Matendo ya Mitume 11

Petero anayaeleza mambo ya Kornelio.

¹Mitume na ndugu waliokuwako Yudea wakasikia, ya kuwa hata wamizimu wamelipokea Neno la Mungu.[#Tume. 10:45.]

²Petero alipopanda kwenda Yerusalemu, waliotahiriwa wakabishana naye wakisema:

³Umeingia mwa watu wasiotahiriwa, ukala pamoja nao.[#Gal. 2:12.]

⁴Petero akaanza kuwaeleza yote, yalivyofuatana, akisema:

⁵Mimi nilipokuwa katika mji wa Yope nikimwomba Mungu, nikaingiwa na kituko kwa kuona njozi: chombo kinachofanana na guo kubwa linatelemshwa chini toka mbinguni likishikwa kwa pembe zake nne likaja mpaka hapo, nilipokuwa.[#Tume. 10:9-48.]

⁶Nami nilipochungulia mle nikitazama, nikaona, mna nyama wenye miguu minne wa nchini nao nyama wa mwituni nao watambao nao ndege wa angani;

⁷kisha nikasikia sauti ya kuniambia: Inuka, Petero, uchinje, ule!

⁸Ndipo, niliposema: Hapana, Bwana, kwani cho chote kilicho chenye mwiko au kisichotakata hakijaingia bado kinywani mwangu.

⁹Lakini sauti ikanijibu tena toka mbinguni: Mungu alivyovitakasa, wewe usivizie!

¹⁰Vikafanyika hivyo mara tatu, kisha yote yakavutwa tena na kupazwa mbinguni.

¹¹Mara hiyo watu watatu wakasimama mbele ya nyumba, nilimokuwa, walitumwa kwangu toka Kesaria.

¹²Naye Roho akaniambia, niende pamoja nao pasipo mashaka; hata hawa ndugu sita wakafuatana nami, tukaingia nyumbani mwake yule mtu.

¹³Huyo akatusimulia, alivyoona malaika aliyesimama nyumbani mwake na kusema: Tume watu, waende Yope, wamwite Simoni anayeitwa Petero!

¹⁴Ndiye atakayekuambia maneno yatakayokuokoa wewe nao wote wa nyumbani mwako.

¹⁵Nami nilipoanza kusema, Roho Mtakatifu akawaguia, kama alivyotuguia hata sisi hapo kwanza.[#Tume. 2:1-4.]

¹⁶Ndipo, nilipolikumbuka neno la Bwana, alilolisema: Yohana alibatiza kwa maji, lakini ninyi mtabatiza katika Roho takatifu.[#Tume. 1:5.]

¹⁷Mungu alipowapa kipaji kilekile, tulichokipata na sisi tuliomtegemea Bwana Yesu Kristo, hapo mimi nilikuwa na nguvu gani, niweza kumzuia Mungu?

¹⁸Walipoyasikia haya wakanyamaza kimya, wakamtukuza Mungu wakisema: Kumbe hata wamizimu Mungu amewapa majuto, nao wapate uzima!

Wateule wa Antiokia.

¹⁹Wale waliotawanyika kwa sababu ya maumivu, waliyopatwa nayo, Stefano alipouawa, wakazunguka, wakafika mpaka Ufoniki na Kipuro na Antiokia, wasimwambie mtu hilo Neno pasipo Wayuda peke yao.[#Tume. 8:1-4.]

²⁰Lakini wengine wao walikuwa watu wa Kipuro nao wa Kirene. Hao walipofika Antiokia, wakawapigia hata Wagriki mbiu njema ya Bwana Yesu.

²¹Kwa sababu mkono wa Bwana ulikuwa pamoja nao, wakawa wengi waliomgeukia Bwana kwa kumtegemea.[#Tume. 2:47.]

²²Hilo neno lao liliposikilika masikioni pa wateule waliokuwa huko Yerusalemu, wakamtuma Barnaba, aende Antiokia.[#Tume. 4:36.]

²³Naye alipofika na kuviona vipaji, Mungu alivyowagawia, akafurahi, akawahimiza wote, wakaze mioyo kushikamana na Bwana.[#Tume. 13:43.]

²⁴Kwa kuwa mtu mwema aliyejaa Roho takatifu alizidi kumtegemea Mungu; kwa hiyo kikundi kizima cha watu kikapelekwa kwa Bwana.[#Tume. 6:5; 5:14.]

²⁵Kisha akatoka kwenda Tarso kumtafuta Sauli;[#Tume. 9:30.]

²⁶alipomwona akampeleka Antiokia. Kisha wakakaa nao wateule wa hapo hata mwaka mzima, wakafundisha watu wengi; napo hapo Antiokia ndipo, wanafunzi walipoanza kuitwa Wakristo.[#Gal. 2:11.]

²⁷Ikawa siku zile, wakashuka wafumbuaji toka Yerusalemu kufika Antiokia.[#Tume. 13:1; 15:32.]

²⁸Mmoja wao, jina lake Agabo, akainuka kwa kuongozwa na Roho, akaonyesha, kwamba itakuwa njaa kubwa ulimwenguni mote; nayo ikawako siku za Klaudio.[#Tume. 21:10.]

²⁹Ndipo, wanafunzi walipopatana, kwamba kila mtu kwa hivyo, alivyofanikiwa, atoe mali, zipelekwe za kuwatumikia ndugu waliokaa Yudea.[#Gal. 2:10.]

³⁰Wakafanya hivyo, wakawapelekea wazee kwa mikono ya Barnaba na Sauli.[#Tume. 12:25; 1 Kor. 16:1; Gal. 2:10.]