Mapatano ya Yonathani, Rumi na Sparta

¹Yonathani akaona ya kuwa sasa ndio wakati wa kufaa, akachagua watu akawapeleka Rumi ili kuuthibitisha urafiki waliokuwa nao na kuufanya upya.

²Vile vile alipeleka barua kwa Wasparta na mahali pengine.

³Wakafika Rumi, wakaingia barazani wakasema, Yonathani, kuhani mkuu, na taifa la Wayahudi wametutuma kwenu ili kuwafanyia upya ule urafiki na ushirika wa zamani.

⁴Wakawapa barua kwa watu kila mahali, ili wasafirishwe kwa amani kwenye nchi ya Yuda.

⁵Hii ndiyo nakala ya barua Yonathani aliyoiandika kwa Wasparta;

⁶Yonathani, kuhani mkuu, na baraza la Wayahudi, na makuhani, na watu wengine, kwa ndugu zao Wasparta, salamu.

⁷Hata kabla ya wakati huu barua zililetwa kwa kuhani mkuu Oniasi kutoka kwa Ariusi, aliyekuwa mfalme wenu wakati ule, kutuarifu ya kuwa tu jamaa zenu, kama inavyooneshwa katika nakala tunayoileta.

⁸Oniasi akamkaribisha kwa heshima yule mtu aliyetumwa akazipokea zile barua zenye habari za ushirika na urafiki.

⁹Sisi hatuna haja ya mambo hayo, kwa sababu msaada wetu hasa ndio vitabu vitakatifu tulivyo navyo;

¹⁰lakini tumeona vema kutuma watu kwenu ili tuuamshe udugu wetu na urafiki wetu kwenu, wala tusifarakane nanyi zaidi, maana ni wakati mwingi sana tangu mlipompeleka mjumbe kwetu.

¹¹Sisi tunawakumbuka daima, sikukuu zetu na wakati mwingine ufaao, katika dhabihu tutoazo na katika sala zetu, kama inavyotupasa kuwakumbuka ndugu zetu;

¹²tena, tunaufurahia utukufu wenu.

¹³Lakini shida nyingi na vita vingi vilitusonga, na wafalme wanaotuzunguka walipigana nasi;

¹⁴basi, hatukutaka kuwasumbua ninyi na rafiki zetu wengine kwa habari za vita hivyo.

¹⁵Maana msaada wetu ni ule utokao mbinguni, nasi tumelindwa na adui zetu, nao adui wameshushwa.

¹⁶Tumewachagua Numenio mwana wa Antioko na Antipateri mwana wa Yasoni, tukawapeleka kwa Warumi kuufanya upya ushirika na urafiki tuliokuwa nao kwao.

¹⁷Tumewaagiza wafike kwenu pia ili kuwasalimu na kuwapeni barua yetu juu ya kufanya upya udugu wetu.

¹⁸Tafadhali utuletee jibu juu ya hayo.

¹⁹Hii ndiyo nakala ya barua Wasparta waliyomletea Oniasi:

²⁰Ariusi, mfalme wa Wasparta, kwa Oniasi, kuhani mkuu, salamu.

²¹Imeonekena katika maandishi fulani ya kuwa Wasparta na Wayahudi ni jamaa, na wa ukoo wa Abrahamu.

²²Madhali tumejua haya, tafadhali utuandikie habari zenu.

²³Nasi tunawaandikieni kwamba wanyama wetu na mali yetu ni yenu, na yenu ni yetu. Basi, tumewaagiza wawaelezeni hayo.

Kampeni za Yonathani na Simoni

²⁴Yonathani akasikia kama majemadari wa Demetrio wamekuja tena na jeshi kubwa zaidi kuliko lile la kwanza, tayari kupigana naye.

²⁵Akaondoka Yerusalemu, akakutana nao katika nchi ya Hamathi, asiwape nafasi yoyote ya kuingia katika nchi yake.

²⁶Akapeleka wapelelezi kambini mwao, wakarudi wakamwarifu ya kuwa wanajipanga, tayari kuwashambulia usiku.

²⁷Jua lilipokuchwa, Yonathani aliwaagiza watu wake wawe macho, wameshika silaha zao usiku kucha ili wawe tayari kwa vita. Akaweka askari wa zamu kulizunguka kambi lake.

²⁸Adui waliposikia kwamba Yonathani na watu wake wapo tayari kwa vita waliogopa na kutetemeka moyoni.

²⁹Lakini Yonathani na watu wake hawakujua hayo, maana waliiona mioto ikiwaka.

³⁰Yonathani akawafuatia asiwafikie, maana wamekwisha vuka mto Eleuthero.

³¹Basi, Yonathani akageuka, akashika njia nyingine, akawashambulia Waarabu waitwao Wazabidini, akawashinda na kuwateka nyara.

³²Baada ya hayo, akaondoka akaenda Dameski akiipitia nchi yote.

³³Simoni aliondoka, akashika njia kwenda Ashkeloni na ngome za karibu. Akageukia upande akaitwaa Yafa,

³⁴maana alisikia ya kuwa watu wake walitaka kuitia mikononi mwa watu wa Demetrio. Akaweka kikosi cha askari kuilinda.

Kazi huko Yerusalemu

³⁵Yonathani akarudi, akawaita wazee wa watu, akashauriana nao juu ya kujenga maboma katika Uyahudi,

³⁶kuongeza kimo cha kuta za Yerusalemu, na kufanya boma refu kati ya ngome na mji ili kuitenga na mji, ikae peke yake, isiwepo nafasi ya kuuza na kununua.

³⁷Walipokusanyika ili kujenga, sehemu ya ukuta kando ya kijito upande wa mashariki ilianguka, akatengeneza ule uitwao Kafenatha.

³⁸Simoni naye alijenga Adida katika uwanda wa chini, akaifanya imara, akiweka milango na mapingo.

Trifoni amkamata Yonathani

³⁹Trifoni akataka kumiliki Asia na kuivaa taji, na kunyosha mkono wake juu ya mfalme Antioko.

⁴⁰Alidhani ya kuwa Yonathani atamzuia hata labda kupigana naye; kwa hiyo alitafuta njia ya kumkamata na kumwua. Basi, akaondoka akaenda Beth-sheani.

⁴¹Yonathani akatoka na watu elfu arobaini hodari wa vita, kwenda kukutana naye, akafika Beth-sheani.

⁴²Trifoni alipoliona jeshi lake kubwa aliogopa kumnyoshea mkono wake.

⁴³Bali alimpokea kwa heshima, akamjulisha kwa rafiki wake wote, akampa zawadi. Akawaagiza rafiki zake na askari wake wamtii kana kwamba ni yeye mwenyewe.

⁴⁴Akamwuliza Yonathani, Mbona umewachosha watu hawa wote, madhali hakuna vita kati yetu?

⁴⁵Haya, basi, wape ruhusa waende zao. Chagua watu wachache wakae nawe, mfuatane nami hata Tolemaisi, nami nitaikabidhi kwako pamoja na ngome nyingine na askari wake na wakuu wao. Kisha nitageuka na kuondoka, maana ndiyo sababu ya kuja kwangu hapa.

⁴⁶Akamsadiki, akafanya alivyosema, akawapa askari wake ruhusa, wakarudi Uyahudi.

⁴⁷Akabaki na watu elfu tatu; katika hao aliacha wapatao elfu mbili Galilaya, akaenda na elfu moja.

⁴⁸Lakini mara Yonathani alipoingia Tolemaisi, watu wa Tolemaisi waliifunga milango wakamkamata, na wote waliokuja naye waliwaua kwa upanga.

⁴⁹Trifoni akapeleka askari na wapanda farasi waende Galilaya kwenye uwanda mkubwa kuwaua watu wote wa Yonathani.

⁵⁰Na hao walipofahamu ya kuwa amekamatwa na kuuawa pamoja na watu wake walitiana moyo, wakajipanga kiaskari tayari kwa vita, wakaenda zao.

⁵¹Wale waliokuwa wakiwafuata walipoona ya kuwa wako tayari kujipigania waligeuka wakarudi nyuma.

⁵²Wote wakafika nchi ya Uyahudi salama, wakamwombolezea Yonathani na watu wake, na kuogopa sana; Israeli yote ikafanya kilio kikubwa.

⁵³Mataifa waliowazunguka walikusudia kuwaharibu kabisa, maana walisema, Hawana kiongozi wala msaidizi, basi tupigane nao sasa na kulifuta kumbukumbu lao katika wanadamu.