Matendo ya mtu hukoma, matendo yake Mungu hukaa.

¹Kila jambo lina saa yake, kila jambo lipendezalo chini ya mbingu lina wakati wake:[#Mbiu. 8:6.]

²Kuzaliwa kuna wakati wake, nako kufa kuna wakati wake; kupanda kuna wakati wake, nako kuyang'oa yaliyopandwa kuna wakati wake.

³Kuua kuna wakati wake, nako kuponya kuna wakati wake; kubomoa kuna wakati wake, nako kujenga kuna wakati wake.

⁴Kulia kuna wakati wake, nako kucheka kuna wakati wake; kuomboleza kua wakati wake, nako kucheza kuna wakati wake.

⁵Kutupa mawe kuna wakati wake, nako kukusanya mawe kuna wakati wake; kukumbatiana kuna wakati wake, nako kukataa kukumbatiana kuna wakati wake.

⁶Kutafuta kuna wakati wake, nako kupoteza kuna wakati wake; kuweka kuna wakati wake, nako kutupa kuna wakati wake.

⁷Kurarua kuna wakati wake, nako kushona kuna wakati wake; kunyamaza kimya kuna wakati wake, nako kusema kuna wakati wake.

⁸Kupendana kuna wakati wake, nako kuchukiana kuna wakati wake; kupigana kuna wakati wake, nako kutengemana kuna wakati wake.

⁹Afanyaye kazi analo pato gani kwa kusumbuka kwake?

¹⁰Nikautazama utumishi, Mungu aliowapa wana wa Adamu kuutumikia.

¹¹Yote aliyafanya kuwa mazuri wakati wao, akawapa kuziwaza mioyoni mwao nazo siku zijazo; ni hiyo tu, asiyowapa: mtu asiione maana ya kazi, Mungu aliyoifanya toka mwanzo hata mwisho.[#Mbiu. 8:17.]

¹²Ndipo, nilipojua, ya kuwa hakuna lililo jema kwao kuliko kufurahi na kufanya mema siku zao za kuwapo.

¹³Haya nayo nikayajua, ya kuwa kwake kila mtu apataye kula na kunywa na kuona mema kwa masumbuko yake, hiki nacho ni kipaji cha Mungu.

¹⁴Nikajua, ya kuwa yote, Mungu ayafanyayo, hukaa kale na kale; hapo hapana kuongeza wala kupunguza, kwani Mungu aliyafanya kuwa hivyo, watu wamwogope.

¹⁵Yaliyoko yalikuwako kale, nayo yatakaokuwako yalikuwako kale. Naye Mungu huyazusha yaliyopitishwa.

Kumcha Mungu kunatosha.

¹⁶Tena niliona, ya kuwa chini ya jua uko upotovu penye mashauri yanyokayo, napo penye wongofu uko upotovu.

¹⁷Ndipo, niliposema moyoni mwangu: Mungu atamhukumu mwongofu pamoja na mpotovu, kwani kila jambo lipendezalo aliliwekea wakati wake, hata matendo yote.[#Mbiu. 12:14.]

¹⁸Nikasema moyoni mwangu; Ni kwa ajili ya wana wa Adamu, Mungu akitaka kuwajaribu, waone, ya kuwa wao na nyama ni sawa.

¹⁹Kwani jambo la mwisho linalowapata wana wa Adamu nalo jambo la mwisho linalowapata nyama ni jambo lilo hilo moja; kama huyu anavyokufa, ndivyo, yule naye anavyokufa, pumzi yao wote ni moja tu. Kwa hiyo haliko, mtu analompita nyama, kwani yote ni ya bure.[#Sh. 49:13,20.]

²⁰Wote pia hupaendea mahali pale pamoja: wote walitoka uvumbini, tena wote hurudi uvumbini.[#1 Mose 3:19.]

²¹Yuko nani ajuaye, kama roho za wana wa Adamu hupaa juu? au kama roho za nyama hushuka chini kuzimuni?[#Mbiu. 12:7.]

²²Ndivyo, nilivyoona, ya kuwa hakuna mema, mtu ayapatayo kuliko kuzifurahia kazi zake, kwani hili ndilo fungu lake yeye. Kwani yuko nani atakayempeleka mahali, atakapoyaona.