Wamisri wanavamiwa na kitisho usiku

¹Naam, hukumu zako ni kuu mno na ngumu kueleza;

ndiyo maana wasiotaka kufunzwa hupotea.

²Maana watu wakorofi walipodhani wamelitia taifa lako chini ya nguvu zao,

wao wenyewe walifungwa katika usiku mrefu wa giza,

wamefungiwa nyumbani mwao mbali na uangalizi wako wa daima.

³Walidhani kwamba dhambi zao zilikuwa siri na zisizofichuliwa,

zikikingwa zisionekane kwa pazia jeusi la usahaulifu;

lakini sasa walikumbwa na hofu ya kutisha,

wakafadhaika na kutawanyika kwa kuona mizimu.

⁴Hata nyumba zao za giza walimokaa hazikuwakinga na hofu.

Walizungukwa na sauti za kutisha;

mizimu yenye huzuni na nyuso za kukunjamana iliwatokea.

⁵Hakuna moto uliokuwa na nguvu ya kuwaangazia,

wala nyota angavu hazikuweza kulimulika lile giza la kifo.

⁶Walitokewa tu na moto wa ajabu usiowashwa na binadamu ukawaangazia,

na kwa hofu yao wakaamini kwamba hayo waliyoyaona yalikuwa ya kutisha

kuliko walivyotazamia kuona.

⁷Hila walizofanya kwa uchawi wao zilishindwa

na hekima yote waliyojisifia ikaaibishwa.

⁸Maana wale waliodai watafukuza hofu na fadhaa kutoka kwa mgonjwa,

wao wenyewe walikuwa sasa wagonjwa kwa woga wa kuchekesha.

⁹Hata wakati hapakuwa na kitu cha kutisha,

wao walikumbwa na hofu kwa sauti za nyoka na vinyama vilivyotambaa.

¹⁰Waliangamia kwa kutetemeka kwa woga,

wakikataa hata kuiangalia hewani jambo lisiloepukika!

¹¹Uovu msingi wake ni woga, na unajipatiliza wenyewe.

Mwenye dhamiri yenye hatia anaona daima mabaya kuliko ilivyo kweli.

¹²Woga ni ukosefu wa msaada ambao huletwa na akili timamu.

¹³Mtu anapokosa tumaini la ndani moyoni,

hujiachia kupatwa na hofu inayosababishwa na ujinga.

¹⁴Lakini wao, wakati wa usiku huo usiopumzisha

usiku unaotoka kwenye kutisha kuzimu,

wakiwa wanalala usingizi huo huo,

¹⁵pengine walifukuzwa kwa vivuli vya kutisha

au walikufa ganzi na kulegea rohoni mwao;

woga wa ghafla usiotazamiwa uliwakumba.

¹⁶Hivyo mtu yeyote aliyekuwa humo alizimia,

akawa amefungwa katika gereza lisilo na fito za chuma.

¹⁷Wakulima, wachungaji,

au vibarua waliofanya kazi porini,

wote walipatwa na vituko hivyo visivyoepukika,

maana wote walifungwa kwa mnyororo ule ule wa giza.

¹⁸Kila waliposikia mvumo mdogo wa upepo,

au sauti tamu ya ndege katika matawi yaliyotanda,

au maporomoko ya maji yaendayo kasi,

¹⁹au mianguko ya miamba iliyovurumishwa,

au wanyama wasioonekana wakikimbia na kuruka,

au sauti za wanyama wakinguruma kwa ukali,

au hata miangwi katika mapango ya milima,

wao walizirai kwa hofu.

²⁰Ulimwengu wote ulimulikwa na nuru angavu,

na watu walishughulikia mambo yao bila wasiwasi;

²¹ni wao tu peke yao waliofunikwa kwa usiku huo mzito,

mfano wa giza lile la kifo lililokuwa linawangojea;

lakini wakawa mzigo mzito kwao wenyewe kuliko hata lile giza.