Sala ya kupata msaada na shukrani za msaada

¹Ee BWANA, nitakuita Ewe, mwamba wangu,

Usiwe kwangu kama kiziwi.

Nisije nikafanana nao washukao shimoni,

Ikiwa umeninyamalia.

²Uisikie sauti ya dua yangu nikuombapo,

Nikipainulia patakatifu pako mikono yangu.

³Usinikokote pamoja na wasio haki,

Wala pamoja na watenda maovu.

Wawaambiao jirani zao maneno ya amani,

Lakini mioyoni mwao mna madhara.

⁴Uwape sawasawa na vitendo vyao,[#Ufu 22:12; 2 Tim 4:14]

Na kwa kadiri ya uovu wa matendo yao,

Uwape sawasawa na kazi ya mikono yao,

Uwalipe kile wanachostahili.

⁵Maana hawazifahamu kazi za BWANA,

Wala matendo ya mikono yake,

Atawavunja wala hatawajenga tena;

⁶Na ahimidiwe BWANA.

Maana ameisikia sauti ya dua yangu;

⁷BWANA ni nguvu zangu na ngao yangu.[#Zab 18:2]

Moyo wangu umemtumaini,

Nami nimesaidiwa;

Basi, moyo wangu unashangilia,

Na kwa wimbo wangu nitamshukuru.

⁸BWANA ni nguvu za watu wake,

Naye ni ngome ya wokovu kwa masihi wake.

⁹Uwaokoe watu wako, uubariki urithi wako,

Uwachunge, uwachukue milele.