MATATHIA ANAANZISHA VITA VITAKATIFU

Matathia na wanawe

¹Siku zile Matathia, mwana wa Yohana, mwana wa Simeoni, kuhani wa ukoo wa Yoaribu, aliondoka Yerusalemu akakaa Modini.

²Alikuwa na wana watano: Yohana, aliyeitwa Gadi;

³Simoni, aliyeitwa Thasi;

⁴Yuda, aliyeitwa Makabayo;

⁵Eleazari, aliyeitwa Auarani; na Yonathani, aliyeitwa Afusi.

⁶Akayaona mambo ya kufuru yaliyotendeka katika Uyahudi na Yerusalemu,

⁷akasema, Ole wangu! Kwa nini nilizaliwa kuuona uharibifu wa watu wangu na maangamizo ya mji mtakatifu, hata kukaa kimya unapotiwa katika mikono ya adui zake, na patakatifu pake katika mikono ya wageni?

⁸Nyumba yake imekuwa kama ya mtu asiye na heshima,

⁹Vyombo vyake vya fahari vimetekwa na kuchukuliwa;

Watoto wake wameuawa njiani,

Na vijana wake kwa upanga wa adui!

¹⁰Taifa lipi lisiloyashiriki mateka yake?

Ufalme upi usioziteka mali zake?

¹¹Mapambo yake yote yameondolewa,

Naye aliyekuwa muungwana amekuwa mtumwa!

¹²Naam, vyombo vitakatifu vyetu na fahari yetu

Na utukufu wetu vimefanywa ukiwa;

Vimetiwa unajisi na watu wa mataifa.

¹³Mbona, basi, tuzidi kuishi?

¹⁴Matathia na wanawe wakararua nguo zao, wakajivika magunia, wakalia kwa majonzi.

Kukataliwa kwa ibada ya mataifa

¹⁵Watumishi wa mfalme waliokuwa wakiwashurutisha watu kuasi wakaja Modini kuwalazimisha watu kutoa dhabihu.

¹⁶Waisraeli wengi wakatokea, hata Matathia na wanawe walikuwapo.

¹⁷Watumishi wa mfalme wakamwambia Matathia, Wewe u kiongozi, mtu mkuu, maarufu katika mji huu. Una wana wako na ndugu zako wa kujiweka upande wako.

¹⁸Basi, tangulia wewe, uitimize amri ya mfalme, kama walivyofanya watu wote wa mataifa, na watu wa Uyahudi, nao waliosalia Yerusalemu. Ndipo wewe na wana wako watahesabiwa kati ya rafiki za mfalme; naam, wewe na wana wako watatuzwa fedha na dhahabu na vipawa vingi.

¹⁹Matathia akajibu, akasema kwa sauti kuu. Hata mataifa yote katika milki ya mfalme wakimtii, akiacha kila mtu dini ya wazee wake na kuchagua kuzifuata amri za mfalme, lakini mimi sivyo.

²⁰Mimi na wanangu na ndugu zangu tutaishika njia ya agano la baba zetu.

²¹Isiwe kwetu kujitenga na sheria na maagano, hasha!

²²Sisi hatutaisikiliza amri ya mfalme tugeuke katika dini yetu, kwa kulia wala kwa kushoto.

²³Alipokwisha kusema hayo, Myahudi mmoja alijitokeza machoni pa watu wote kusudi atoe dhabihu juu ya madhabahu iliyokuwapo Modeni, kama ilivyoamriwa na mfalme.

²⁴Matathia alipomwona, alishikwa na ghadhabu, moyo wake ukatetemeka. Hasira yake ikatokeza hukumu, akamwendea mbio, akamwua pale madhabahuni.

²⁵Kisha alimwua yule mtu wa mfalme naye, aliyekuwa akiishurutisha dhabihu, akaiangusha madhabahu.

²⁶Hivyo alionesha juhudi yake kwa sheria, kama juhudi ya Finehasi juu ya Zimri, mwana wa Salu.[#Hes 25:6-15]

²⁷Kisha, Matathia alipiga mbiu mjini kwa sauti kuu, akisema, Kila aliye na juhudi kwa ajili ya sheria na kutaka kulitetea agano, na anifuate!

²⁸Naye na wana wake wakakimbilia milimani, wakiviacha vyote walivyokuwa navyo mjini.

Wayahudi washika Sabato jangwani na kuuawa

²⁹Ndipo wengi waliokuwa wakitafuta haki na hukumu walikwenda jangwani wafanye maskani yao huko,

³⁰pamoja na wana wao, wake zao na wanyama wao, kwa sababu ya maovu yaliyowalemea.

³¹Habari zikawafikia watumishi wa mfalme na askari waliokuwapo Yerusalemu, kwamba watu kadha wa kadha waliokuwa wameidharau amri ya mfalme wamekwenda kujificha jangwani.

³²Wengi wao wakawafuatia wakawafikia, wakajipanga juu yao siku ya Sabato.[#2 Mak 6:11]

³³Wakawaambia, Basi sasa! Tokeni, mfanye kama mfalme alivyoamuru, nanyi mtaishi.

³⁴Wakasema, Hatutatoka, wala hatutaitii amri ya mfalme kuinajisi siku ya Sabato.

³⁵Ndipo wakawashambulia.

³⁶Nao hawakujilinda, wala kuwatupia jiwe, wala hata kuyaziba mashimo walimojificha.

³⁷Maana walisema, Tufe wote katika usafi wetu, Mbingu na nchi zatushuhudia ya kuwa mnatuua bila haki.

³⁸Wakawashambulia siku ya Sabato, wakafa, pamoja na wake zao na watoto wao na wanyama wao, watu wapatao elfu.

Kazi za Matathia na wafuasi wake

³⁹Matathia na rafiki zake walipopata habari

⁴⁰waliambiana, Kama sisi sote tutafanya kama walivyofanya ndugu zetu, tusipigane na watu wa mataifa kwa ajili ya nafsi zetu na amri zetu, watatufuta upesi katika nchi.

⁴¹Wakafanya shauri siku ile ya kuwa; Kama mtu yeyote akituletea vita siku ya Sabato, tupigane naye; tusife wote kama ndugu zetu waliokufa katika maficho yao.

Jibu la mashambulizi

⁴²Wakati huo kundi la Wahasidimu walijiunga nao, Waisraeli hodari wa vita waliojitoa kwa hiari kuitetea sheria.

⁴³Na wote walioyakimbia maovu walikuja kwao na kuwaongezea nguvu.

⁴⁴Wakakusanya jeshi kubwa, wakawapiga wenye dhambi katika hasira yao, na walioasi katika ghadhabu yao; na waliobaki waliwakimbilia mataifa, wajisalimishe kwao.

⁴⁵Matathia na rafiki zake wakazungukazunguka wakizivunja madhabahu za miungu,

⁴⁶na kutahiri kwa shuruti watoto wote wasiotahiriwa waliowapata katika mipaka ya Israeli.

⁴⁷Wakawafuatia wana wa uovu, na kazi ilifanikiwa mikononi mwao.

⁴⁸Wakaiokoa sheria katika mikono ya mataifa na wafalme, wasikubali wenye dhambi wainue pembe zao.

Wasia wa Matathia

⁴⁹Siku za kufa kwake Matathia zilipokaribia, aliwaambia wanawe: Siku hizi jeuri na lawama vimeongezeka nguvu; ndio wakati wa uharibifu na hasira kali.

⁵⁰Basi wanangu, mwe na juhudi kwa sheria, mtoe maisha yenu kwa ajili ya agano la baba zenu.

⁵¹Yakumbukeni matendo ya baba zenu waliyoyatenda katika vizazi vyao, ili mpate utukufu na jina la milele.

⁵²Je, Abrahamu hakuonekana kuwa amini alipojaribiwa, ikahesabika kwake kuwa haki?[#Mwa 15:16; 22:15-18]

⁵³Yusufu, wakati wa kutaabika kwake, aliishika amri, naye akapata kuwa bwana wa Misri.[#Mwa 39:1—45:28]

⁵⁴Finehasi, baba yetu, kwa sababu alikuwa na juhudi nyingi, alipewa ahadi ya ukuhani wa milele.

⁵⁵Yoshua, kwa kulitimiza neno, alikuwa mwamuzi katika Israeli.[#Hes 13:1—14:12]

⁵⁶Kalebu, kwa kutoa ushuhuda katika mkutano, alipata urithi katika nchi.

⁵⁷Daudi, mwenye rehema, alikirithi kiti cha ufalme wa milele.[#2 Sam 7:16]

⁵⁸Eliya, kwa kuwa aliona wivu mwingi kwa ajili ya sheria, alichukuliwa juu mbinguni.[#2 Fal 2:9-12]

⁵⁹Hanania, Azaria na Mishaeli waliamini, wakaokolewa katika moto.[#Dan 6:1-24; DaJok 1:31-42]

⁶⁰Danieli, kwa kuwa hakuwa na hatia, aliponywa vinywani mwa simba.[#Mwa 2:7; Mhu 3:20; 12:7]

⁶¹Fikirini, basi, vizazi kwa vizazi, hakuna wawekao imani kwake Yeye watakaokosa nguvu.

⁶²Msiyaogope maneno ya mtu mwenye dhambi, maana fahari yake itakuwa samadi na funza.

⁶³Leo atainuka, na kesho hataonekana kamwe, amerudia udongo wake na mawazo yake yamepotea.

⁶⁴Basi, ninyi, wanangu, mwe hodari, simameni imara kwa ajili ya sheria, maana kwa hayo mtatukuzwa.

⁶⁵Tazama, Simoni ndugu yenu, najua ya kuwa yu mtu wa shauri; msikilizeni sikuzote; atakuwa baba kwenu.

⁶⁶Yuda Makabayo, shujaa tangu ujana wake, atakuwa jemadari wenu na kuwapigania watu wenu.

⁶⁷Nanyi, wapokeeni wote wanaoishika sheria, mkatoze kisasi cha maovu waliyotendwa watu wenu.

⁶⁸Wapatilizeni mataifa na kuyaangalia maneno ya sheria.

⁶⁹Akawabariki, akakusanyika kwa baba zake.

⁷⁰Alikufa katika mwaka wa mia moja arubaini na sita, akazikwa katika kaburi la baba zake huko Modeni. Israeli yote ikamfanyia maombolezo makuu.