Makosa makuu ya Israeli

¹“Pigeni baragumu!

Adui anakuja kama tai

kuivamia nyumba ya Mwenyezi-Mungu,

kwa kuwa wamelivunja agano langu

na kuiasi sheria yangu.

²Waisraeli hunililia wakisema:

‘Mungu wetu, sisi tunakujua.’

³Lakini Israeli amepuuza mambo mema,[#8:3 Rejea Mika 6:8.]

kwa hiyo, sasa adui watamfuatia.

⁴“Walijiwekea wafalme bila kibali changu,

walijiteulia viongozi ambao sikuwatambua.

Wamejitengenezea miungu ya fedha na dhahabu,

jambo ambalo litawaangamiza.

⁵Watu wa Samaria, naichukia sanamu yenu ya ndama.[#8:5 Yahusu ile sanamu ya ndama ambayo Yeroboamu aliisimika kule Betheli (1Fal 12:18-20; Hos 10:5).]

Hasira yangu inawaka dhidi yenu.

Mtaendelea mpaka lini kuwa na hatia?

⁶Nanyi Waisraeli ni hivyohivyo!

Na sanamu yenu hiyo fundi ndiye aliyeitengeneza.

Yenyewe si Mungu hata kidogo.

Naam! Sanamu ya ndama ya Samaria itavunjwavunjwa!

⁷“Wanapanda upepo, watavuna kimbunga![#8:7 Maneno yanayofanana na yale ya Yobu 4:8; Meth 22:8; Hos 10:13. Huenda Hosea alimaanisha kwamba mahali pa upepo wangalipaswa kushughulikia haki wapate kuvuna upendo. Upepo hapa waweza kumaanisha udanganyifu. Taz Mhub 1:14,17; Meth 11:29; Yobu 77:1, wanajidanganya kuabudu sanamu.]

Mimea yao ya nafaka iliyo mashambani

haitatoa nafaka yoyote.

Na hata kama ikizaa,

mazao yake yataliwa na wageni.

⁸Waisraeli wamemezwa;

sasa wamo kati ya mataifa mengine,

kama chombo kisicho na faida yoyote;

⁹kwa kuwa wamekwenda kuomba msaada Ashuru.

Efraimu ni punda anayetangatanga peke yake;

Efraimu amekodisha wapenzi wake.

¹⁰Wametafuta wapenzi kati ya watu wa mataifa,

lakini mimi nitawakusanya mara.

Na hapo watasikia uzito wa mzigo,

ambao mfalme wa wakuu aliwatwika.

¹¹“Watu wa Efraimu wamejijengea madhabahu nyingi,

na madhabahu hizo zimewazidishia dhambi.

¹²Hata kama ningewaandikia sheria zangu mara nyingi,

wao wangeziona kuwa kitu cha kigeni tu.

¹³Wanapenda kutoa tambiko,

na kula nyama yake;

lakini mimi Mwenyezi-Mungu sipendezwi hata kidogo.

Mimi nayakumbuka makosa yao;

nitawaadhibu kwa dhambi zao;

nitawarudisha utumwani Misri.

¹⁴Waisraeli wamemsahau Muumba wao,[#8:14 Rejea Isa 44:2; 51:13.]

wakajijengea majumba ya fahari;

watu wa Yuda wamejiongezea miji ya ngome,

lakini mimi nitaipelekea moto miji hiyo,

na kuziteketeza ngome zao.”