Zaburi 95

Wimbo wa kumsifu Mungu

¹Njooni, tumwimbie Bwana kwa furaha;

tumfanyie kelele za shangwe

Mwamba wa wokovu wetu.

²Tuje mbele zake kwa shukrani,

tumtukuze kwa vinanda na nyimbo.

³Kwa kuwa Bwana ni Mungu mkuu,

mfalme mkuu juu ya miungu yote.

⁴Mkononi mwake mna vilindi vya dunia,

na vilele vya milima ni mali yake.

⁵Bahari ni yake, kwani ndiye aliyeifanya,

na mikono yake iliumba nchi kavu.

⁶Njooni, tusujudu, tumwabudu,

tupige magoti mbele za Bwana Muumba wetu,

⁷kwa maana yeye ndiye Mungu wetu,

na sisi ni watu wa malisho yake,

kondoo chini ya utunzaji wake.

Mkiisikia sauti yake leo,

⁸msiifanye mioyo yenu migumu

kama mlivyofanya kule Meriba,

kama mlivyofanya siku ile

kule Masa jangwani,

⁹ambapo baba zenu walinijaribu na kunipima,

ingawa walikuwa wameyaona matendo yangu.

¹⁰Kwa miaka arobaini nilikasirikia kizazi kile,

nikasema, “Hawa ni taifa ambalo mioyo yao imepotoka,

nao hawajazijua njia zangu.”

¹¹Hivyo nikatangaza kwa kiapo katika hasira yangu,

“Kamwe hawataingia rahani mwangu.”