Wito wa kujenga Hekalu

¹Katika mwaka wa pili wa utawala wa Mfalme Dario, katika siku ya kwanza ya mwezi wa sita, neno la Bwana lilikuja kupitia kwa nabii Hagai kwenda kwa Zerubabeli mwana wa Shealtieli, mtawala wa Yuda, na kwa Yoshua mwana wa kuhani mkuu Yehosadaki:[#1:1 kwa Kiebrania ni Yeshua , maana yake Yehova ni wokovu]

²Hivi ndivyo asemavyo Bwana wa majeshi: “Hawa watu husema, ‘Wakati haujawadia wa kujenga nyumba ya Bwana .’ ”

³Kisha neno la Bwana likaja kupitia kwa nabii Hagai:

⁴“Je, ni wakati wenu ninyi wa kuishi katika nyumba zenu zilizojengwa vizuri, wakati hii nyumba ikibaki gofu?”

⁵Sasa hili ndilo asemalo Bwana wa majeshi: “Zitafakarini vyema njia zenu.

⁶Mmepanda vingi, lakini mmevuna haba. Mnakula lakini hamshibi, mnakunywa, lakini hamtosheki. Mnavaa nguo, lakini hamsikii joto. Mnapata mishahara, lakini inatoweka kama imewekwa kwenye mfuko uliotobokatoboka.”

⁷Hili ndilo asemalo Bwana wa majeshi: “Zitafakarini vyema njia zenu.

⁸Pandeni milimani mkalete miti na kujenga nyumba, ili nipate kuifurahia, na nitukuzwe,” asema Bwana .

⁹“Mlitarajia mengi, kumbe, yametokea kidogo. Ulichokileta nyumbani nilikipeperusha. Kwa nini?” asema Bwana wa majeshi. “Ni kwa sababu ya nyumba yangu, inayobaki katika hali ya magofu, wakati kila mmoja wenu anajishughulisha na nyumba yake mwenyewe.

¹⁰Kwa hiyo, mbingu zimezuia umande wake na ardhi mavuno yake kwa sababu yenu.

¹¹Niliita ukame mashambani na milimani, kwenye nafaka, mvinyo mpya, mafuta pamoja na chochote kinachozalishwa na ardhi, juu ya watu na ngʼombe, pamoja na kazi za mikono yenu.”

¹²Kisha Zerubabeli mwana wa Shealtieli, Yoshua kuhani mkuu mwana wa Yehosadaki, pamoja na mabaki yote ya watu wakaitii sauti ya Bwana Mungu wao pamoja na ujumbe wa nabii Hagai, kwa sababu alikuwa ametumwa na Bwana Mungu wao. Watu walimwogopa Bwana .

¹³Kisha Hagai, mjumbe wa Bwana , akawapa watu ujumbe huu wa Bwana : “Mimi niko pamoja nanyi,” asema Bwana .

¹⁴Kwa hiyo Bwana akachochea roho ya Zerubabeli mwana wa Shealtieli, mtawala wa Yuda, na roho ya kuhani mkuu Yoshua mwana wa Yehosadaki, pamoja na roho za mabaki yote ya watu. Walikuja, wakaanza kufanya kazi katika nyumba ya Bwana wa majeshi, Mungu wao,

¹⁵siku ya ishirini na nne ya mwezi wa sita, katika mwaka wa pili wa utawala wa Mfalme Dario.