¹Mkumbuke Muumba wako siku za ujana wako,

Kabla hazijaja siku zilizo mbaya,

Wala haijakaribia miaka utakaposema,

Mimi sina furaha katika hiyo.

²Kabla jua, na nuru, na mwezi,

Na nyota, havijatiwa giza;

Kabla ya kurudi mawingu baada ya mvua;

³Siku ile walinzi wa nyumba watakapotetemeka;[#Zab 71:9; Zek 8:4; 2 Kor 5:1; Mwa 27:1]

Hapo wenye nguvu watakapojiinamisha;

Na wasagao kukoma kwa kuwa ni haba;

Na hao wachunguliao madirishani kutiwa giza;

⁴Na milango kufungwa katika njia kuu;[#Mik 7:1; 2 Sam 19:35]

Sauti ya kinu itakapokuwa ni ndogo;

Na mtu kushtuka kwa sauti ya ndege;

Nao binti za kuimba watapunguzwa;

⁵Naam, wataogopa kilichoinuka[#Law 19:32]

Na vitisho vitakuwapo njiani;

Na mlozi utachanua maua;

Na panzi atakuwa ni mzigo mzito;

Na pilipili hoho itapasuka;

Maana mtu aiendea nyumba yake ya milele,

Nao waombolezao wazunguka njiani.

⁶Kabla haijakatika kamba ya fedha;

Au kuvunjwa bakuli la dhahabu;

Au mtungi kuvunjika kisimani;

Au gurudumu kuvunjika birikani;

⁷Nayo mavumbi kuirudia nchi kama yalivyokuwa,[#Mwa 3:19; Mhu 3:21; Mwa 2:7; Hes 16:22]

Nayo roho kumrudia Mungu aliyeitoa.

⁸Mhubiri asema, Ubatili mtupu; mambo yote ni ubatili!

Hitimisho

⁹Lakini, kwa sababu huyo Mhubiri alikuwa na hekima, aliendelea kuwafundisha watu maarifa, naam, akatafakari, akachunguza, akatunga mithali nyingi.

¹⁰Huyo Mhubiri akachunguza ili apate kuona maneno yapendezayo, na yale yaliyoandikwa kwa unyofu, yaani, maneno ya kweli.

¹¹Maneno yao wenye hekima huwa mfano wa michokoo; na kama misumari iliyogongomewa sana; ndivyo yalivyo maneno yao walio wakuu wa makusanyiko, ambayo yatoka kwa mchungaji mmoja.

¹²Tena, zaidi ya hayo, mwanangu, kubali maonyo; hakuna mwisho wowote wa kutunga vitabu vingi; na kusoma sana huuchosha mwili.

¹³Hii ndiyo jumla ya maneno; yote yamekwisha sikiwa;

Mche Mungu, nawe uzishike amri zake,

Maana kwa jumla ndiyo impasayo mtu.

¹⁴Kwa maana Mungu ataleta hukumuni kila kazi, pamoja na kila neno la siri, likiwa jema au likiwa baya.[#Mt 12:36]