¹Bwana aliumba binadamu kwa udongo

na hukohuko udongoni binadamu atarudi.

²Aliwapangia binadamu siku za kuishi,[#17:2 Mwa 6:3; Zab 90:10.]

na kuwapa mamlaka juu ya vitu vyote duniani.

³Aliwapa nguvu kama zake mwenyewe,

aliwaumba kwa mfano wake.

⁴Alivifanya viumbe vyote vimwogope binadamu,

akawapa binadamu mamlaka juu ya wanyama na ndege.

⁶Aliwapa binadamu ndimi, macho na masikio,

akawapa na moyo wa kuweza kufikiri.

⁷Aliwajaza maarifa na akili,

akawaonesha yaliyo mema na mabaya.

⁸Alisimika jicho lake ndani yao,

ili kuwawezesha kuona uzuri wa kazi zake,

¹⁰wapate kulisifu jina lake takatifu,

na kutangaza ukuu wa kazi zake.

¹¹Aliweka mbele yao elimu,

na kuwajalia sheria ya uhai.

¹²Alifanya nao agano la milele,

na kuwafunulia maamuzi yake.

¹³Macho yao yakaona utukufu wake,

na masikio yao yakasikia utukufu wa sauti yake.

¹⁴Aliwaambia, “Msifanye uovu wowote;”

akawaamuru namna ya kuishi na jirani zao.

Mungu ni Hakimu

¹⁵Bwana anaiona mienendo ya binadamu;

hawawezi kujificha mbele yake.

¹⁷Aliweka mtawala juu ya kila taifa,

lakini Israeli ni mali yake Bwana binafsi.

¹⁹Matendo yote ya watu ni wazi kwa Bwana kama jua,

kila wanachofanya anakiona mbele yake.

²⁰Maovu ya binadamu hayawezi kufichika mbele yake,

dhambi zao ziko wazi mbele ya Bwana.

²²Sadaka kwa maskini ni kama mhuri kwake,

yeye huthamini wema wa mtu kama mboni ya jicho lake.

²³Baadaye atatokea na kuwalipiza waovu;

watapata kila mmoja wanachostahili.

²⁴Lakini wale wanaotubu atawajalia wamrudie,

na huwatia moyo wale waliokata tamaa.

Wito wa toba

²⁵Mgeukie Bwana na kuacha dhambi zako;

omba mbele yake na uache makosa yako.

²⁶Mrudie Mungu Mkuu na kuachana na uovu;

uchukie kwa moyo wote kufanya machukizo.

²⁷Huko kuzimu nani atamwimbia sifa Mungu Mkuu?

Ni wale tu walio hai wanaoweza kumshukuru.

²⁸Waliokufa na wasiokuwako tena hawawezi kumsifu;

ni wale walio hai na wazima ndio wanaoweza kumsifu Bwana.

²⁹Jinsi gani huruma ya Bwana ilivyo kuu,

na jinsi anavyowasamehe wanaomrudia!

³⁰Sisi binadamu hatuwezi kuwa na kila kitu;

maana sisi sote ni viumbe vyenye kufa.

³¹Ni kitu gani king'aacho kama jua? Hata hivyo, jua nalo hupatwa.

Binadamu aliye kiumbe hufikiria tu maovu.

³²Bwana hulikagua jeshi lote la mbinguni,

lakini binadamu ni mavumbi tu na majivu!