Ungamo la Aguri.

¹Mtu husema: Nimejisumbua, Mungu,

kweli nimejisumbua, Mungu, nikawezekana.

²Mimi ninapumbaa kama nyama,

utambuzi wa kimtu sinao.

³Sikujifunza werevu wa kweli, nimjue Mtakatifu,

kama wengine wanavyomjua.

⁴Ni nani aliyepaa mbinguni, ashuke chini?

Ni nani aukusanyaye upepo magaoni mwake?

Ni nani aliyeyafunga maji katika vazi lake?

Ni nani aliyeyashupaza mapeo yote ya nchi?

Jina lake ni nani? Tena jina la mwanawe ni nani?

Unayajua wewe?

⁵Kila neno la Mungu ni nguvu,

ni ngao yao wamkimbiliao.

⁶Maneno yake usiyaongeze kwa kutia jingine,

asije kukukanya, ukajulikana kuwa mwongo.

Ombo la Aguri.

⁷Ninakuomba maneno haya mawili,

usininyime hayo, nikiwa ningaliko sijafa bado.

⁸Yaliyo upuzi na maneno ya uwongo yaweke mbali yasinifikie!

Usinipe kuwa mkosefu wa mali wala mwenye mali nyingi!

Ila nipe tu, nile chakula changu kinipasacho!

⁹Nisije kwa kushiba, nikabisha kwamba: Bwana ni nani?

Wala nisije kwa ukosefu, nikaiba, nikalikosea Jina la Mungu wangu.

Mifano ya Aguri.

¹⁰Usimsingizie mtumishi kwa bwana wake,

asikuapize, ukajipatia mapatilizo.

¹¹Kiko kizazi cha watu wawaapizao baba zao,

wasiwabariki wamama zao.

¹²Kiko kizazi cha watu waliotakata machoni pao wenyewe,

nao hawakujiosha, uchafu wao uwatoke.

¹³Kiko kizazi cha watu walio wakuu zaidi machoni pao wenyewe,

nazo kope za macho yao huelekezwa juu sana.

¹⁴Kiko kizazi cha watu wenye panga kuwa meno yao,

wenye majisu kuwa magego yao,

hutaka kuwala wanyonge, watoweke katika nchi,

nao wakiwa, watoweke katika watu.

¹⁵Mruba ana wana wawili wa kike: Nipe! Nipe!

Viko vitu vitatu visivyoshiba, tena vinne visivyosema: Basi.

¹⁶Ni kuzimu na tumbo lisilozaa,

ni nchi isiyoshiba maji na moto usiosema: Basi.

¹⁷Jicho la mtu amfyozaye baba yake,

akakataa kumtii mama yake,

sharti kunguru waling'oe mtoni,

liliwe na makinda ya kozi.

¹⁸Yako mambo matatu, ninayoyastaajabu sana,

tena yako manne, nisiyoyajua maana:

¹⁹njia ya tai angani na njia ya nyoka mwambani

na njia ya merikebu baharini na njia ya mtu na mwanamwali.

²⁰Ndivyo, njia ya mwanamke mgoni ilivyo:

hula, kisha hufuta kinywa chake na kusema: Sikukosa neno.

²¹Yako mambo matatu yanayoitetemesha nchi,

tena yako manne, nchi isiyoweza kuyavumilia:

²²ni mtumwa akipata ufalme,

ni mpumbavu akishiba sana vyakula,

²³ni mwanamke aliyechukizwa akiolewa,

ni mjakazi akizipata mali za bibi yake, ziwe fungu lake.

²⁴Wako nyama wanne walio wadogo katika nchi kuliko wengine,

nao ni werevu walioerevuka kweli.

²⁵Ni siafu: kweli hawana nguvu,

lakini huvitengneza vyakula vyao siku za mavuno yao.

²⁶Ni pelele: wao si wenye nguvu,

lakini huweka nyumba zao magengeni.

²⁷Ni nzige: hawana mfalme,

lakini hutoka wote pia vikosi kwa vikosi.

²⁸Ni mijusi: mtu anaweza kuwakamata kwa mikono,

lakini namo majumbani mwa wafalme wamo.

²⁹Wako watatu wenye mwendo upendezao,

tena wako wanne wenye mwendo mzuri.

³⁰Ni simba awapitaye nyama wote nguvu,

harudi nyumba kwa kuona cho chote.

³¹Ni farasi mwenye matandiko kiunoni, ni beberu naye,

tena ni mfalme akiviongoza vikosi vyake.

³²Kama umepumbaa kwa kujikuza, au kama umewaza mabaya moyoni,

kifumbe kinywa kwa kukibandikia mkono!

³³Kwa kusukasuka maziwa huleta siagi,

tena kuzidi kukamua pua hutoa damu,

nako kuchochea makali huleta ugomvi.