Mawaidha mengine

¹Usifanye uovu, na uovu wowote hautakupata.

²Epa ubaya, nao utakukimbia.

³Mwanangu, usilime ardhi kupanda udhalimu,

la sivyo utavuna udhalimu mara saba.

⁴Usiombe cheo kikubwa kwa Bwana,

wala kiti cha heshima kwa mfalme.

⁵Usijioneshe kuwa mwadilifu mbele ya Bwana,

wala usioneshe hekima yako mbele ya mfalme.

⁶Usijaribu kutafuta kuwa hakimu,

usije ukashindwa kutokomeza uovu;

usije ukapotoshwa na mwenye nguvu,

na hivyo kusababisha kupoteza unyofu wako.

⁷Usiiudhi jumuiya ya wananchi,

wala usijivunjie heshima miongoni mwa watu.

⁸Usivutwe kutenda dhambi mara mbili,

maana hutaacha kuadhibiwa hata kwa mmoja.

⁹Usiseme, “Mungu atapokea wingi wa sadaka zangu;

nikimtolea Mungu Mkuu tambiko lazima atapokea.”

¹⁰Usisitesite katika sala,

wala usisahau kuwapa maskini sadaka.

¹¹Usimcheke aliye na huzuni rohoni,

maana Mungu anayemnyenyekeza mtu aweza pia kumwinua.

¹²Usitunge uongo dhidi ya ndugu yako,

wala usimtendee hivyo rafiki yako.

¹³Kataa kabisa kusema uongo,

maana uongo hauleti jema lolote.

¹⁴Usipayukepayuke kwenye mkutano wa wazee,

wala kujirudiarudia katika sala zako.

¹⁵Usichukie kazi ngumu,

au kazi ya shambani iliyopangwa na Mungu Mkuu.

¹⁶Usijiunge na genge la wenye dhambi,

kumbuka kuwa adhabu haitakawia.

¹⁷Uwe mnyenyekevu kabisa,

maana adhabu ya wasiomcha Mungu ni moto na mabuu.

Uhusiano na wengine

¹⁸Usimsaliti rafiki ili kujipatia fedha,

au rafiki wa kweli kujipatia dhahabu ya Ofiri.

¹⁹Uoe mwanamke mwenye hekima na mwema;

mwanamke mwema ni bora kuliko dhahabu.

²⁰Usimtendee vibaya mtumishi mwaminifu kazini,

au kibarua aliyejitolea kukutumikia vema.

²¹Mpende mtumwa mwenye akili kwa moyo wote;

usimnyime mtumwa wa namna hiyo uhuru wake.

²²Je, una mifugo? Basi, ichunge!

Kama ina faida kwako, baki nayo.

²³Je, una watoto? Basi, wafunze nidhamu.

Wafundishe utii tangu utoto wao.

²⁴Je, una watoto wa kike?

Wafunze usafi wa mwili,

lakini usiwabembeleze mno.

²⁵Ukimwoza binti yako utakuwa umetimiza kazi kubwa.

Lakini mwoze kwa mwanamume mwenye busara.

²⁶Unaye mke anayekupendeza? Usimpe talaka.

Lakini kama humpendi, usimwamini.

²⁷Mheshimu baba yako kwa moyo wako wote,

wala usisahau uchungu wa mama yako alipokuzaa.

²⁸Kumbuka kwamba wao ndio waliokuzaa.

Je, unaweza kuwalipa yote waliyokutendea?

²⁹Mche Bwana kwa moyo wako wote;

na wape heshima makuhani wake.

³⁰Mpende Muumba wako kwa nguvu zako zote,

na usiwatupe wahudumu wake.

³¹Mche Bwana na kuwaheshimu makuhani.

Mpe Bwana sehemu ulivyoamriwa:

Mazao ya kwanza, tambiko ya hatia,

kidari, na zaka zote zinazotakiwa.

³²Wape maskini kwa ukarimu,

ili Bwana akupe baraka zake kikamilifu.

³³Ukarimu wako uwe kwa watu wote,

wala usiwanyime ukarimu hata marehemu.

³⁴Usiwape kisogo wanaoomboleza,

bali ushiriki huzuni ya walio na huzuni.

³⁵Usiache kuwatembelea wagonjwa;

maana ukiwatembelea utapendwa.

³⁶Katika matendo yako yote kumbuka mwisho wako,

nawe hutatenda dhambi kamwe.