KITABU CHA TATU

Ombi la kuponywa kutoka kwa waonevu

¹Hakika Mungu ni mwema kwa Israeli,

Kwa hao walio safi mioyo yao.

²Nami miguu yangu ilikuwa karibu kupotoka,

Hatua zangu zilikuwa karibu kuteleza.

³Maana niliwaonea wivu wenye kujivuna,

Nilipoiona hali ya amani ya wasio haki.

⁴Maana hawana maumivu katika kufa kwao,

Na miili yao ina nguvu.

⁵Hawana taabu kama watu wengine,

Wala hawapati mapigo kama wanadamu wenzao.

⁶Hivyo kiburi kimekuwa mkufu shingoni mwao,[#Mhu 8:11]

Udhalimu huwavika kama nguo.

⁷Macho yao hutokeza kwa kunenepa,

Wameipita kadiri ya mawazo ya mioyo yao.

⁸Hudhihaki, husimulia mabaya,[#2 Pet 2:18; Yud 1:16]

Husimulia udhalimu kana kwamba wako juu.

⁹Wameweka kinywa chao mbinguni,[#Ufu 13:6]

Na ulimi wao hutangatanga duniani.

¹⁰Kwa hiyo watu wake hugeuka huko,

Na maji yaliyojaa humezwa nao.

¹¹Nao husema, Mungu ajuaje?[#Ayu 22:13; Zab 94:7]

Yako maarifa kwake aliye juu?

¹²Fahamu, ndivyo walivyo wasio haki,

Na kwa kustarehe sikuzote wamepata mali nyingi.

¹³Hakika nimejisafisha moyo wangu bure,[#Ayu 21:15; Zab 24:4; Mal 3:14; Ebr 10:19-22]

Na kunawa mikono yangu nisitende dhambi.

¹⁴Maana mchana kutwa nimepigwa,

Na kuadhibiwa kila asubuhi.

¹⁵Kama ningalisema, Nitasimulia kama hayo;

Kumbe! Ningaliwadanganya kizazi cha wana wako.

¹⁶Nami nilifikiri jinsi ya kufahamu hayo;[#Mhu 8:17]

Ikawa taabu machoni pangu;

¹⁷Hata nilipoingia katika patakatifu pa Mungu,[#Zab 77:13]

Nikautafakari mwisho wao.

¹⁸Hakika Wewe huwaweka penye utelezi,

Huwaangusha mpaka palipoharibika.

¹⁹Namna gani wameangamizwa punde!

Wakafutiliwa mbali kwa vitisho.

²⁰Ee Bwana, wamekuwa kama ndoto wakati wa kuamka,

Uondokapo utaidharau sanamu yao.

²¹Moyo wangu ulipoona uchungu,

Viuno vyangu viliponichoma,

²²Nilikuwa kama mjinga, sijui neno;

Nilikuwa kama mnyama tu mbele zako.

²³Walakini mimi ni pamoja nawe daima,

Umenishika mkono wa kulia.

²⁴Utaniongoza kwa shauri lako,[#Isa 58:8; Yn 14:3; 2 Kor 5:1]

Na baadaye utanikaribisha kwa utukufu.

²⁵Ni nani niliye naye mbinguni,[#Isa 26:8,9; Hab 3:17,18]

Wala duniani sina cha kupendeza ila Wewe.

²⁶Mwili wangu na moyo wangu hupunguka,[#Zab 84:2]

Bali Mungu ni mwamba wa moyo wangu

Na sehemu yangu milele.

²⁷Maana wajitengao nawe watapotea;

Umewaangamiza wote waliokuacha Wewe.

²⁸Nami kumkaribia Mungu ni kwema kwangu;[#Ebr 10:22]

Nimefanya kimbilio kwa Bwana MUNGU,

Niyahubiri matendo yako yote.