Siku sita za uumbaji na Sabato

¹Hapo mwanzo Mungu aliziumba mbingu na nchi.[#Yn 1:1,3; Ebr 1:10; Ayu 38:4; Isa 44:24; Rum 1:20; Kol 1:16; Ebr 11:3; Ufu 4:11]

²Nayo nchi ilikuwa tupu, tena bila umbo, na giza lilikuwa juu ya uso wa vilindi vya maji; Roho ya Mungu ikatulia juu ya uso wa maji.[#Yer 4:23; Isa 40:12]

³Mungu akasema, Iwe nuru; ikawa nuru.[#2 Kor 4:6; Zab 33:9]

⁴Mungu akaiona nuru, ya kuwa ni njema; Mungu akatenga nuru na giza.

⁵Mungu akaiita nuru Mchana, na giza akaliita Usiku. Ikawa jioni ikawa asubuhi, siku ya kwanza.[#Zab 74:16]

⁶Mungu akasema, Na liwe anga katikati ya maji, likayatenge maji na maji.[#Ayu 37:18; Zab 33:6; 136:5; Yer 10:12; 2 Pet 3:5]

⁷Mungu akaliumba anga, akayatenga yale maji yaliyo juu ya anga na yale maji yaliyo chini ya anga; ikawa hivyo.

⁸Mungu akaliita lile anga Mbingu. Ikawa jioni ikawa asubuhi, siku ya pili.

⁹Mungu akasema, Maji yaliyo chini ya mbingu na yakusanyike mahali pamoja, ili pakavu paonekane; ikawa hivyo.[#Ayu 26:10; 38:8; Zab 33:7; 95:5]

¹⁰Mungu akapaita pale pakavu Nchi; na makusanyiko ya maji akayaita Bahari; Mungu akaona ya kuwa ni vyema.

¹¹Mungu akasema, Nchi na itoe majani, mimea itoayo mbegu, na miti ya matunda izaayo matunda kwa jinsi yake, ambao mbegu zake zimo ndani yake, juu ya nchi; ikawa hivyo.[#Ebr 6:7; Lk 6:44]

¹²Nchi ikatoa majani, mche utoao mbegu kwa jinsi yake, na mti uzaao matunda, ambao mbegu zake zimo ndani yake, kwa jinsi yake; Mungu akaona ya kuwa ni vyema.

¹³Ikawa jioni ikawa asubuhi, siku ya tatu.

¹⁴Mungu akasema, Na iwe mianga katika anga la mbingu ili itenge kati ya mchana na usiku; nayo iwe ndiyo dalili ya kuonesha majira, siku na miaka;[#Kum 4:19; Ayu 25:3,5; Zab 74:16; 136:7]

¹⁵tena iwe ndiyo mianga katika anga la mbingu itie nuru juu ya nchi; ikawa hivyo.

¹⁶Mungu akaumba mianga miwili mikubwa, ule mkubwa utawale mchana, na ule mdogo utawale usiku; akafanya na nyota pia.

¹⁷Mungu akaiweka katika anga la mbingu, itie nuru juu ya nchi[#Zab 8:1]

¹⁸na kuutawala mchana na usiku na kutenga nuru na giza; Mungu akaona ya kuwa ni vyema.

¹⁹Ikawa jioni ikawa asubuhi, siku ya nne.

²⁰Mungu akasema, Maji na yajawe kwa wingi na viumbe vyenye uhai, na ndege waruke juu ya nchi katika anga la mbingu.[#Zab 104:24]

²¹Mungu akaumba nyangumi wakubwa, na kila kiumbe chenye uhai kiendacho, ambavyo maji yalijawa navyo kwa wingi kwa jinsi zao, na kila ndege arukaye, kwa jinsi yake; Mungu akaona ya kuwa ni vyema.

²²Mungu akavibariki, akisema, Zaeni, mkaongezeke, mkayajaze maji ya baharini, ndege na wazidi katika nchi.

²³Ikawa jioni ikawa asubuhi, siku ya tano.

²⁴Mungu akasema, Nchi na izae kiumbe hai kwa jinsi zake, mnyama wa kufugwa, nacho kitambaacho, na wanyama wa mwitu kwa jinsi zake; ikawa hivyo.[#Zab 104:18-23]

²⁵Mungu akaumba aina zote za wanyama wa porini na wa kufugwa na viumbe vyote vitambaavyo juu ya nchi; Mungu akaona ya kuwa ni vyema.

²⁶Mungu akasema, Na tumfanye mtu kwa mfano wetu, kwa sura yetu; wakatawale samaki wa baharini, na ndege wa angani, na wanyama, na nchi yote pia, na kila kiumbe kitambaacho juu ya nchi.[#Zab 100:3; Efe 4:24; Yak 3:9; Zab 8:6]

²⁷Mungu akaumba mtu kwa mfano wake, kwa mfano wa Mungu alimwumba, mwanamume na mwanamke aliwaumba.[#1 Kor 11:7; Efe 4:24; Kol 3:10; Mal 2:15; Mt 19:4; Mk 10:6; Mwa 5:1-2]

²⁸Mungu akawabariki, Mungu akawaambia, Zaeni, mkaongezeke, mkaijaze nchi, na kuimiliki; mkatawale samaki wa baharini, na ndege wa angani, na kila kiumbe chenye uhai kiendacho juu ya nchi.[#Zab 127:3; 1 Tim 4:3; Mwa 9:1,7; Law 26:9; Zab 128:3,4]

²⁹Mungu akasema, Tazama, nimewapa ninyi kila mmea utoao mbegu, ulio juu ya uso wa nchi yote pia, na kila mti, ambao matunda yake yana mbegu; vitakuwa ndiyo chakula;[#Ayu 36:31; Zab 104:14,15; 136:25; 146:7; Mdo 14:17]

³⁰na chakula cha kila mnyama wa nchi, na cha kila ndege wa angani, na cha kila kitu kitambaacho juu ya nchi, chenye uhai; majani yote ya miche, ndio chakula chenu; ikawa hivyo.[#Zab 145:15,16; 147:9; Ayu 38:41]

³¹Mungu akaona kila kitu alichokifanya, na tazama, ni chema sana. Ikawa jioni ikawa asubuhi, siku ya sita.[#Zab 104:24; 1 Tim 4:4]