Salamu

¹Paulo, mtume, (si mtume wa wanadamu, wala kutumwa na mwanadamu, bali na Yesu Kristo, na Mungu Baba aliyemfufua kutoka kwa wafu),[#Gal 1:11,12]

²na ndugu wote walio pamoja nami, kwa makanisa ya Galatia;

³Neema na iwe kwenu, na amani, zitokazo kwa Mungu Baba, na kwa Bwana wetu Yesu Kristo;[#Rum 1:7]

⁴ambaye alijitoa nafsi yake kwa ajili ya dhambi zetu, ili atuokoe na dunia hii mbovu iliyopo sasa, kama alivyopenda Mungu, Baba yetu.[#Gal 2:20; 1 Tim 2:6; Tit 3:14; 1 Yoh 5:19]

⁵Utukufu una yeye milele na milele, Amina.

Hakuna Injili nyingine

⁶Nashangaa kwa kuwa mnamwacha upesi hivi yeye aliyewaita katika neema ya Kristo, na kugeukia Injili ya namna nyingine.

⁷Wala si nyingine; lakini wapo watu wawataabishao na kutaka kuigeuza Injili ya Kristo.[#Mdo 15:1,24]

⁸Lakini ijapokuwa sisi au malaika wa mbinguni atawahubiria ninyi Injili yoyote isipokuwa hiyo tuliyowahubiria, na alaaniwe.[#1 Kor 16:22]

⁹Kama tulivyotangulia kusema, na sasa, nasema tena, mtu awaye yote akiwahubiria ninyi Injili yoyote isipokuwa hiyo mliyoipokea, na alaaniwe.

¹⁰Maana, sasa je! Ni wanadamu ninaowashawishi, au Mungu? Au nataka kuwapendeza wanadamu? Kama ningekuwa hata sasa nawapendeza wanadamu, singekuwa mtumwa wa Kristo.[#1 The 2:4]

Paulo athibitisha utume wake

¹¹Kwa maana, ndugu zangu, Injili hiyo niliyowahubiria, nawajulisha ya kuwa siyo ya namna ya kibinadamu.

¹²Kwa kuwa sikuipokea kwa mwanadamu wala sikufundishwa na mwanadamu, bali kwa ufunuo wa Yesu Kristo.

¹³Maana mmesikia habari za mwenendo wangu zamani katika dini ya Kiyahudi, kwamba nililitesa kanisa la Mungu kupita kiasi, nikaliharibu.[#Mdo 8:3; 22:4-5; 26:9-11]

¹⁴Nami niliendelea katika dini ya Kiyahudi kuliko wengi walio hirimu zangu katika kabila yangu, nikajitahidi sana katika kuyashika mapokeo ya baba zangu.[#Mdo 22:3]

¹⁵Lakini Mungu, aliyenitenga tangu tumboni mwa mama yangu, akaniita kwa neema yake,[#Mdo 9:3-6; 22:6-10; 26:13-18; #Rum 1:1; Yer 1:5; Isa 49:1]

¹⁶alipoona vema kumdhihirisha Mwanawe ndani yangu, ili niwahubirie Mataifa habari zake; mara sikufanya shauri na watu wenye mwili na damu;[#Gal 2:7; Mt 16:17]

¹⁷wala sikupanda kwenda Yerusalemu kwa hao waliokuwa mitume kabla yangu; bali nilikwenda zangu Arabuni, kisha nikarudi tena Dameski.

¹⁸Kisha, baada ya miaka mitatu, nilipanda kwenda Yerusalemu ili nionane na Kefa, nikakaa kwake siku kumi na tano.[#Mdo 9:26-30]

¹⁹Lakini sikumwona mtume mwingine, ila Yakobo, ndugu yake Bwana.[#Mt 13:55]

²⁰Na hayo ninayowaandikia, angalieni, mbele za Mungu, sisemi uongo.

²¹Baadaye nilikwenda pande za Shamu na Kilikia.[#Mdo 9:30]

²²Lakini sikujulikana uso wangu na makanisa ya Yudea yaliyokuwa katika Kristo;

²³ila wamesikia tu ya kwamba huyo aliyetutesa hapo kwanza, sasa anaihubiri imani ile aliyoiharibu zamani.

²⁴Wakamtukuza Mungu kwa ajili yangu.