Yesu anaingia Yerusalemu kwa shangwe

¹Yesu na wanafunzi wake walipokaribia Yerusalemu na kufika Bethfage katika mlima wa Mizeituni, aliwatuma wanafunzi wake wawili,[#21:1 Kijiji kimoja upande wa mashariki wa mlima wa Mizeituni kuelekea Bethania (taz 21:17); kwa sasa ni Kefr-et-Tur.; #21:1 Mlima upande wa Mashariki wa mji Yerusalemu, karibu kilomita moja kutoka mjini (Mate 1:12).; #21:1-22 Sehemu hii yaweza kueleweka kama vitendo vitatu vya ishara (mithili ya vitendo vya ishara vya baadhi ya manabii; rejea vitendo vya ishara vya manabii, k.m. Eze 4:1—5:4): Aya 1-11: Yesu anaingia Yerusalemu kwa shangwe, akitajwa kama Masiha na mfalme. Aya 12-17 Yesu analitakasa hekalu na hivyo kuonesha kwa ishara hiyo kwamba yeye anayo mamlaka juu ya ibada za Wayahudi. Aya 18-22 Yesu anaulaani mtini, kitendo ambacho labda ni ishara ya laana kwa viongozi wa Waisraeli ambao hawakupokea ujumbe wa Yesu.]

²akawaambia, “Nendeni hadi kijiji kilicho mbele yenu na mtamkuta punda amefungwa na mtoto wake. Wafungueni mkawalete kwangu.[#21:2 Yaonekana mwandishi aliielewa ile sehemu ya kitabu cha Zekaria (Zek 9:9) kwamba ilihusu wanyama wawili. Injili nyingine zinataja mmyama mmoja tu (Marko 11:3; Luka 19:30; Yoh 12:14).]

³Kama mtu akiwauliza sababu, mwambieni, ‘Bwana anawahitaji,’ naye atawaachieni mara.”[#21:3 Au, “Mwenyewe anawahitaji”. Neno la Kigiriki mara nyingi hutumika kwa maana ya “Bwana” ambaye hao punda ni wake; lakini si yamkini kwamba Yesu angetumia maneno hayo kwa maana hiyo.]

⁴Jambo hili lilifanyika ili yale yaliyosemwa na nabii yatimie:

⁵“Uambieni mji wa Siyoni:

Tazama, Mfalme wako anakujia!

Ni mpole na amepanda punda,

mwanapunda, mtoto wa punda.”

⁶Hivyo, wale wanafunzi walikwenda wakafanya kama Yesu alivyowaagiza.

⁷Wakamleta yule punda na mtoto wake, wakatandika nguo zao juu yao na Yesu akaketi juu yake.

⁸Umati mkubwa wa watu wakatandaza nguo zao barabarani, na watu wengine wakakata matawi ya miti wakayatandaza barabarani.[#21:8 Vitendo hivyo vilikuwa vya kumkaribisha. Watu makundi kwa makundi walikuwa wamekuja kutoka Galilaya na sehemu nyingine kwa sikukuu ya Pasaka.]

⁹Makundi ya watu waliomtangulia na wale waliomfuata wakapaza sauti:

“Sifa kwa Mwana wa Daudi!

Abarikiwe huyo ajaye kwa jina la Bwana!

Sifa kwa Mungu juu!”

¹⁰Yesu alipokuwa anaingia Yerusalemu, mji wote ukajaa ghasia. Watu wakawa wanauliza, “Huyu ni nani?”

¹¹Watu katika ule umati wakasema, “Huyu ni nabii Yesu, kutoka Nazareti mji wa Galilaya.”

Yesu anawafukuza wafanyabiashara hekaluni

¹²Basi, Yesu akaingia hekaluni, akawafukuza nje watu waliokuwa wanauza na kununua vitu ndani ya hekalu; akazipindua meza za wale waliokuwa wanavunja fedha, na viti vya wale waliokuwa wanauza njiwa.[#21:12 Ndani ya ukumbi wa nje wa hekalu, sehemu ambayo watu wasio Wayahudi waliweza kuingia, kulikuwa na wafanyabiashara ambao kazi yao muhimu ilikuwa kubadilisha fedha kwa ajili ya kuwapatia watu fedha iliyotakiwa kwa zaka na kuuza wanyama waliohitajika kwa sadaka (Mat 17:14). Shughuli hizo mara nyingi ziliwapa wengine fursa ya udanganyifu (aya 13).]

¹³Akawaambia, “Imeandikwa katika Maandiko Matakatifu: ‘Nyumba yangu itaitwa nyumba ya sala.’ Lakini nyinyi mmeifanya kuwa pango la wanyang'anyi.”

¹⁴Vipofu na vilema wengine walimwendea huko hekaluni, naye Yesu akawaponya.

¹⁵Basi, makuhani wakuu na waalimu wa sheria walipoyaona maajabu aliyoyafanya Yesu, na pia watoto walipokuwa wanapaza sauti zao hekaluni wakisema: “Sifa kwa Mwana wa Daudi,” wakakasirika.

¹⁶Hivyo wakamwambia, “Je, husikii wanachosema?” Yesu akawajibu, “Naam, nasikia! Je hamjapata kusoma Maandiko haya?

‘Kwa vinywa vya watoto wadogo na wachanga

wajipatia sifa kamili.’”

¹⁷Basi, akawaacha, akatoka nje ya mji na kwenda Bethania, akalala huko.[#21:17 Kijiji kimoja mashariki ya mlima wa Mizeituni, yapata kilomita 3 kutoka mjini Yerusalemu; kwa sasa ni El-azariye.]

Mtini usiozaa

¹⁸Yesu alipokuwa anarudi mjini asubuhi na mapema, aliona njaa.

¹⁹Akauona mtini mmoja kando ya njia, akauendea; lakini aliukuta hauna chochote ila majani matupu. Basi, akauambia, “Usizae tena matunda milele!” Papo hapo huo mtini ukanyauka.[#21:19 Katika Marko 11:12-14,20-25 mtini huo ulionekana siku ya pili umenyauka.]

²⁰Wanafunzi walipouona walishangaa wakisema, “Kwa nini mtini huu umenyauka ghafla?”

²¹Yesu akawajibu, “Kweli nawaambieni, kama mkiwa na imani bila kuwa na mashaka, mnaweza si tu kufanya hivyo, bali hata mkiuambia mlima huu: ‘Ng'oka ukajitose baharini,’ itafanyika hivyo.[#21:21 Kuhusu Mtindo huu wa kusema hapa, ambao karibu ni kama kitendawili, taz Mat 17:20 maelezo na pia rejea 1Kor 13:2.]

²²Na mkiwa na imani, chochote mtakachoomba kwa sala, mtapata.”

Suala juu ya mamlaka ya Yesu

²³Yesu aliingia hekaluni, akawa anafundisha. Alipokuwa akifundisha, makuhani wakuu na wazee wa watu wakamwuliza, “Unafanya mambo haya kwa mamlaka gani? Nani amekupa mamlaka haya?”[#21:23 Swali hilo limetokana na matendo ya Yesu kama yalivyotajwa katika aya ilyotangulia. Taz 21:1-22 maelezo.]

²⁴Yesu akawajibu, “Na mimi nitawaulizeni swali moja; mkinijibu, basi nami nitawaambia ninafanya mambo haya kwa mamlaka gani.

²⁵Je, mamlaka ya Yohane ya kubatiza yalitoka kwa nani? Je, yalitoka mbinguni ama kwa watu?” Lakini wakajadiliana wao kwa wao hivi: “Tukisema, ‘Yalitoka mbinguni,’ atatuuliza, ‘Basi, mbona hamkumsadiki?’

²⁶Na tukisema, ‘Yalitoka kwa watu,’ tunaogopa umati wa watu maana wote wanakubali kwamba Yohane ni nabii.”

²⁷Basi, wakamjibu, “Hatujui!” Naye Yesu akawaambia, “Nami pia sitawaambia ninafanya mambo haya kwa mamlaka gani.

Mfano wa wana wawili

²⁸“Nyinyi mnaonaje; mtu mmoja alikuwa na wana wawili. Akamwambia yule wa kwanza, ‘Mwanangu, leo nenda ukafanye kazi katika shamba la mizabibu.’

²⁹Yule kijana akamwambia, ‘Sitaki!’ Lakini baadaye akabadili nia, akaenda kufanya kazi.

³⁰Yule baba akamwambia mtoto wake wa pili vivyo hivyo, naye akamjibu, ‘Naam baba!’ Lakini hakuenda kazini.

³¹Je, ni nani kati ya hawa wawili aliyetimiza matakwa ya baba yake?” Wakamjibu, “Yule mtoto wa kwanza.”

Basi, Yesu akawaambia, “Kweli nawaambieni, watozaushuru na waasherati wataingia katika ufalme wa Mungu kabla yenu.

³²Maana Yohane alikuja kwenu akawaonesha njia adili ya kuishi, nanyi hamkumwamini; lakini watozaushuru na waasherati walimwamini. Hata baada ya kuona hayo yote nyinyi hamkutubu na kumsadiki.”[#21:32 Yohane aliwatangazia watu matakwa ya Mungu. Taz Mat 3:15 maelezo; rejea pia Luka 3:12-14; 7:29-30.; #21:32 Luka 3:12; 7:29-30.]

Mfano wa shamba la mizabibu na wakulima

³³Yesu akasema, “Sikilizeni mfano mwingine. Mtu mmoja mwenye nyumba alilima shamba la mizabibu; akalizungushia ukuta, akachimba kisima cha kusindikia divai, akajenga humo mnara pia. Kisha akalikodisha kwa wakulima, akasafiri kwenda hadi nchi ya mbali.[#21:33 Ilikuwa kawaida kutumia maneno hayo kama mfano wa taifa la Israeli (rejea Isa 5:1-7) ambapo picha hiyohiyo inatumika. Yesu anatumia mfano huo kama kielelezo na wasikilizaji wake wanaelewa mara moja kwamba alikuwa anawasema wao (aya 45).; #21:33 Namna ya kibanda kilichotumika kwa kulinda shamba.]

³⁴Wakati wa mavuno ulipofika, aliwatuma watumishi wake kwa wale wakulima, ili wakachukue sehemu ya mavuno yake.

³⁵Wale wakulima wakawakamata hao watumishi; mmoja wakampiga, mwingine wakamuua na mwingine wakampiga mawe.

³⁶Huyo mtu akawatuma tena watumishi wengine, wengi kuliko wa safari ya kwanza. Wale wakulima wakawatendea namna ileile.

³⁷Mwishowe akamtuma mwanawe huku akifikiri: ‘Watamjali mwanangu.’

³⁸Lakini wale wakulima walipomwona mwanawe wakasemezana wao kwa wao: ‘Huyu ndiye mrithi; na tumuue ili tuuchukue urithi wake!’

³⁹Basi, wakamkamata, wakamtoa nje ya lile shamba la mizabibu, wakamuua.[#21:39 Kuuawa kwa huyo mwana wa Mwenye shamba nje ya hilo shamba labda ni wazo linaloendana na kuuawa kwa Yesu nje ya mji wa Yerusalemu. Rejea Ebr 13:11-12 maelezo]

⁴⁰“Sasa, huyo mwenye shamba la mizabibu atakapokuja, atawafanyaje hao wakulima?”

⁴¹Wao wakamjibu, “Atawaangamiza vibaya hao waovu, na lile shamba atawapa wakulima wengine ambao watampa sehemu ya mavuno wakati wake.”

⁴²Hapo Yesu akawaambia, “Je, hamkusoma jambo hili katika Maandiko Matakatifu?

‘Jiwe walilokataa waashi

sasa limekuwa jiwe kuu la msingi.

Bwana ndiye aliyefanya jambo hili,

nalo ni la ajabu sana kwetu!’

⁴³“Kwa hiyo nawaambieni, ufalme wa Mungu utaondolewa kwenu na kupewa watu wa mataifa mengine wenye kutoa matunda yake.”[#21:43 Baadhi ya hati za kale zina aya 44: “Mtu yeyote akianguka juu ya jiwe hilo atavunjika vipandevipande; na likimwangukia mtu yeyote, litamponda”, taz Luka 20:18. Rejea Isa 8:14-15; Dan 2:34-35,44-45.]

⁴⁵Makuhani wakuu na Mafarisayo waliposikia hiyo mifano yake walitambua kwamba alikuwa anawasema wao.

⁴⁶Kwa hiyo wakawa wanatafuta njia ya kumtia nguvuni, lakini waliwaogopa watu kwa sababu wao walimtambua yeye kuwa nabii.