Zaburi 61

Kuomba ulinzi

¹Ee Mungu, sikia kilio changu,

usikilize maombi yangu.

²Kutoka miisho ya dunia ninakuita,

ninakuita huku moyo wangu unadhoofika;

uniongoze kwenye mwamba

ulio juu kuniliko.

³Kwa kuwa umekuwa kimbilio langu,

ngome imara dhidi ya adui.

⁴Natamani kukaa kwenye hema lako milele,

na kukimbilia chini ya uvuli wa mabawa yako.

⁵Ee Mungu, kwa kuwa umesikia nadhiri zangu,

umenipa urithi wa wale wanaoliogopa jina lako.

⁶Mwongezee mfalme siku za maisha yake,

miaka yake kwa vizazi vingi.

⁷Mtawaze mbele za Mungu milele;

amuru upendo wako na uaminifu wako vimlinde.

⁸Ndipo daima nitaliimbia sifa jina lako

na kuzitimiza nadhiri zangu siku baada ya siku.