¹Mimi ni ua la uwandani,[#2:1 kwa Kiebrania ni Sharoni.]

Ni fahirisi ya mabondeni.

²Kama fahirisi kati ya miiba,

Kadhalika mpenzi wangu kati ya binti.

³Kama mpera kati ya miti ya msituni,[#Mwa 3:6; Ufu 22:1]

Kadhalika mpendwa wangu kati ya vijana.

Niliketi kivulini mwake kwa furaha,

Na matunda yake niliyaonja kuwa matamu.

⁴Akanileta mpaka nyumba ya karamu,

Na bendera yake juu yangu ni mapenzi.

⁵Nishibisheni zabibu, niburudisheni kwa mapera,

Kwa maana nimezimia kwa mapenzi.

⁶Mkono wake wa kushoto uko chini ya kichwa changu,[#Wim 8:3]

Nao wa kulia unanikumbatia!

⁷Nawasihi, enyi binti za Yerusalemu,

Kwa paa na kwa ayala wa porini,

Msiyachochee mapenzi, wala kuyaamsha,

Hata yatakapoona vema yenyewe.

⁸Sikiliza! Ni mpendwa wangu! Tazama, anakuja,[#Yn 10:4]

Akiruka milimani, akichachawa vilimani.

⁹Mpendwa wangu ni kama paa, au ayala.

Tazama, asimama nyuma ya ukuta wetu,

Achungulia dirishani, atazama kimiani.

¹⁰Mpendwa wangu alinena, akaniambia,

Ondoka, mpenzi wangu, mzuri wangu, uje zako,

¹¹Maana tazama, majira ya baridi yamepita,

Masika imekwisha, imekwenda zake;

¹²Maua yatokea katika nchi,

Wakati wa kuimba umefika,

Na sauti ya mwigo husikiwa kwetu.

¹³Mtini wapevusha tini zake,

Na mizabibu inachanua,

Inatoa harufu yake nzuri;

Ondoka, mpenzi wangu, mzuri wangu, uje zako.

¹⁴Hua wangu, mafichoni mwa jabali,[#Wim 8:13]

Katika sitara za, magenge

Nitazame uso wako, nisikie sauti yako,

Maana sauti yako ni tamu na uso wako unapendeza.

¹⁵Tukamatie mbweha,[#Zab 80:13; Eze 13:4; Lk 13:32]

Wale mbweha wadogo,

Waiharibuo mizabibu,

Maana mizabibu yetu yachanua.

¹⁶Mpendwa wangu ni wangu, na mimi ni wake;[#Wim 6:3]

Hulisha kundi lake penye nyinyoro.

¹⁷Hata jua lipunge, na vivuli vikimbie,[#Wim 4:6; Lk 1:78; Rum 13:12; 2 Pet 1:19; Wim 8:14]

Unigeukie, mpendwa wangu,

Nawe uwe kama paa, au ayala,

Juu ya milima ya Betheri.