Ayubu anaendelea

¹“Mwanadamu aliyezaliwa na mwanamke

siku zake ni chache nazo zimejaa taabu.

²Huchanua kama ua kisha hunyauka;

huwa kama kivuli kipitacho upesi, wala hadumu.

³Je, unamwekea jicho lako mtu kama huyo?

Je, utamleta mbele yako katika hukumu?

⁴Ni nani awezaye kutoa kitu safi kutoka kitu najisi?

Hakuna awezaye!

⁵Siku za mwanadamu zimewekewa mpaka;

umekwisha kutangaza idadi ya miezi yake

na kuweka mpaka ambao hawezi kuuvuka.

⁶Hivyo angalia mbali umwache,

hadi awe amekamilisha muda wake

kama mtu aliyeajiriwa.

⁷“Kwa maana lipo tumaini kwa mti;

kama ukikatwa utachipuka tena,

nayo machipukizi yake mapya hayatakoma.

⁸Mizizi yake yaweza kuchakaa ardhini

na kisiki chake kufa udongoni,

⁹lakini kwa kupata dalili ya maji utachipua

na kutoa machipukizi kama mche.

¹⁰Lakini mwanadamu hufa, na huo ndio mwisho wake;

hutoa pumzi ya mwisho, naye hayuko tena!

¹¹Kama vile maji yanavyotoweka katika bahari,

au mkondo wa mto ukaushwavyo na kuwa mkavu,

¹²ndivyo mwanadamu alalavyo chini asiamke;

hadi mbingu zitakapokuwa hazipo tena,

wanadamu hawataamka au kuamshwa

kutoka usingizi wao.

¹³“Laiti kama ungenificha kaburini,[#14:13 Kaburini maana yake ni Kuzimu ; kwa Kiebrania ni Sheol.]

na kunisitiri hadi hasira yako ipite!

Laiti ungeniwekea wakati,

na kisha ukanikumbuka!

¹⁴Je, kama mtu akifa, aweza kuishi tena?

Siku zote za kazi zangu ngumu

nitangojea kufanywa upya kwangu.

¹⁵Utaniita nami nitakuitika;

utakionea shauku kiumbe ambacho mikono yako ilikiumba.

¹⁶Hakika ndipo utakapozihesabu hatua zangu,

lakini hutazifuatia dhambi zangu.

¹⁷Makosa yangu yatatiwa muhuri kwenye mfuko,

nawe utazifunika dhambi zangu.

¹⁸“Lakini kama mlima umomonyokavyo na kufikichika

na kama vile mwamba uondolewavyo mahali pake,

¹⁹kama maji yamalizavyo mawe,

na mafuriko yachukuavyo udongo,

ndivyo unavyoharibu tegemeo la mwanadamu.

²⁰Humshinda mara moja kwa daima, naye hutoweka;

waibadilisha sura yake na kumwondoa.

²¹Kama wanawe wakipewa heshima, yeye hafahamu;

kama wazao wake wakidharauliwa, yeye haoni.

²²Yeye hasikii kingine isipokuwa maumivu ya mwili wake mwenyewe,

naye huomboleza kwa ajili yake mwenyewe.”