Wakati wa maafa ya taifa

¹Ee Mungu, watu wasiokujua wameivamia nchi yako.[#79:1 Neno “wasiokujua” linatumika hapa kutafsiria neno la Kiebrania “goyim”, yaani watu wasio Waisraeli au kwa maneno mengine “watu wa mataifa mengine”.]

Wamelitia najisi hekalu lako takatifu,

na kuufanya mji wa Yerusalemu kuwa magofu.

²Wameacha maiti za watumishi wako ziliwe na ndege,[#79:2 Maiti hizo hazikuzikwa kwa heshima kama ilivokuwa desturi ya Wayahudi na hivyo tukio hilo linaongezewa ubaya na aibu kwani miili iliyoachwa bila kuzikwa iliifanya hata nchi yote kuwa najisi.]

miili ya watu wako chakula cha wanyama wa porini.

³Damu yao imemwagwa kama maji mjini Yerusalemu,

wamelazwa humo na hakuna wa kuwazika.

⁴Tumekuwa aibu kwa mataifa ya jirani,

jirani zetu wanatucheka na kutudhihaki.

⁵Ee Mwenyezi-Mungu, je, utakasirika hata milele?

Hasira yako ya wivu itawaka kama moto hata lini?

⁶Uwamwagie watu wasiokujua hasira yako;

naam, tawala zote zisizoheshimu jina lako.

⁷Maana wamemmeza Yakobo, taifa lako,

wameteketeza kabisa makao yake.

⁸Usituadhibu kwa sababu ya makosa ya wazee wetu.

Huruma yako itujie haraka,

maana tumekandamizwa mno!

⁹Utusaidie, ee Mungu, mwokozi wetu;

kwa heshima ya jina lako

utuokoe na kutusamehe dhambi zetu,

kwa ajili ya jina lako.

¹⁰Kwa nini mataifa yatuambie:

“Yuko wapi Mungu wenu?”

Utujalie tuone ukiwalipiza watu wa mataifa

mauaji ya watumishi wako.

¹¹Kilio cha hao wafungwa kikufikie;[#79:11 Baada ya kuteketezwa kwa mji wa Yerusalemu watu wengi walichukuliwa hadi Babuloni ambako walikaa bila matumaini ya kuweza kurudi tena makwao.]

kwa nguvu yako kuu uwaokoe waliohukumiwa kufa.

¹²Mataifa hayo yaliyokudharau, ee Bwana,

yalipizwe mara saba!

¹³Nasi watu wako, tulio kondoo wa kundi lako,[#79:13 Aya hii ya mwisho ni kama tamko la imani ya Waisraeli kwa Mungu na matumaini kwamba yeye ataendelea kuwajalia mahitaji yao kama mchungaji anavyochunga kondoo wake.]

tutakushukuru milele,

na kukusifu nyakati zote.