kunifundisha hukumu zako.

¹⁰⁹Nafsi yangu imo mkononi mwangu daima,[#Amu 12:3; Ayu 13:14]

Lakini sheria yako sikuisahau.

¹¹⁰Watendao uovu wamenitegea mtego,

Lakini sitoki katika njia ya mausia yako.

¹¹¹Shuhuda zako nimezifanya urithi wa milele,[#Kum 33:4]

Maana ndizo changamko la moyo wangu.

¹¹²Nimeuelekeza moyo wangu nizitende amri zako,

Daima, naam, hata milele.

* * *

¹¹³Watu wa kusitasita nawachukia,

Lakini sheria yako naipenda.

¹¹⁴Ndiwe sitara yangu na ngao yangu,[#Zab 32:7]

Neno lako nimelingojea.

¹¹⁵Enyi watenda mabaya, ondokeni kwangu,[#Zab 6:8; Mt 7:23]

Niyashike maagizo ya Mungu wangu.

¹¹⁶Unitegemeze kulingana na ahadi yako, nikaishi,[#Zab 25:2; Rum 5:5; 9:33]

Wala usiniache niyaaibikie matumaini yangu.

¹¹⁷Unisaidie nami nitakuwa salama,[#Zab 71:6; Yn 10:28; Rum 14:4]

Nami nitaziangalia amri zako daima.

¹¹⁸Umewakataa wote wazikosao amri zako,

Kwa maana hila zao ni bure.

¹¹⁹Wabaya wa nchi pia umewaondoa kama takataka,[#Eze 22:18]

Ndiyo maana nimezipenda shuhuda zako.

¹²⁰Mwili wangu unatetemeka kwa kukucha Wewe,[#Hab 3:16]

Nami ninaziogopa hukumu zako.

* * *

¹²¹Nimefanya hukumu na haki,

Usiniache mikononi mwao wanaonionea.

¹²²Uwe mdhamini wa mtumishi wako, apate mema,[#Ebr 7:22]

Wenye kiburi wasinionee.

¹²³Macho yangu yanafifia kwa kuungojea wokovu wako,

Na kutimizwa kwa ahadi yako ya haki.

¹²⁴Kama zilivyo rehema zako umtendee mtumishi wako,

Na amri zako unifundishe.

¹²⁵Mimi ni mtumishi wako, unifahamishe,

Nipate kuzijua shuhuda zako.

¹²⁶Wakati umewadia BWANA atende kazi;

Kwa kuwa wameitangua sheria yako.

¹²⁷Ndiyo maana nimeyapenda maagizo yako,[#Zab 19:10; Efe 3:8; Mit 3:13,18; 8:11]

Kuliko dhahabu, naam, dhahabu iliyo safi.

¹²⁸Maana nayafuata mausia yako yote, kuwa ya adili,

Kila njia ya uongo naichukia.

* * *

¹²⁹Shuhuda zako ni za ajabu,

Ndiyo maana roho yangu imezishika.

¹³⁰Kufafanuliwa kwa maneno yako kunatia nuru,[#Zab 19:11; Mit 1:4; 2 Pet 1:19]

Na kumfahamisha mjinga.

¹³¹Nafunua kinywa changu nikihema,

Maana nazitamani amri zako.

¹³²Unigeukie na kunirehemu,[#Kut 4:31; 1 Sam 1:11; Zab 106:4]

Kama ilivyo desturi yako kwa walipendalo jina lako.

¹³³Uzielekeze hatua zangu kwa neno lako,[#Rum 6:12]

Uovu usije ukanimiliki.

¹³⁴Unikomboe kutoka kwa dhuluma ya mwanadamu,[#Lk 1:74]

Nipate kuyashika mausia yako.

¹³⁵Umwangazie mtumishi wako uso wako,[#Zab 4:6]

Na kunifundisha amri zako.

¹³⁶Macho yangu yachuruzika mito ya machozi,[#Yer 9:1]

Kwa sababu hawaitii sheria yako.

* * *

¹³⁷Ee BWANA, Wewe ndiwe mwenye haki,[#Neh 9:33; Yer 12:1; Dan 9:7]

Na hukumu zako ni za adili.

¹³⁸Umeziagiza shuhuda zako kwa haki,

Na kwa uaminifu mwingi.

¹³⁹Juhudi yangu imeniangamiza,

Maana watesi wangu wameyasahau maneno yako.

¹⁴⁰Neno lako limesafika sana,

Kwa hiyo mtumishi wako amelipenda.

¹⁴¹Mimi ni mdogo, nadharauliwa,[#Mit 15:16; Amo 7:2; Lk 6:20; 2 Kor 8:9; Yak 2:5]

Lakini siyasahau mausia yako.

¹⁴²Haki yako ni haki ya milele,[#Zab 19:9; Yn 17:17; Efe 1:13]

Na sheria yako ni kweli.

¹⁴³Taabu na dhiki zimenipata,

Maagizo yako ni furaha yangu.

¹⁴⁴Haki ya shuhuda zako ni ya milele,

Unifahamishe, nami nitaishi.

* * *

¹⁴⁵Nimeita kwa moyo wangu wote; Ee BWANA, uitike;

Nitazishika amri zako.

¹⁴⁶Nimekuita Wewe, uniokoe,

Nami nitazishika shuhuda zako.

¹⁴⁷Naamka kabla ya mapambazuko na kukuomba msaada,

Naweka tumaini langu katika maneno yako.

¹⁴⁸Nakaa macho usiku kucha,[#Zab 63:1,6]

Ili kuitafakari ahadi yako.

¹⁴⁹Kwa fadhili zako uisikie sauti yangu,

Ee BWANA, uniokoe.

¹⁵⁰Wanakaribia wanaonifuatia kwa chuki,

Wamekwenda mbali na sheria yako.

¹⁵¹Ee BWANA, Wewe U karibu,[#Zab 145:18]

Na maagizo yako yote ni kweli.

¹⁵²Tokea zamani nimejua kwa shuhuda zako,[#Lk 21:33]

Ya kuwa umeziweka zikae milele.

* * *

¹⁵³Uyaangalie mateso yangu, uniokoe,[#Omb 5:1]

Maana sikuisahau sheria yako.

¹⁵⁴Unitetee na kunikomboa,[#1 Sam 24:15; Zab 35:1; Mik 7:9]

Unihuishe sawasawa na ahadi yako.

¹⁵⁵Wokovu u mbali na wasio haki,[#Ayu 5:4]

Kwa maana hawajifunzi amri zako.

¹⁵⁶Ee BWANA, rehema zako ni nyingi,

Unihuishe sawasawa na hukumu zako.

¹⁵⁷Wanaonifuatia na watesi wangu ni wengi,

Lakini mimi sikiuki shuhuda zako.

¹⁵⁸Nimewaona watendao uhaini nikachukizwa,

Kwa sababu hawakulitii neno lako.

¹⁵⁹Uangalie niyapendavyo mausia yako,

Ee BWANA, unihuishe sawasawa na fadhili zako.

¹⁶⁰Jumla ya neno lako ni kweli,

Na kila hukumu ya haki yako ni ya milele.

* * *

¹⁶¹Wakuu wameniudhi bure,[#1 Sam 24:11]

Ila moyo wangu unakaa kwa kicho cha maneno yako.

¹⁶²Naifurahia ahadi yako,

Kama apataye mateka mengi.

¹⁶³Nimeuchukia uongo, umenikirihi,

Sheria yako nimeipenda.

¹⁶⁴Mara saba kila siku nakusifu,

Kwa sababu ya hukumu za haki yako.

¹⁶⁵Wana amani nyingi waipendao sheria yako,[#Mit 3:2; Isa 32:17]

Wala hawana la kuwakwaza.

¹⁶⁶Ee BWANA, nimeungojea wokovu wako,

Na maagizo yako nimeyatenda.

¹⁶⁷Nafsi yangu imezishika shuhuda zako,

Nami nazipenda mno.

¹⁶⁸Nimeyashika mausia yako na shuhuda zako,[#Ayu 34:21; Mit 5:21]

Maana njia zangu zote ziko mbele zako.

* * *

¹⁶⁹Ee BWANA, kilio changu na kikufikie,

Unifahamishe sawasawa na neno lako.

¹⁷⁰Dua yangu na ifike mbele zako,

Uniponye sawasawa na ahadi yako.

¹⁷¹Midomo yangu na itoe sifa,

Kwa kuwa unanifundisha mausia yako.

¹⁷²Ulimi wangu na uiimbe ahadi yako,

Maana maagizo yako yote ni ya haki.

¹⁷³Mkono wako na uwe tayari kunisaidia,[#Yos 24:22; Mit 1:29; Lk 10:42]

Maana nimeyachagua mausia yako.

¹⁷⁴Ee BWANA, nimeutamani wokovu wako,

Na sheria yako ndiyo furaha yangu.

¹⁷⁵Nafsi yangu na iishi, ipate kukusifu,

Na hukumu zako zinisaidie.

¹⁷⁶Nimetangatanga kama kondoo aliyepotea;[#Isa 53:6; Mt 10:6; Lk 15:4; 1 Pet 2:25; Eze 34:6; Mt 18:11]

Umtafute mtumishi wako;

Kwa maana sikuyasahau maagizo yako.