¹Mtawala mwenye busara huwaelimisha watu wake,

utawala wa mtu mwenye akili una utaratibu mzuri.

²Alivyo mtawala, ndivyo walivyo na maofisa wake;

alivyo mkuu ndivyo walivyo na wakazi wa nchi yake.

³Mfalme asiye na nidhamu ni maangamizi kwa watu wake;

fanaka ya mji yatokana na maarifa ya viongozi wake.

⁴Utawala wa dunia uko mikononi mwa Bwana,

yeye humweka mtawala afaaye kwa wakati wake.

⁵Ufanisi wa binadamu umo mikononi mwa Bwana.

Bwana ndiye ampaye heshima mwandishi.

Kiburi

⁶Usichukizwe na kila kosa la jirani yako,

wala usifanye chochote kwa mkikimkiki wa ghadhabu.

⁷Kiburi huchukiwa na Mungu na binadamu;

udhalimu ni jambo la kuchukiza kwa wote wawili.

⁸Kwa sababu ya udhalimu, kiburi na kupenda utajiri,

mamlaka ya taifa moja huchukuliwa na taifa lingine.

⁹Je, mtu aliye vumbi na majivu atajivunia nini?

Hata alipo hai matumbo yake yananuka.

¹⁰Ugonjwa wa muda mrefu humduwaza daktari,[#10:10 Mstari huu katika makala za Kiebrania na Kigiriki si dhahiri.]

leo ni mfalme kesho ni maiti.

¹¹Maana yanayowapata wote katika kifo ni sawa:

Wadudu, wanyama wakali na minyoo.

¹²Mwanzo wa kiburi ni kumwacha Bwana

na kuupindua moyo wake mbali na muumbaji wake.

¹³Maana chanzo cha kiburi ni dhambi

na mtu anayeambatana nacho atabubujika uchafu.

Ndiyo maana Bwana huwaletea adhabu wasiyoitazamia

watu wa namna hiyo na kuwaangamiza kabisa.

¹⁴Bwana amewaondoa wakuu kwenye viti vyao vya enzi,

na mahali pao amewaketisha wanyenyekevu.

¹⁵Bwana amewangoa wenye kiburi na mizizi yao,

na mahali pao amewaweka wanyenyekevu.

¹⁶Bwana amezifuta nchi za mataifa duniani,

na huyaangamiza hadi kwenye misingi ya dunia.

¹⁷Mataifa mengine ameyaondoa na kuyaangamiza,

na kufuta kumbukumbu lao duniani.

¹⁸Kiburi hakikuumbwa kwa ajili ya watu,

wala ghadhabu kwa ajili ya binadamu.

Watu wa kuheshimiwa

¹⁹Viumbe gani vinavyostahili heshima? Binadamu.

Viumbe gani vinavyostahili heshima? Wale wamchao Bwana.

Viumbe gani visivyostahili heshima? Binadamu.

Viumbe gani visivyostahili heshima? Wanaovunja amri.

²⁰Kati ya ndugu mkubwa wao anastahili heshima.

Wanaomcha Mungu hustahili heshima mbele yake. [

²¹Kumcha Mungu ni mwanzo wa mafanikio;

lakini ukaidi na kiburi ni mwanzo wa kutofanikiwa.]

²²Matajiri, waheshimiwa na maskini,

wajivunie kumcha Bwana.

²³Si vema kumdharau mtu aliye maskini lakini ana akili,

wala si vizuri kumheshimu mwenye dhambi.

²⁴Mtawala, hakimu na mwenye cheo ni wa kuheshimiwa,

lakini anayemcha Mungu ni mkuu kuliko hao wote.

²⁵Mtumwa mwenye hekima atahudumiwa na watu huru;

na mwenye busara hatanungunika juu yake.

Kujishusha na kujiheshimu

²⁶Usijioneshe kuwa mtaalamu ufanyapo kazi yako,

wala usijisifu wakati una taabu.

²⁷Afadhali mtu mwenye bidii kazini na ana kila kitu,

kuliko mtu anayezurura akijigamba na hana chakula.

²⁸Mwanangu, jisifu kwa unyenyekevu,

na ujione wewe mwenyewe ustahilivyo.

²⁹Mtu anayejipatiliza mwenyewe nani atamwona hana hatia?

Nani atakayemheshimu mtu anayejidharau mwenyewe?

³⁰Maskini huweza kuheshimiwa kwa maarifa yake;

na tajiri kwa utajiri alio nao.

³¹Anayeheshimiwa akiwa maskini

bila shaka ataheshimiwa zaidi akiwa tajiri!

Anayedharauliwa akiwa tajiri

bila shaka atadharauliwa zaidi akiwa maskini!