Sifa kwa wazee

¹Sasa, na tuwasifu watu mashuhuri,

wazee wetu na vizazi vilivyopita.

²Bwana aliwapa fahari kubwa,

akawafanya wakuu tangu siku za kale.

³Walikuwako wale waliotawala falme zao,

watu mashuhuri kwa nguvu zao;

washauri waliojaa busara,

watangazaji wa unabii.

⁴Wengine waliongoza mataifa kwa mawazo yao,

wakawa wenye maarifa ya elimu kwa faida ya watu,

wenye hekima katika maneno na mafundisho yao.

⁵Walitunga nyimbo kwa ufundi,

wakabuni mashairi na kuyaandika.

⁶Walikuwa matajiri wenye mali tele,

waliishi kwa utulivu katika makazi yao.

⁷Hao wote waliheshimika katika vizazi vyao,

wakawa wenye fahari nyakati zao.

⁸Baadhi yao waliacha jina jema duniani,

na watu wakatangaza sifa zao mpaka leo.

⁹Wako na wengine ambao hawakumbukwi,

ambao wametoweka wakawa kama hawakuishi.

Walikuwa kana kwamba hawakupata kuzaliwa,

kadhalika na watoto wao baada yao.

¹⁰Lakini wale wengine walikuwa watu wema,

ambao matendo yao adili hayajasahaulika.

¹¹Mali yao hubaki na wazawa wao,

na huo ndio urithi wao.

¹²Wazawa wao huzingatia agano,

na kwa ajili yao wataendelea kufanya hivyo.

¹³Nasaba yao itadumu milele,

na fahari yao haitafutika.

¹⁴Miili yao ilizikwa kwa amani,

na majina yao yanadumu kizazi hata kizazi.

¹⁵Watu watasimulia hekima yao,

na jumuiya ya watu itatangaza sifa zao.

Henoki na Noa

¹⁶Henoki alimpendeza Bwana, akachukuliwa mbinguni.

Yeye alikuwa mfano bora wa toba vizazi vyote.

¹⁷Noa alionekana mkamilifu na mwadilifu;

yalipokuja maangamizi, akawa mwanzo mpya wa binadamu.

Maana kwake watu waliachwa duniani, tufani ilipokuja.

¹⁸Bwana alifanya naye agano la milele,

kwamba viumbe vyote wasifutiliwe mbali kwa ile tufani.

Abrahamu, Isaka na Yakobo

¹⁹Abrahamu alikuwa mzee maarufu wa mataifa mengi,

hakuna aliyekuwa na fahari kama yeye.

²⁰Alishika sheria ya Mungu Mkuu,

na Bwana akafanya agano naye,

akakamilisha katika mwili wake alama ya agano hilo,

naye Abrahamu alipojaribiwa, akaonekana kuwa mwaminifu.

²¹Hivyo Bwana akamhakikishia kwa kiapo

kwamba mataifa yatabarikiwa kwa njia ya wazawa wake;

kwamba wazawa wake watakuwa wengi kama mavumbi ya nchi.

Kwamba watakuwa wengi kama nyota,

na urithi wao tangu bahari hadi bahari,

tangu mto Eufrate mpaka miisho ya dunia.

²²Vilevile Bwana alimpa Isaka uthibitisho ule ule

kwa ajili ya Abrahamu, baba yake.

Baraka za watu wote na agano lake,

²³aliziweka juu ya Yakobo.

Alimwimarisha Yakobo kwa baraka zake,

akampa ile nchi iwe yake mwenyewe,

na kuigawa miongoni mwa makabila kumi na mawili.