¹Roho yako isiyokufa imo katika vitu vyote.

²Kwa hiyo wawakosoa kwa taratibu wale wanaokukosea;

na kuwakumbusha na kuwaonya juu ya yale wanayokukosea nayo,

ili waachane na ubaya wao na kukutumainia wewe, ee Bwana.

Ubaya wa watu wa Kanaani

³Pia wale wakazi wa awali wa nchi yako takatifu,

⁴uliwachukia kwa sababu walifanya mambo ya kuchukiza mno:

Walifanya uchawi na ibada chafu;

⁵walichinja watoto bila huruma,

wakala nyama na damu za watu kama sadaka;

walishiriki ibada za siri,

⁶na mauaji ya watoto wasioweza kujitetea.

Kwa kupenda kwako watu hao waliangamizwa na wazee wetu,

⁷kusudi nchi hiyo unayoithamini kuliko zote

iwe makao ya watu wanaofaa kuwa watumishi wako.

⁸Lakini hata hawa uliwaonea huruma maana ni watu tu.

Ulipeleka nyuki watangulie jeshi lako

ili kuwaangamiza polepole.

⁹Ungaliweza kuwaruhusu watu wema wawaangamize waovu vitani;

au ungaliweza kuwaangamiza kwa wanyama wakali au kwa neno moja kali.

¹⁰Lakini ulitekeleza hukumu yako polepole kuwapa fursa ya kutubu;

ingawa ulijua kwamba kwa asili walikuwa waovu:

Walikuwa wakorofi tangu kuzaliwa kwao

na kwamba hawangeweza kubadili mawazo yao.

¹¹Naam, wao walikuwa wamelaaniwa tangu awali,

wala si kwa kumwogopa mtu yeyote ndipo ukawaacha kuwaadhibu kwa dhambi zao.

Mungu ana uwezo juu ya yote

¹²Nani awezaye kukuuliza kisa cha matendo yako,

au kupinga uamuzi wako?

Nani atakushtaki kwamba umeangamiza mataifa uliyoyaumba?

Nani awezaye kuja mbele yako kuwatetea watu hao waovu?

¹³Hakuna mungu mwingine ila wewe

ambaye huyaangalia maslahi ya wote

nawe wapaswa kutambuliwa kwamba umehukumu kwa haki.

¹⁴Wala hakuna mfalme au mtawala yeyote awezaye kukushtaki

ukiwa umemwadhibu mtu yeyote.

¹⁵Kwa vile wewe ni mwadilifu na watawala kwa uadilifu

kamwe hutumii nguvu yako kumwadhibu asiyestahili adhabu.

¹⁶Uwezo wako ni asili ya uadilifu;

wawaonea huruma watu wote kwa maana wewe ni Bwana wa wote.

¹⁷Iwapo binadamu hasadiki kwamba uwezo wako ni mkamilifu,

basi, wewe huidhihirisha nguvu yako,

na kuwafadhaisha wale wanaojua uwezo wako lakini hawaujali.

¹⁸Ingawa unao uwezo mkuu, hata hivyo wahukumu kwa upole;

na watutawala kwa uvumilivu mkubwa

maana unao uwezo wa kuadhibu wakati wowote upendao.

¹⁹Kwa matendo yako umewafundisha watu wako

kwamba mtu aliye mwadilifu anapaswa kuwa mpole.

Umewapa watoto wako matumaini makubwa,

maana watu wakikosa unawajalia uwezekano wa kutubu.

²⁰Wewe ulikuwa mwangalifu na mwenye uvumilivu

katika kuwaadhibu maadui za watu wako ingawa walistahili kufa;

uliwapa fursa kubwa ya kuachana na uovu wao.

²¹Lakini watu wako wewe mwenyewe uliwahukumu vikali,

ingawa ulikuwa umewaapia na kuwaahidia wazee wao mambo mema.

²²Basi, watuadhibu sisi,

lakini wawaadhibu maadui zetu mara elfu kumi zaidi

kusudi wakati tunapohukumu tuukumbuke wema wako

na wakati tunapohukumiwa tutazamie kupata huruma.

Adhabu ya Wamisri

²³Basi, wale walioishi vibaya na kipumbavu,

uliwatesa kwa vitu vyao vya kuchukiza.

²⁴Walipotea mbali katika makosa,

wakaabudu vinyama ambavyo hata maadui zao walividharau;

walidanganyika kama watoto wapumbavu.

²⁵Hivyo kama watoto wasio na akili,

uliwaletea adhabu wakazomewa.

²⁶Lakini wale wanaodharau kuonywa kwa adhabu kidogo,

watauona uzito wa adhabu Mungu atakayowapa.

²⁷Walipoadhibiwa kwa viumbe vilevile walivyodhani kuwa miungu,

walipumbazika wakafahamu kwamba Mungu wa kweli ni yuleyule waliyekuwa wanakataa kumtambua.

Kwa hiyo walipata adhabu kali kabisa.