¹Siku hiyo, mtu mwema atasimama kwa ujasiri mwingi,

mbele yao hao waliokuwa wanamtesa

na wale ambao walipuuza kazi zake.

²Watakapomwona watatetemeka kwa hofu kubwa,

watashangaa ameokolewaje bila wao kutazamia.

³Ndipo watakapojuta na kusemezana wao kwa wao

na kwa kuugua moyoni wataambiana:

⁴“Huyu ndiye mtu yuleyule tuliyemdhihaki zamani,

tukamwona ni kichekesho;

kweli tulikuwa wapumbavu.

Tulidhani aliishi kama mwendawazimu,

na alipokufa hatukumpa heshima.

⁵Imekuwaje sasa yuko pamoja na watoto wa Mungu

na anayo sehemu yake kati ya watakatifu wake!

⁶Kumbe sisi ndio tuliokiuka njia ya kweli!

Hatukuishi katika mwanga wa haki,

wala mwanga wake haukutuangaza.

⁷Sisi tulijaa upotovu na uharibifu;

tulitangatanga jangwani pasipo njia,

wala hatukujua njia ya Bwana.

⁸Kujigamba kwetu kumetufaa nini?

Tumepata faida gani kwa utajiri tuliojivunia?

⁹Vitu hivyo vyote vimepita kama kivuli;

naam, kama minongono inayotoweka.

¹⁰Ni kama meli ipasuayo mawimbi baharini,

lakini ikisha pita alama yake haionekani,

wala mkondo wake katika mawimbi.

¹¹Au kama vile ndege arukavyo angani:

Haachi alama yoyote ya njia yake;

huipigapiga hewa nyepesi kwa mabawa yake,

huipenya kwa nguvu za kuruka kwake,

na huipasua kwa mapigo ya mabawa yake,

lakini haachi alama yoyote ya kupita kwake.

¹²Kadhalika mshale: Unapofyatuliwa kulenga shabaha,

hupenya hewa, lakini hewa hufumba mara moja;

wala hakuna mtu awezaye kutambua ulipopitia.

¹³Kadhalika nasi, mara baada ya kuzaliwa twatoweka,

bila hata kuacha nyuma alama yoyote ya wema,

bali tuliangamia katika uovu wetu wenyewe.”

¹⁴Matumaini ya mwovu ni kama makapi yapeperushwayo na upepo;

ni kama povu linalochukuliwa na tufani;

hutawanywa kama moshi mbele ya upepo,

hupita kama kumbukumbu ya mgeni wa siku moja.

¹⁵Lakini watu wema huishi milele

na tuzo lao liko kwa Bwana;

naam, Mungu Mkuu huwatunza.

¹⁶Kwa hiyo watapokea taji tukufu,

na kilemba maridadi mkononi mwa Bwana,

maana kwa mkono wake wa kulia atawafunika,

kwa mkono wake atawakinga kama kwa ngao.

¹⁷Atautwaa upendo wake mkuu kama zana za vita;

atavipa silaha viumbe vyote kufukuza maadui zake.

¹⁸Haki itakuwa kama vazi la kujikinga kifua,

hukumu ya haki itakuwa kama kofia yake ya chuma;

¹⁹utakatifu utakuwa ndio ngao yake imara.

²⁰Atainoa ghadhabu yake kali kuwa upanga,

na ulimwengu wote utajiunga naye

kupigana na maadui wasio na akili.

²¹Umeme utaruka moja kwa moja na kupiga shabaha,

kama mishale kutoka uta imara mawinguni.

²²Mvua ya mawe itawalenga kama kwa uta na mshale;

maji ya bahari yatafurika kwa hasira dhidi yao,

na mito itawaangamiza bila huruma.

²³Upepo mkali utazuka dhidi yao,

na kuwapeperushia mbali kama kimbunga.

Upotovu utasababisha maangamizi nchini kote;

matendo maovu yataporomosha mamlaka ya watawala.