Mungu yuko upande wetu

¹Mungu ni kimbilio letu na nguvu yetu;

yeye ni msaada wetu daima wakati wa taabu.

²Kwa hiyo hatutaogopa chochote,

dunia ijapoyeyuka

na milima kutikisika kutoka baharini;

³hata kama bahari ikichafuka na kutisha,

na milima ikatetemeka kwa machafuko yake.

⁴Kuna mto ambao maji yake hufurahisha mji wa Mungu,[#46:4-5 Katika Yerusalemu ambao kibiblia ni mji wa Mungu hakuna mto, na wala mto wa pekee kama huu. Maneno hayo yanatumika kimfano. Mto hapa ni ishara au mfano wa uhai. Picha hiyo labda imetolewa kutoka mto wa Bustani ya Edeni (Mwa 2:10). Kuhusu mfano au picha hiyo taz Zab 65:9; Eze 47:1-12; Yoe 3:18; Zek 14:8.]

makao matakatifu ya Mungu Mkuu.

⁵Mungu yumo mjini humo, nao hauwezi kutikiswa;

Mungu ataupa msaada alfajiri na mapema.

⁶Mataifa yaghadhibika na tawala zatikisika;

Mungu anguruma nayo dunia yayeyuka.

⁷Mwenyezi-Mungu wa majeshi yu pamoja nasi,[#46:7 Mara nyingi jina hili la sifa la Mungu linatumika katika mazingira ambapo sanduku la agano linatajwa na linagusia ukuu na uwezo wa Mungu juu ya maumbile yote.]

Mungu wa Yakobo ni kimbilio letu.

⁸Njoni mwone matendo ya Mwenyezi-Mungu;

oneni maajabu aliyoyafanya duniani.

⁹Hukomesha vita popote duniani,

huvunjavunja pinde na mikuki,

nazo ngao huziteketeza.

¹⁰Asema: “Nyamazeni na kujua kuwa mimi ni Mungu!

Mimi natukuka katika mataifa yote;

mimi natukuzwa ulimwenguni kote!”

¹¹Mwenyezi-Mungu wa majeshi yu pamoja nasi,

Mungu wa Yakobo ni kimbilio letu.