Maombi ya kutaka msaada juu ya watesi

¹Ee BWANA, utege sikio lako unijibu,

Maana mimi ni maskini na mhitaji.

²Unihifadhi nafsi yangu,

Maana mimi ni mcha Mungu.

Wewe uliye Mungu wangu,

Umwokoe mtumishi wako anayekutumaini.

³Wewe, Bwana, unifadhili,

Maana nakulilia Wewe mchana kutwa.

⁴Uifurahishe nafsi ya mtumishi wako,

Maana nafsi yangu nakuinulia Wewe, Bwana.

⁵Kwa maana Wewe, Bwana, U mwema,[#Zab 130:7-8; Yoe 2:13]

Umekuwa tayari kusamehe,

Na mwingi wa fadhili,

Kwa watu wote wakuitao.

⁶Ee BWANA, uyasikie maombi yangu;

Uisikilize sauti ya dua zangu.

⁷Siku ya mateso yangu nitakuita,

Kwa maana utaniitikia.

⁸Katikati ya miungu hakuna kama Wewe, Bwana,[#Kut 15:11; Kum 3:24; 1 Sam 2:2; 2 Sam 7:22; 1 Fal 8:23]

Wala matendo mfano wa matendo yako.

⁹Mataifa yote uliyoyaumba watakuja;[#Zab 95:6-7; Isa 43:7; Ufu 15:4]

Watakusujudia Wewe, Bwana,

Watalitukuza jina lako;

¹⁰Kwa kuwa ndiwe uliye mkuu,[#Kum 6:4; Isa 37:16; Mk 12:29; 1 Kor 8:4; Efe 4:6]

Wewe ndiwe mfanya miujiza,

Ndiwe Mungu peke yako.

¹¹Ee BWANA, unifundishe njia yako;

Nitakwenda katika kweli yako;

Moyo wangu na ufurahi kulicha jina lako;

¹²Nitakusifu Wewe, Ee Bwana, Mungu wangu,

Kwa moyo wangu wote,

Nitalitukuza jina lako milele.

¹³Maana fadhili zako kwangu ni nyingi sana;[#Zab 56:13]

Umeiopoa nafsi yangu na kuzimu.

¹⁴Ee Mungu, wenye kiburi wamenishambulia;

Kundi la watu wakatili wanataka kuniua.

Wala hawakukuweka Wewe

Mbele ya macho yao.

¹⁵Lakini Wewe, Bwana,[#Kut 34:6; Hes 14:18; Neh 9:17; Yoe 2:13; Zab 103:8; 111:4]

U Mungu wa rehema na neema,

Mvumilivu, mwingi wa fadhili na kweli.

¹⁶Unielekee na kunifadhili mimi;

Mpe mtumishi wako nguvu zako,

Umwokoe mwana wa mjakazi wako.

¹⁷Unifanyie ishara ya wema,

Wanichukiao waione na kuaibishwa.

Kwa kuwa Wewe, BWANA,

Umenisaidia na kunifariji.