Zaburi 75

Mungu ni mwamuzi

¹Ee Mungu, tunakushukuru,

tunakushukuru wewe,

kwa kuwa jina lako li karibu;

watu husimulia matendo yako ya ajabu.

²Unasema, “Ninachagua wakati maalum;

ni mimi nihukumuye kwa haki.

³Dunia inapotetemeka na watu wake wote,

ni mimi ninayezishikilia nguzo zake imara.

⁴Kwa wale wenye majivuno ninasema,

‘Msijisifu tena,’

kwa wale waovu, ‘Msiinue pembe zenu.

⁵Msiinue pembe zenu dhidi ya mbingu;

msiseme kwa kiburi.’ ”

⁶Hakuna yeyote atokaye mashariki wala magharibi

au kutoka jangwani awezaye kumkweza mwanadamu.

⁷Bali Mungu ndiye ahukumuye:

Humshusha huyu na kumkweza mwingine.

⁸Mkononi mwa Bwana kuna kikombe

kilichojaa mvinyo unaotoka povu

uliochanganywa na vikolezo;

huumimina, nao waovu wote wa dunia

hunywa hata tone la mwisho.

⁹Bali mimi, nitatangaza hili milele;

nitaimba sifa kwa Mungu wa Yakobo.

¹⁰Nitazikatilia mbali pembe za waovu wote,

bali pembe za wenye haki zitainuliwa juu.