Yohana Mbatizaji.

¹Siku zile alitokea Yohana Mbatizaji, akapiga mbiu nyikani kwa Yudea akisema:[#Luk. 1:13.]

²Juteni! Kwani ufalme wa mbinguni umekaribia.[#Mat. 4:17.]

³Kwani huyo ndiye, aliyemtaja mfumbuaji Yesaya aliposema:

Iko sauti ya mtu apigaye mbiu nyikani:

Itengenezeni njia ya Bwana! Yanyosheni mapito yake!

⁴Naye Yohana alikuwa amevaa mavazi ya manyoya ya ngamia na mkanda wa ngozi kiunoni pake; chakula chake kilikuwa nzige na asali ya mwituni.[#2 Fal. 1:8.]

⁵Ndipo, walipomtokea wa Yerusalemu, nao wote wa Yudea na wa nchi zote za kando ya Yordani,

⁶wakabatizwa naye katika mto wa Yordani wakiyaungama makosa yao.

⁷Lakini alipoona, Mafariseo na Masadukeo wengi wakimjia, wabatizwe, akawaambia: Ninyi wana wa nyoka, nani aliwaambia ninyi ya kuwa mtayakimbia makali yatakayokuja?[#Mat. 12:34; 23:33.]

⁸Tendeni mazao yaliyo ya kujuta kweli!

⁹Msiwaze mioyoni mwenu kusema: Tunaye baba yetu, ndiye Aburahamu! Kwani nawaambiani: katika mawe haya ndimo, Mungu awezamo kumwinulia Aburahamu wana.[#Yoh. 8:33,39; Rom. 2:28-29; 4:12.]

¹⁰Miti imekwisha wekewa mashoka mashinani, kila mti usiozaa matunda mazuri hukatwa, utupwe motoni.[#Luk. 13:7-9.]

¹¹Mimi nawabatiza katika maji, mpate kujuta. Lakini yeye anayekuja nyuma yangu ana nguvu kunipita mimi, nami sifai kumchukulia viatu vyake. Yeye atawabatiza katika Roho takatifu na katika moto.*[#Yoh. 1:26-27,33; Tume. 1:5.]

¹²Ungo wa kupepetea umo mkononi mwake, naye atapafagia pake pa kupuria ngano. Ngano zake atazikusanya, aziweke chanjani, lakini makapi atayachoma kwa moto usiozimika.[#Mat. 13:30.]

Kubatizwa kwa Yesu.

¹³Ndipo, Yesu alipotoka Galilea, akafika Yordani, akamjia Yohana akitaka kubatizwa naye.

¹⁴Lakini Yohana akamzuia akisema: Mimi imenipasa kubatizwa na wewe, nawe wewe unanijia mimi?

¹⁵Yesu akajibu akimwambia: Acha tu! Kwani ndivyo, inavyotupasa kuyatimiza maongozi yote. Ndipo, alipomwachia.

¹⁶Yesu alipokwisha batizwa, papo hapo, alipotoka majini, mbingu zikafunuka, akaona, Roho ya Mungu anavyoshuka kama njiwa na kumjia yeye.

¹⁷Mara sauti ikatoka mbinguni ikasema: Huyu ndiye mwanangu mpendwa, ambaye nimependezwa naye.*[#Mat. 17:5; Yes. 42:1; Ef. 1:6.]