Kutawazwa kwa mfalme mteule

¹Mwenyezi-Mungu amwambia bwana wangu:

“Keti upande wangu wa kulia,

hata niwaweke maadui zako chini ya miguu yako.”

²Mwenyezi-Mungu ataeneza enzi yako kutoka Siyoni;

utatawala juu ya maadui zako wote.

³Watu wako watakujia kwa hiari,

siku utakapokwenda kuwapiga maadui.

Juu ya milima mitakatifu watakujia vijana wako,

kama umande unaotokeza alfajiri mapema.

⁴Mwenyezi-Mungu amekuapia wala hatabadili nia yake:

“Wewe ni kuhani milele kwa utaratibu wa ukuhani wa Melkisedeki.”

⁵Bwana yuko upande wako wa kulia;

atawaponda wafalme atakapokasirika.

⁶Atayahukumu mataifa na kuwaua watu wengi;

atawaponda viongozi kila mahali duniani.

⁷Mfalme atakunywa maji ya kijito njiani;[#110:7 Maana ya maneno haya si dhahiri. Wengine wanafikiri ataweza kunywa maji popote maana atakuwa amepata ushindi kila mahali.]

naye atainua kichwa juu kwa ushindi.