Utenzi wa shukrani

¹Nakushukuru, ee Bwana na Mfalme,

nakusifu, ee Mungu, Mwokozi wangu.

Nalitukuza jina lako.

²Maana wewe umekuwa mlinzi na msaidizi wangu.

Umeukomboa mwili wangu kutoka kwenye maangamizi,

kutoka kwenye mitego ya watu wadanganyifu,

na kutoka kwa watu wasemao uongo.

Mbele ya maadui zangu ulikuwa upande wangu;

umekuwa msaada wangu, umenikomboa.

³Kwa ukuu wa huruma yako na jina lako,

umenikomboa makuchani mwa maadui waliotaka kuniangamiza,

kutoka kwa wale waliotafuta maisha yangu,

kutoka katika mateso mengi niliyoyavumilia;

⁴kutoka katika moto ulionisonga pande zote,

moto ambao mimi sikuuwasha;

⁵kutoka katika vilindi vya kuzimu,

kutoka kwa wanaosema machafu na uongo,

na kutoka masengenyo ya ulimi mwovu.

⁶Nilikuwa kwenye nimekaribia kabisa kifo,

na maisha yangu yalikuwa karibu na chini kuzimu.

⁷Nilikuwa nimezungukwa kabisa,

sikuwa na yeyote wa kunisaidia.

Nilitazama nipate msaada wa binadamu,

lakini hakuna aliyenisaidia.

⁸Kisha nikakumbuka huruma zako, ee Bwana,

na kazi zako za tangu zamani,

kwamba wewe wawakomboa wale wanaokutegemea,

na huwaokoa makuchani mwa maadui zao.

⁹Nami nikapeleka juu kwako ombi langu,

nikakuomba uniokoe kutoka kwenye kifo.

¹⁰Namlilia Bwana: “Wewe u Baba yangu!

Usiniache katika siku ya mateso,

ambapo hakutakuwa na msaada dhidi ya adui.

¹¹Nitalisifu jina lako daima,

nitakuimbia nyimbo za sifa na shukrani.”

Ombi langu lilipokelewa,

¹²maana uliniokoa nisiangamie,

ukanisalimisha wakati mbaya.

Kwa hiyo nitakushukuru na kukusifu,

nitalisifu jina la Bwana.

Shairi la kumtafuta Hekima

¹³Nilipokuwa bado mdogo, kabla sijaanza kusafiri,

kwa sala yangu nilitafuta hadharani nimpate Hekima.

¹⁴Nikiwa nimesimama nje ya hekalu nilimtafuta,

nami nitamtafuta mpaka mwisho.

¹⁵Tangu kuchanua kwake mpaka kuiva,

nilimfurahia sana moyoni mwangu.

Nyayo zangu zilifuata njia nyofu;

tangu ujana wangu nimezifuata njia zake.

¹⁶Nilitega sikio langu kidogo nikampokea Hekima,

nami nikajipatia mafunzo mengi.

¹⁷Nilizidi kuendelea kwa hekima,

naye atakayenipa hekima nitamtukuza.

¹⁸Maana niliamua kuishi kulingana na hekima,

nikawa na hamu sana ya kutenda mema,

na wala sitaaibishwa kamwe.

¹⁹Nilijishughulisha sana nipate hekima,

nikawa mwangalifu sana kuhusu mwenendo wangu.

Nilinyosha mikono yangu mbinguni kuomba,

nikalalamika kwa vile sikumjua Hekima.

²⁰Niliielekeza nafsi yangu kwa Hekima,

nami nikampata kwa kujitakasa.

Kutoka kwake nilipata maarifa tangu mwanzo,

nami najua kwamba sitaachwa bila msaada wake.

²¹Moyo wangu ulipania kumtafuta Hekima,

ndiyo maana sasa nimepata utajiri mkubwa.

²²Bwana alitunukia zawadi ya kuwa na ulimi,

nami nitautumia kumsifu yeye.

²³Njoni kwangu enyi msiojua kitu,

ingieni na kukaa shuleni kwangu.

²⁴Kwa nini mnalalamika kuwa hamna mambo haya,

na kwa nini mioyo yenu inaona kiu?

²⁵Nilifungua kinywa changu na kusema:

“Jipatieni hekima bila kununua.”

²⁶Inamisheni shingo zenu chini ya nira yake,

na kuacha mioyo yenu ipate mafunzo;

Hekima anapatikana karibu sana.

²⁷Oneni wenyewe kwamba nimefanya kazi kidogo,

lakini nimejipatia amani kubwa.

²⁸Jipatieni mafundisho kwa fedha nyingi,

nanyi mtajipatia nayo dhahabu nyingi.

²⁹Mioyo yenu na ifurahie huruma ya Bwana,

wala msiaibishwe kamwe wakati mnapomsifu.

³⁰Fanyeni kazi yenu kabla ya wakati uliopangwa,

naye Mungu awapeni tuzo lenu wakati wake!