Zaburi 89

Wimbo wakati wa taabu ya kitaifa

¹Nitaimba kuhusu upendo mkuu wa Bwana milele;

kwa kinywa changu nitavijulisha

vizazi vyote uaminifu wako.

²Nitatangaza kuwa upendo wako unasimama imara milele

na uaminifu wako umeuthibitisha mbinguni.

³Ulisema, “Nimefanya agano na mteule wangu,

nimemwapia mtumishi wangu Daudi,

⁴‘Nitaimarisha uzao wako milele

na kudumisha ufalme wako kwa vizazi vyote.’ ”

⁵Ee Bwana , mbingu zinayasifu maajabu yako,

uaminifu wako pia katika kusanyiko la watakatifu.

⁶Kwa kuwa ni nani katika mbingu

anayeweza kulinganishwa na Bwana ?

Ni nani miongoni mwa viumbe vya mbinguni

aliye kama Bwana ?

⁷Katika kusanyiko la watakatifu, Mungu huogopwa sana,

anahofiwa kuliko wote wanaomzunguka.

⁸Ee Bwana , Mungu wa majeshi,

ni nani aliye kama wewe?

Ee Bwana , wewe ni mwenye nguvu,

na uaminifu wako unakuzunguka.

⁹Wewe unatawala bahari yenye msukosuko;

mawimbi yake yanapoinuka, wewe unayatuliza.

¹⁰Wewe ulimponda Rahabu[#89:10 jina la Misri kwa fumbo]

kama mmoja wa waliochinjwa;

kwa mkono wako wenye nguvu,

uliwatawanya adui zako.

¹¹Mbingu ni zako, nayo nchi pia ni yako,

uliuwekea ulimwengu msingi

pamoja na vyote vilivyomo.

¹²Uliumba kaskazini na kusini;

Tabori na Hermoni wanaliimbia jina lako kwa furaha.

¹³Mkono wako umejaa uwezo;

mkono wako una nguvu,

mkono wako wa kuume umetukuka.

¹⁴Haki na hukumu ndio msingi wa kiti chako cha enzi;

upendo na uaminifu vinakutangulia.

¹⁵Heri ni wale ambao wamejifunza kukusifu kwa shangwe,

wanaotembea katika mwanga

wa uwepo wako, Ee Bwana .

¹⁶Wanashangilia katika jina lako mchana kutwa,

wanafurahi katika haki yako.

¹⁷Kwa kuwa wewe ni utukufu na nguvu yao,

kwa wema wako unatukuza pembe yetu.

¹⁸Naam, ngao yetu ni mali ya Bwana ,

na mfalme wetu mali ya Aliye Mtakatifu wa Israeli.

¹⁹Ulizungumza wakati fulani katika maono,

kwa watu wako waaminifu, ukasema:

“Nimeweka nguvu kwa shujaa,

nimemwinua kijana miongoni mwa watu.

²⁰Nimemwona Daudi, mtumishi wangu,

na nimempaka mafuta yangu matakatifu.

²¹Kitanga changu kitamtegemeza,

hakika mkono wangu utamtia nguvu.

²²Hakuna adui atakayemtoza ushuru,

hakuna mtu mwovu atakayemtesa.

²³Nitawaponda adui zake mbele zake

na kuwaangamiza watesi wake.

²⁴Upendo wangu mkamilifu utakuwa pamoja naye,

kwa Jina langu pembe yake itatukuzwa.

²⁵Nitauweka mkono wake juu ya bahari,

mkono wake wa kuume juu ya mito.

²⁶Naye ataniita kwa sauti, ‘Wewe ni Baba yangu,

Mungu wangu, Mwamba na Mwokozi wangu.’

²⁷Nitamteua pia awe mzaliwa wangu wa kwanza,

aliyetukuka kuliko wafalme wote wa dunia.

²⁸Nitadumisha upendo wangu kwake milele,

na agano langu naye litakuwa imara.

²⁹Nitaudumisha uzao wake milele,

kiti chake cha utawala kama mbingu zinavyodumu.

³⁰“Kama wanawe wataacha amri yangu

na wasifuate sheria zangu,

³¹wakihalifu maagizo yangu

na kutoshika amri zangu,

³²nitaadhibu dhambi yao kwa fimbo,

uovu wao kwa kuwapiga;

³³lakini sitauondoa upendo wangu kwake,

wala sitausaliti uaminifu wangu kamwe.

³⁴Mimi sitavunja agano langu

wala sitabadili lile ambalo midomo yangu imelitamka.

³⁵Mara moja na kwa milele, nimeapa kwa utakatifu wangu,

nami sitamdanganya Daudi:

³⁶kwamba uzao wake utaendelea milele,

na kiti chake cha enzi kitadumu mbele zangu kama jua;

³⁷kitaimarishwa milele kama mwezi,

shahidi mwaminifu angani.”

³⁸Lakini wewe umemkataa, umemdharau,

umemkasirikia sana mpakwa mafuta wako.

³⁹Umelikana agano lako na mtumishi wako,

na umelinajisi taji lake mavumbini.

⁴⁰Umebomoa kuta zake zote,

na ngome zake zote umezifanya kuwa magofu.

⁴¹Wote wapitao karibu wamemnyangʼanya mali yake;

amekuwa dharau kwa majirani zake.

⁴²Umeutukuza mkono wa kuume wa adui zake,

umewafanya watesi wake wote washangilie.

⁴³Umegeuza makali ya upanga wake,

na hukumpa msaada katika vita.

⁴⁴Umeikomesha fahari yake,

na kukiangusha kiti chake cha enzi.

⁴⁵Umezifupisha siku za ujana wake,

umemfunika kwa vazi la aibu.

⁴⁶Hata lini, Ee Bwana ? Utajificha milele?

Ghadhabu yako itawaka kama moto hata lini?

⁴⁷Kumbuka jinsi maisha yangu yanavyopita haraka.

Ni kwa ubatili kiasi gani umemuumba mwanadamu!

⁴⁸Ni mtu gani awezaye kuishi na asione kifo,

au kujiokoa mwenyewe kutoka nguvu za kaburi?

⁴⁹Ee Bwana, uko wapi upendo wako mkuu wa mwanzoni,

ambao katika uaminifu wako ulimwapia Daudi?

⁵⁰Bwana kumbuka jinsi mtumishi wako amesimangwa,

jinsi ninavyovumilia moyoni mwangu dhihaka za mataifa yote,

⁵¹dhihaka ambazo kwazo adui zako

wamenisimanga, Ee Bwana ,

ambazo kwazo wamesimanga

kila hatua ya mpakwa mafuta wako.

⁵²Ahimidiwe Bwana milele!